Култура
Светски кинематографери на јубилејниот „Браќа Манаки“
Јубилејното, 30. издание на Фестивалот на филмска камера „Браќа Манаки“ кој ќе се одржи во Битола од 26 септември до 2 октомври, ќе понуди богата филмска програма и навистина ексклузивни имиња од светската кинематографија, кои ќе бидат гости на фестивалот
Како што претходно беше најавено, лауреати на овогодинешното издание на „Браќа Манаки“ се британскиот кинематографер Питер Сушицки, добитник на наградата за животно дело „Златна камера 300“, британскиот оскаровец Били Вилијамс, исто така добитник на наградата за животно дело „Златна камера 300“ и Ентони Дод Ментл, добитник на специјалната награда „Златна камера 300“ за особен придонес во светската филмска уметност. Годинава на фестивалот ќе бидат прикажани над 70 филмови во неколку категории. Во Официјалната програма беа селектирани 12 филмови од Хрватска, Аргентина, Филипини, Русија, Словенија, Унгарија, Велика Британија, Франција, а меѓу нив се најде и годинешниот лауреат на Берлинскиот филмски фестивал „Млеко од тага“. Селектор на Официјалната програма е Благоја Куновски – Доре. Првпат оваа година на фестивалот се воведува категоријата Нови визии која се фокусира на алтернативните филмови и независните продукции. Селектор на оваа програма е Сунчица Уневска. Документарната програма опфаќа 6 документарни филмови од најновата светска продукција. Селектор е Евгенија Теодосиевска. Во богатата програма на кратки филмови, чиј селектор е Кристијан Гино, за наградата „Мала златна камера 300“ беше избран и македонскиот „Еден“ на Вардан Тозија. Новина на „Браќа Манаки“ е и претставувањето на филмовите селектирани од Европската филмска академија – ЕФА тура на краток филм, потоа Сараево филмски град – филмови од Сараевскиот филмски фестивал, а во соработка со Филмскиот фонд на Македонија ќе биде претставена програмата Македонска панорама, каде ќе бидат прикажани домашните филмски остварувања работени во последните 2 години. Меѓу нив се „Танцувај со мене“ на Саша Дамјановски, „Име си е име“ на Сигурјон Еинарсон, „Погледни го животот низ моите очи“ на Марија Џиџева и неколку краткометражни и документарни филмови.Покрај овие, годинава се воведува уште една нова програма – Манаки Скрипт Корнер, чија цел е да промовира, помогне и школува млади филмски автори. Манаки Скрипт Корнер е несебично поддржан од Амбасадата на Кралството Холандија. Во текот на фестивалската недела, пред платото на Центарот за култура во Битола, секојдневно ќе се одржуваат и концерти на домашни бендови.Фестивалот на 26 септември свечено ќе биде отворен со проекцијата на добитникот на Оскар „Сиромашниот милионер“ на режисерот Дени Бојл, чиј кинематографер беше токму Антони Дод Ментл, кој ќе биде гостин во Битола.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).