Култура
„Pianiste all'opera“ во Даут пашин амам
Во рамките на циклусот концерти „Про музика“ што ги организира Сојузот на музички уметници на Македонија, вечерва во Даут-пашиниот амам во 20 часот, концерт ќе одржи триото пијанисти од Италија, „Пианисте ал опера“
Триото „Pianiste all’Opera” составено од Микела Де Амичис, Розела Машарели и Анџела Петача, оформено во 1998 godina, во себе ги обединува уметничките искуства на трите пијанистки.Исклучителни се по нивната формација (три пијанистки на едно пијано), по репертоарот (оригинални композиции за шест раце), по техничката виртуозност и звучната палета, типична за оркестарски состави.Нивниот репертоар вклучува оригинални композиции за клавир за шест раце од средината на XIX-тиот век, компонирани од Анџело Панцини и Џусто Дачи врз теми од најубавите опери на Џузепе Верди, а опфаќа и дела од Росини, Жорж Бизе, Франц Лист, Јохан Штраус, Пучини и други, во лична обработка на триото.Триото, редовно поканувано да одржува концерти на значајни фестивали и музички институции, има изведено над 300 концерти во Италија и во странство. Се има претставено на престижни места: La maison des Arts во Тунис по покана од Италијанската Амбасада, Espaj Cultural – Барселона, концертната сала при Универзитетот во Адис Абеба, Концертната сала при Temple du Change – Лион, во рамките на „Денови на жената и прослава на 60-годишнината од правото на глас на жените″, Театро Солима – Марсала, Палацо Роспиљози – Рим, Шадхале – Ебербах, Палацо д’Аркано – Удине, во салата на поранешниот Унгарски парламент во Будимпешта при свеченото отворање на собирот „Петрарка во Европа″, концертната сала I.I.C. – Адис Абеба, Театро Маручино – Кјети, Ебербах Некар-Музикфестивал, концертната сала во Бад Толц, Театро Верди – Трст, концертната сала при Универзитетот во Инсубриа, концертната сала на Минхен, концертната сала Данте Алигиери во Бостон, Палацо Примавера – Терни, Театро Бибиена – Мантова, Кастело Савоја – Гресоне, Кастело Орсини – Авецано, Театро Талиа – Таљакоцо, фестивалот Сант Пере – Роде, Моцартовиот фестивал – Равело, концертната сала Гренобл – Неапол, театарот Виторио Емануеле во Месина, Акрополиум – Картагина, Музео де Белас Артес – Валенсија итн.Триото има одржано турнеи во Шпанија, Германија, Франција, Австрија, Словенија, Унгарија, Турција, Соединетите Американски Држави, Африка. Освен со концертната дејност, трите пијанистки се занимаваат и со педагогија: Розела Машарели и Микела Де Амичис се професорки по пијано како главен предмет при Државниот музички конзерваториум Л. Д’Анунцио во Пескара, Анџела Петача е директорка на Чентро Музикале Јамаха во Кјети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.