Култура
Трпчески ја одушеви лондонската публика со македонските музички бисери
Деновиве, нашиот пијано виртуоз Симон Трпчески ја отвори престижната интернационална пијанистичка серија на Саут Банк центарот во Лондон
Целата сезона е посветена на 200-годишнината од раѓањето на Фредерик Шопен. Концертот на Трпчески во салата на Кралицата Елизабета беше поздравен со долготраен аплауз и овации. По делата од Хајдн, Моцарт и Шопен, концертот заврши со суитата Песни и шепотења на македонскиот композитор Панде Шахов, кој живее и работи во Велика Британија. Во публиката имаше и група Македонци кои со посебно задоволство слушнаа неколку транскрипции на македонски народни песни, меѓу кои беа и Ајде поминувам, Си заљубив едно моме, На Струга дуќан да имам и Сербез Донка, за која Трпчески напиша возбудлива каденца. Во текстот на програмата беа вклучени детали за потеклото и содржината на песните. Публиката со симпатии и интерес ги слушна овие македонски бисери, облечени во виртуозна пијанистичка фактура со очигледни џез влијанија.Критичарот Пол Рид од веб-порталот Класикал Сорс (Classical Source) со воодушевување пишува за концертот: „Изведбата на сонатата од Хајдн беше грандиозна, енергична, покажувајќи ги карактеристичните контрасти на бура и стремеж. Двете збирки на варијации од Моцарт полни со досетливост и фантазија: одушевувачка изведба на Трпчески!” Рид ја истакнува и аристократски-елегантната и мајсторска изведба на ноктурната од Шопен. Посебно внимание е посветено на лондонската премиера на суитата на Панде Шахов. Рид објаснува дека основа на композицијата се четири македонски народни песни, но и два кратки цитата од Шопен. „Делото на Шахов е страствена пијанистичка композиција со возбудливи влијанија од џезот во стилот на Стравински и Пуланк. Композицијата со својата енергична виртуозност е во доменот на Рахмањинов и сосема му одговараше на пијанистичиот стил на Трпчески”.Џорџ Хил од лондонски Гардијан, пак, потцртува дека изведбите на останатите дела беа авторитативни и рафинирано изведени: Хајдн – беспрекорно спакуван, а Шопен – тонски облагородено и внимателно звучен. Критичарот посебно се осврнува врз суитата на Шахов со уште повеќе детали: „композиторот покажа способност за креирање на пијанистичка фактура и му овозможи на Трпчески да создаде многу бои и атрактивна техника. Трпчески ја искористи оваа шанса со обете раце! Вистински богато и атрактивно дело, изведено од Трпчески со особена топлина и пожртвуваност”.Возбудливата програма од овој концерт, Трпчески ќе ја изведе и пред домашната публика на концертите во Охрид (7 ноември) и Велес (8 ноември).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.