Култура
Концерт на виолинистот Климент Тодороски и пијанистката Марија Вршкова
Утревечер, 15 декември, во 20:30 часот во Музејот на град Скопје концерт ќе одржи еден од најперспективните домашни виолинисти Климент Тодороски, во пијано придружба на Марија Вршкова. На програмата се од Крајслер, Бетовен, Шуплевски, Виењавски и Франк
Концертот го организира Здружението за култура и уметност „КултурОп”, со поддршка од Министерството за култура на Република Македонија и Градот Скопје. Влезот е слободен.„Климент Тодороски беше извонреден, не само со своето самоуверено држење на сцената, туку и со нијансирањето во тонот, сензитивноста и еланот што ги долови во ‘Љубовниот поздрав’ од Елгар и ‘Шпанскиот танц’ на Фаља/Крајслер…” – Џефри Норис, Дејли Телеграф, Лондон
Климент е роден 1984 година во Охрид. Го започнува своето музичко образование во Охрид и Битола, во класата на професор Ванчо Стоилков. Понатаму продолжува во Националниот музички конзерваториум во Тулуз, Франција во класата на професор Благоја Димчевски (концерт-мајстор на Националниот оркестар на Тулуз „Capitole”) каде во 2002 год, го оформил музичкото образование. Учесник е на семинари, концерти и натпревари во Словенија, Русија, Романија, Србија, Франција… Добитник е на повеќе награди меѓу кои се издвојуваат: Прва специјална и втора награда на републички натпревар, трета награда „Петар Коњовиќ” Белград, Србија, втора награда на меѓународниот натпревар „Корнелија Бронзети” во Романија, прва специјална награда на меѓународен натпревар „Охридски Бисери“ во Охрид.Имал настапи како солист со Македонска филхармонија, Камерниот и Симфонискиот оркестар при ФМУ во Скопје, на „Охридско лето”, „Хераклејски вечери“… Учествувал во реализација на неколку проекти со еминентниот виолинист Јован Колунџија, Националниот камерен оркестар од Тулуз и Симфонискиот оркестар на „Capitole”. Во неговите позначајни настапи може да се вбројат и настапите со светски познатиот пијанист Симон Трпчески, на Концертната турнеја низ Македонија (2007-2008), Велигденскиот концерт – Скопје (2008) како и настапот во септември 2008 година во седиштето на Обединетите Нации по повод затворањето на 62. сесија на Генералното собрание на Обединетите Нации, по покана на Претседателот, неговата екселенција Срѓан Керим. Исто така имаше настап во Мадрид на покана на Амбасадорот на Република Македонија во Шпанија, Методија Белевски и со светското чудо од дете, диригентот Илич Ривас на фестивалот „Скопско лето“ оваа година.Климент Тодороски во моментов е апсолвент на ФМУ во Скопје во класата на професор Олег Кондратенко, а е во редовен работен однос во Македонска опера и балет како концерт-мајстор.Марија Вршкова е родена во Битола каде го завршува основното и средното музичко образование. Дипломирала со највисока оценка – „Cum Laude” на Факултетот за музичка уметност – Скопје во 1997 година во класата на проф. Тодор Светиев, кај кого во 2001 година ги завршува и магистерските студии.Добитник е на повеќе награди на државно така и на меѓународно ниво (III-та награда на интернационалниот конкурс за млади пијанисти во Рим – Италија, први републички и 2 трети сојузни награди, во рамки на поранешна Југославија. Посебно се истакнува нејзината дејност на полето на „новата музика” – заедно со ансамблот „АЛЕА” има остварено 20-тина светски праизведби на камерни и дела за пијано.Како солист и како камерен музичар има настапувано во Турција, Хрватска, Холандија, Германија, Полска, Велика Британија, Украина, Италија, Русија, Хрватска, Албанија, Бугарија и има остварено соработка со многумина уметници, меѓу кои и Стефан Миленковиќ, Моника Лесковар, Ино Мирковиќ, итн. Вршкова е присутна на сите најреномирани сцени и манифестации во земјава, како „Охридско лето”, Салон 19.19, „ДММ”, „Хераклејски вечери”, „Скопско лето” и др.Како круна на долгогодишното камерно музицирање доаѓа специјалната награда за најдобар музички соработник од интернационалното жири во рамките на годинeшниот натпревар „Охридски бисер”.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).