Култура
МНТ ја истакна работата во изминатите три годин
Македонскиот народен театар денеска ја соопшти работата извршена во последните три години, а за претстојната 2010 година најави повеќе премиери
Веќе овој петок на сцената на МНТ ќе биде поставена претставата “Буре барут“, освежена со млади актери. Во МНТ во тек се подготовките за претставата “Тупаница полна љубов“ по текстот на Дејан Дуковски “Празен град“, а во режија на босанската режисерка Синди Лопачиќ. Исто така, траат подготовките за копродукцијата на проектот “Сите жени на Балзак“, помеѓу МНТ и Ребис, а во режија на Бојан Трифуновски. За една недела ќе започне со проба претставата Доктор Фаустус, по дело на Гетеовиот Фауст, а адаптирана и режирана од Срѓан Јанакиевиќ. Режисерот Васил Христов ќе ги работи “Пеколен портокал“ и “Три гроша“ од Брехт. Наесен ќе се работи на претставата “Солунски атентатори“ во режија на Синиша Ефтимов, според автентични документи на солунските атентатори и сценариото на Јован Бошковски. Пред крајот на годината режисерот Златко Славенски ќе работи на претставата “Зли души“ од Достоевски. Почнувајќи во 2007 година со премиерата „Болва во уво“ во режија на Бранко Ставрев, беше обележана 100-годишнината од смртта на големиот драмски писател Жорж Фејдо, оваа претстава досега има доживеано 40 изведби и ја гледале 40 000 посетители. Во 2007 беше одбележана и 100-годишнината од раѓањето на македонскиот актер Петре Прличко, а за таа пригода на репертоарот на МНТ е поставена модерната верзија на комедијата „Сомнително лице“ на Бранислав Нушиќ, таа претстава досега има достигнато над 600 изведби и посетеност од 60 000 гледачи.Како најистакнати претстави во МНТ за последниве три години се издвојуваат и : „Крал Иби“ во режија на Бојан Трифуновски, „Соларис“, режија Златко Славенски, „Дракула“ на Дејан Дуковски, „Мара-Сад“ под режисерката палка на Васил Христов, „Празен град“ исто така на Дејан Дуковски, „Фигаро се разведува“, режисер Куштрим Бектеши, „Госпоѓа министерка“ во копродукција со „Вртелешка“ во режија на Наташа Поплавска, театарскиот проект „Свето срце“ каде што Љубиша Георгиевски се јавува како комплетен автор на делото. Еден од поголемите и покомлексни потфати на Македонскиот народен театар беше носењето во Македонија на легендарниот театарски режисер Љубиша Ристиќ и реализација на „Троил и Кресида“ на Вилијам Шекспир, со учество на околу 80 актери и музичари, се играше под отворено небо во Скопје и Битола во шестчасовна верзија и ја проследија неколку илјади гледачи. Од малата сцена на МНТ за овие три години можат да се издвојат „Среќните денови на Љубовникот“ во режија на Нелко Нелковски, монодрамата „Стилски вежби“, исто во режија на Нелко Нелковски која го најави враќањето на извонредната актерка Емилија Андреева, „Вејка на ветерот“ од Коле Чашуле во режија на Нела Витошевиќ и „Е.Е.Г“, монодрама во копродукција со Тетарски квартет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).