Култура
ТРИ со нови бестселери на Саемот на книгата
Издавачкиот центар ТРИ, на годинашниот Саем на книгата ќе промовира неколку хит-книги, а меѓу нив главен адут ќе биде „Девојката со тетоважа на змеј“ од Стиг Ларсон
„Девојката со тетоважа на змеј“ од Стиг Ларсон е шведска книжевна сензација и е еден од најчитаните трилер-романи во светот последните две години. Овој роман е прв дел од трилогијата насловена Милениум, чија популарност ги надмина делата и на веќе етаблираните автори како Ден Браун и Роберт Ладлам.Она што особено ќе ја израдува помладата читателска публика од продукцијата на издавачката куќа ТРИ, е објавувањето на последниот, четврти дел од фантастичната сага „Самрак“ на Стефани Мајер, насловена „Зазорување“. „Самрак“ е светски литературен феномен кој е досега прочитан од фантастични 85 милиони читатели на дури 48 светски јазици, а вистински хит е и помеѓу македонските читатели. Натаму, од овој реномиран македонски издавач ја најавуваат и промоцијата на уште една инспиративна книга од миленикот на македонската читателска публика, Робин Шарма, „Откријте ја вашата судбина со калугерот што го продаде своето ферари“, кој е продолжение на мега-популарната „Калуѓерот што го продаде своето ферари“; последната книга на гуруто Спенсер Џонсон „Врвови и долини“, а објавено ќе биде ново издание на култниот роман на Џек Керуак, „На пат“. Специјален гостин на ТРИ на саемот ќе биде Светислав Басара, еден од најпопуларните современи српски писатели. Повод за неговото гостување е првото претставување пред македонската публика со романот „Подемот и падот на Паркинсоновата болест“, кој ТРИ заедно со авторот ќе го промовира на 15-ти април на Скопскиот саем. Книгата ја доби НИН-овата награда за Роман на годината 2007, а за творештвото на овој познат автор, кој првпат се приопштува на македонски јазик ќе говори Оливера Ќорвезироска.Објавени ќе бидат и неколку интересни детски книги, а преку издавачката куќа ПАБЛИШЕР ќе бидат промовирани свежи бизнис наслови, а меѓу нив „Бизнис-стилот на Ричард Бренсон“ од Дес Диарлав, „Како да станете вистински лидер“ од Џон Максвел, „Секој може“ од Сахар и Боби Хашеми и „Библија за продажба“ од Џефри Гитомер. Во рамките на едицијата Вљубени во книгата, ТРИ го објави третото издание од „Последниот чај“ од Винка Саздова и четвртото издание на „Индиго Бомбај“ од Јагода Михајловска Георгиева. Романите на Саздова и Михајловска Георгиева се најпродаваните книги во изминатата година и ги надминаа сите досегашни тиражи од домашни и светски хит-мејкери. Поради големиот интерес, и обете авторки ќе бидат домаќини-гости на штандот на ТРИ, и ќе бидат достапни за посвета и разговор. Гости на штандот на ТРИ ќе бидат уште неколкумина македонски автори, меѓу кои и отец Методиј Златанов.Љубителите на убавиот пишан збор кои ќе го посетата штандот на ТРИ, ќе можат да ги набават своите омилени изданија по популарни цени намалени до 60 отсто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).