Култура
Концерт на Симон Трпчески и пријателите
Нашиот најдобар пијанист, Симон Трпчески, во придружба на свои пријатели виртуози на жичани инструменти ќе одржи концерт на камерна музика во Скопје на 5 јуни по повод 200 годишнината од раѓањето на германскиот композитор Роберт Шуман
Во изведбата на дела од Шуман и Франк, на сцената на нашиот пијано виртуоз Трпчески ќе му се приклучат неговите пријатели – врвни инструменталисти со меѓународна репутација: виолистот од Украина, Максим Рисанов, виолинистите Борис Бровцин од Русија и Андерс Нилсон од Норвешка и германскиот виолончелист Леонард Елшенбројх.Билетите за овој настан по цена од 400 денари од следната недела ќе се најдат во продажба во Југотон – ГТЦ.Организатори на концерото се Здружението за култура и уметност КултурОп под покровителство на Амбасадата на Сојузна Република Германија.Максим Рисанов од Украина е еден од најдобрите и најхаризматични светски виолисти. Носител е на наградата за млад уметник на годината во избор на Classic FM Gramophone и е дел од програмата BBC New Generation. Живее и работи во Лондон.Свири на виола „Giuseppe Guadagnini“ од 1780 година, позајмена од Фондацијата на Елиз Матилде.Борис Бровцин е роден во Москва во 1977 година во семејство во длабоки музички корени. Неговиот прв јавен настап бил на сцената на театарот Бољшој на 6-годишна возраст. Дипломира на Државниот „Чајковски“ конзерваториум во руската престолнина. Настапува со престижни оркестри и е носител на голем број награди и признанија.
Андрес Нилсон е роден во 1983 година и е еден од најактивните млади норвешки виолинисти на денешницата. По неговото деби како солист на Филхармонискиот оркестар на Берген во 2002-та година, настапува со повеќето симфониски оркестри на Норвешка. Во 2006 година изведе виолински концерти од 7 различни композитори – од Бах преку големите романтичари, па се’ до современите автори. Освојувач е на двата најголеми натпревари во својата земја: Интро-класик и музичката награда на принцезата Астрид и добитник на наградата за „Млад музичар на 2009 година“ од Оркестарот на Норвешкото радио.Леонард Елшенбројх е роден во Франкфурт во 1985 година. По добивањето на наградата „Леонард Бернштајн“ е признат како еден од најзначајните и најоригинални германски челисти на неговата генерација. Како долгогодишен штитеник на Фондацијата на Ана-Софи Мутер го привлекува вниманието на водечките меѓународно признати диригенти. Рецитално, во пијано придружба настапувал во 18 европски земји. Посебен предизвик му се настапите со дела од камерната музика.Свири на виолончело Matteo Goffriller “Leonard Rose”-Венеција,1693 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.