Култура
Изложба на фотографии и театарска претстава за Тесла вечева на Скопско лето
Манифестацијата Скопско лето 2010 продолжува вечерва со два многу интересни настана. Прво во 20 ч. Во Музејот на град Скопје, ќе може да се проследи изложбата на Швајцарецот Александер Бајер, а потоа во 21.30 ч. Во Сули-ан ќе беде изведена премиертата на „Деветте книги на Никола Тесла“
Фото изложба „Хуманитас” на Александер Бајер од Швајцарија, има поднаслов „Причина и последица“ кај портретите. „Бесот е причината, личноста излегува на површина; Стравот е последицата, личноста се повлекува; преку тој мој темен премин, може секој да се постави во средина на причината и последицата. Портретите се она што сме сите ние, „луѓе” без разлика од која раса сме или кој пол, дали дебели, ниски, стари, млади, хендикепирани, трансексуалци итн. Колку повеќе се оградуваме од поделбиве, толку повеќе припаѓаме на еден пол – човечкиот пол и сите сме браќа и сестри.“, стои во најавата на оваа изложба што претставува доволна провокација да погледнеме како швајцарскиот фотограф ни ги доловува психолошките состојби кај портретираните. „3327 ( Деветте книги на Никола Тесла)” всушност претставува мултимедијална театарска претстава по текст, режија, сценографија и видео концепт на Златко Славенски. Во улогите на Мајката гулабица се појавува Славица Петровска-Галиќ а на Детето гулаб, Нада Талевска. Музиката е на Кокан Димушевски, Видео и аудио креативна реализација: Милчо Узунов (3-Д Проџект Студио), информатичка подршка и програмер е Кирил Марковски, а извршен продуцент на проекто е Александар Герасимовски.Во своето тематско средиште, овој сценско-музички и визуелно-театарски проект, ќе го има делото на светски познатиот научник Никола Тесла. Осамен и остарен, познатиот научник умира во хотелот „Њујоркер” во собата бр.3327 во којашто престојувал неколкуте последни години од својот живот. Веднаш по неговата смрт, се раѓа легендата дека во таа соба биле складирани многуте списи, нацрти и останати пишани матерјали од неговите научни пронајдоци – а кои дотогаш не биле обзнанети во јавноста. Се шпекулира дека тие документи се изгубени, или пак (според други извори) се запленети од страна на тајните служби. Некои, пак, сметаат дека немало никакви списи, туку дека генијот со помош на фотографското паметење сето тоа го имал меморирано во својата глава – па така сето тоа благо го однел во својот гроб. Во оваа смисла, наративната оска на претставата ќе биде една своевидна истрага за тоа што всушност имало позади вратата бр. 3327 и тоа ќе биде всушност едно визуелно-музичко патување низ богатиот свет на Никола Тесла. Две собарки од хотелот, со помош на двата гулаби кои ги чувал Тесла до неговата смрт, ќе ги откријат 9-те книги испишани од генијот. Низ тие 9 книги, кои се однесуваат на 9 фундаментални состојби и собитија на постоењето на светот и животот, всушност ликовите ќе завлезат во животот на научникот, но и ќе ги ре-откријат т.е. потврдат човечките сфаќања и стремежи за апсолутното и совршеното – а кои се од најважно значење за опстанокот на човечкиот род на планетава.Репризата на мултимедијалната театарска претстава „3327 (Деветте книги на Никола Тесла)” ќе биде изведена на 9 јули во 21,30 часот на Факултетот за ликовна уметност – Сули-ан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).
Култура
Филмот на Цветановски со награда за најдобар филм во Калифорнија
„Бизнисот на задоволството“ на Гоце Цветановски ја доби наградата за најдобар долгометражен филм на „Риверсајд Филм фестивал“ во Калифорнија, САД.
Фестивалот којшто се одржа од 10 до 14 април, во своето 22-годишно постоење се залага за промоција на храбри филмови кои обработуваат општествени предизвици, но и говорат за смелоста на човековиот дух.
Цветановски го радува тоа што филмот по вторпат e наградeн во САД, откако минатиот месец беше прогласен за највпечатлив филм на 30. издание на „Седона интернешнал филм фестивал“ во Аризона.
„Калифорнија е центар на американската филмска индустрија, и секако дека како автор сум горд што добивме награда овде, и тоа во конкуренција со американски филмови со многу поголеми буџети. Едвај чекам да завршиме со оваа светска фестивалска турнеја и во септември да го презентираме пред нашата публика. Очекувам филмот да отвори теми за дискусија на повеќе нивоа, но пред се‘ сакам да го продолжиме трендот од последниве години, во кој на домашните гледачи им се враќа довербата и желбата да гледаат македонски филмови“, рече Цветановски.
„Бизнисот на задоволството“ досега доби осум награди на филмските фестивали низ светот, од кои пет се за најдобар долгометражен филм.
Филмот ја следи приказната на новинарка, која опседната со исчезнувањето на нејзината најдобра пријателка, подготвува тајна операција со цел да разоткрие мрежа за трговија со жени. Но, како што нејзините соучесници се приближуваат до шефот, ситуацијата излегува од контрола.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Филмот е снимен со поддршка на Агенцијата за филм.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.