Култура
Скромно, но квалитетно Охридско лето
Забелешките главно се упатени на скромноста на фестивалот, не на квалитетот.
Отворањето на јубилејното 50-то издание на Охридско лето помина спектакуларно. Настапот на Симон Трпчевски со Рускиот национален оркестар со кој диригираше маестралниот Михаил Плетњов ја воодушевија публиката. Овој почеток е ветување за уште едно успешно издание на можеби најважната културна манифестација во државата. Но дали програмата соодветствува со одбележување на половина столетие од постоење на една ваква манифестација?
„Економските можности и самиот буџет покажуваат дека станува збор за една скромност во услови на голема светска криза. Но ние се приспособивме на тоа за да направиме програма која, сметаме, дека ќе соодветствува на овој јубилеј и достојно ќе не’ претстави. Се вложи голем труд за да се осмисли програма што ќе соодветствува на овој голем јубилеј и достојно ќе го презентира фестивалот – изјави в.д. директорот на Охридско лето, Васил Зороски на прес конференцијата пред почетокот на фестивалот„Секоја година имавме по три-четири звучни имиња, но годинава за секоја вечер имаме по еден голем уметник кој до сега настапувал во рамките на Охридско лето. Затоа и ова издание е во знакот на ретроспективата, односно пресек за сработеното, до сега имавме 76 врвни уметници. Некои од нив повеќе не се меѓу нас, некои повеќе не концертираат, затоа ги донесовме тие кои што се активни на светската музичка сцена. Во однос на квалитетот на програмата, за него треба да кажат оние кои се стручни односно оние кои се музички образовани. Многу квалитетно и исцрпно се работеше на годинешната програма. Воопшто не се за потценување звучните имиња што ќе настапат на фестивалот. Па ниту за Михаил Плетњов никој не знаеше дека добил Греми награда да не беше немилиот настан што се случи поврезан за неговот име ,“ изјави за порталот на „Форум“ Гордана Јосифова-Неделковска. Снежана Чадиковска поранешен селектор на фестивалот “Охридско лето”, уредувач на монографијата за 50-годишниот јубилеј на фестивалот за програмата што јубилејното издание на фестивалот ја нуди изјави:„Имавме спектакуларно отворање на фестивалот како што не можевме да видиме до сега. Квалитетот на програмата апсолутно одговара на ова јубилејно издание. Имаме малку вечери со големи ансамбли, но со оглед на рецесијата, и ова е добро.“И според претседателот на Управниот одбор, Зоран Вељаноски, програмата е соодветна за јубилејот. – Управниот одбор ја усвои програмата и смета дека таа е достојна за педесеттиот јубилеј на фестивалот. Сето тоа е во рамките на годинашниот буџет, односно во рамките на средствата со кои располага фестивалот – рече Вељаноски.Најмногу учесници од странство ќе има во музичкиот дел од програмата. Ќе настапат музички уметници од Русија, Словенија, Египет, Австрија, Франција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.