Култура
Вечерва на Астерфест на Скопско лето
Во недела, на 25 јули, во Музејот на град Скопје (Стара железничка станица) со почеток во 20,30 часот ќе биде одржана традиционална филмска вечер на наградените филмови од 6-то издание на фестивалот на краток и документарен филм Астерфест кој се одржа од 27 до 31 мај во Струмица
Проекциите ќе бидат во вкупно времетраење од 78 минути. Најпрвин ќе биде прикажан 7-минутната документарна репортажа како резултат од работилницата Правење докуметарци. Веднаш потоа ќе бидат прикажани четирите наградени филмови во главните натпреварувачки категории: рускиот документарец „Провинција 35х45“ кој ја освои Златната потковица (Гран Прито), шведскиот „Сакано дете“ кој беше прогласен за најдобар светски краток игран филм, шпанскиот „Исповедта на Садуј“ кој ја доби наградата за најдобар анимиран филм и словенечкиот краток игран „Ловец на облаци“ кој се закити со Мувиленд наградата.„Провинција 35х45“ во режија на Евгениј Соломин, во траење од 43 минути снимен во 2009 г., зборува за тоа како низ целата земја поранешните пасоши на Советскиот сојуз се заменуваат со новите руски пасоши. Провинцискиот фотограф патува од едно во друго сибирско село за да направи фотографии 35×45 мм. Благодарение на големиот број на клиенти и на длабоките обсервациски проникнувања во селскиот живот, овој филм се претвора во поетска приказна за погледот на светот на луѓето кои живеат во далечните области кои се наоѓаат на крстопат меѓу две култури, советската и оваа, модерната руска. Филмот „Сакано дете“ е во режија на Даниел Виртберг, трае жестоки шест минути!, е вп шведска продукција од 2009 г. а станува збор за ситуацијата „кога тато ќе донесе дома маче, тој и мама ќе збудалат по него, а ужасот на нивната мала ќерка ќе се зголеми.“Шпанскиот минатогодишен анимиран филм „Исповедта на Садуј“ е куса сатирична бајка која сака да ја провери правилноста на она што ни го оставија нашите црковни институции нам на индивидуалците, особено чувството на вина, потербата да ни бидат простени гревовите, стравот од бога или проклетството.„Ловец на обалци“ е петнаестоминутен словенечки филм кој се базира на стрипот на Томас Лаврич, во режија на Миха Книфиц. Дејствието се одвива во 2147 г., кога Земјата целата е пустина, Сонцето предатор на небото без облаци. Еден грст старци живеат во градот Црвена пустина. Остатоците од пристништето кои се протегаат во пустината сведочат за фактот дека овде некогаш имало одморалиште покрај разбранувано море. Еден ден непознат човек влегува во барот Фонтана. Леон, ексцентрик со шапка, го препознава во непознатиот, Гоничот на облаци, еден од оние кои го уништиле судот и тоа ја предизвикало катастрофата
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).