Култура
На Охридско лето доаѓа Камерно дуо Трусови
Кирил и Александра Трусови во сабота навечер во 21 часот ќе настапат во „Св.Софија”. На ова јубилејно издание на фестивалот „Охридско лето” тие ќе настапат со програма од Алфред Шнитке, Сергеј Прокофјев, П.И.Чајковски, Феликс Менделсон и Морис Равел
Публиката на фестивалот „Охридско лето” повторно ќе може да ужива во концерт приреден од врвни уметници. Камерното дуо Трусови и оваа година се дел од фестивалската програма. Нивниот фантастичен настап пред две години на Охридско лето, кој никого не остави рамнодушен, беше причина повеќе музичкиот селектор на фестивалот, Гордана Јосифова – Неделковска, да ги покани да бидат дел и од ова јубилејно издание. Виолинистот Кирил Трусов дебитира на шестгодишна возраст со Филхармонијата на Санкт Петербург. Неговиот исклучителен талент многу брзо е забележан па така една година подоцна тој е поканет да настапува со Рускиот национален оркестар под диригентство на големиот Арнолд Кац во Москва. Неговата уметничка кариера, која доживува постојан подем внимателно ја следат неговите ментори Игор Ојстрах и лорд Јехуди Мењухин. Со меѓународна слава се здобива по настапот во Париз во 2009 година со Националниот оркестар на Франција, диригиран од Даниеле Гати. Има настапувано како гостин солист со Минхенската филхармонија, Штацкапел Берлин, оркестарот “Лајпциг Гевандхаус”, радио-симфониските оркестри на Баден-Баден и на Фрајбург и Оркестарот на Париз под диригенство на Сер Невил Маринер, Даниеле Гати, Давид Стерн, Кристоф Попен, Владимир Спиваков, Мико Франк и Луи Лангре. Трусов свири на вилината “Бродски” (1702) направена од Антонио Страдивари, на која Адолф Бродски ја дал светската премиера на Концертот за виолина и оркестар на Чајковски на 4ти декември, 1879 година. Сестрата на Кирил, Александра Трусова дебитира на седумгодишна возраст, исто така со Филхармонијата на Санкт Петербург. Три години по првиот настап ја освојува првата награда на 20. Меѓународен натпревар за пијанисти “Млади виртуози” во Прага. По преселбата во Германија заедно со семејството, добива покана да настапува со Оркестарот на Хамбуршката опера под диригентство на Герд Албрехт и на фестивалот Вербие каде добива грант од “Ројтерс”. Таа редовно настапува во Германија, Франција, Швајцарија, Шпанија, Белгија, Австрија и Канада, со што има можност да работи со диригенти како Волфганг Гоненвајн, Лорин Мазел, Антони Вит, Сер Невил Маринер, Јозеф Сук, Жан – Жак Канторов, Ари ван Бек и Мајкл Тилкин, меѓу другите. Со огромен успех настапува со својот брат Кирил Трусов. Заедно имаат направено и аудиозапис со програма од Брамс и од Бетовен, издаден од ЕМИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.