Култура
„Тавитјан брадерс“ на њујоршката џез-сцена
Во реномираниот клуб „Блу ноут“ се претставија со авторски материјал, но и македонски фолк-мотиви во џез-стил
Јане Бојаџиевски, Глас на Америка на македонскиМакедонската џез-група „Тавитјан брадерс“ неделата настапи во реномираниот њујоршки клуб „Блу ноут“. Диран и Гаро Тавитјан велат дека многу научиле од својот татко Гарабет, легендарниот тапанар на „Леб и сол“, кој им помогнал да се изградат како музичари. Авторски материјал на Диран и Гаро – јуниор, неколку стандарди од светското џез-наследство, но и неколку македонски фолк-мотиви во џез стил; вака, накусо, може да се опише вечерта со „Тавитјан брадерс“ во Њујорк.Диран, Гаро и Горан Гешовски наидоа на одличен прием на публиката во „Блу ноут“ во Њујорк.Постариот Диран вели – имавме огромна чест да настапуваме во клубот во кој свирел Чарли Паркер, на пример. Признава, големо е влијанието од својот татко, како за досегашниот успех во музичкиот бизнис, така и за креативноста. „Сме настапуваме во многу места во нашата држава, но и во светот. Секогаш кога ќе чујат дел од нашиот фолклор, им е интересно – исто како што ние кога слушаме некоја музика која е нетипична за нашето подрачје. Во Европа и Америка има многу квалитетни музичари, секогаш се цени барем еден процент на – оргиналност. Ако успеете да отскокнете и да понудите нешто квалитетно, сте направиле голем успех. Македонската музика има капацитет за тоа“, вели Диран. Тој не исклучува повторно музицирање во проектот „Гаро и Парамециум“ во кој 10-тина години настапуваа заедно со брат му. 28-годишниот Гаро Тавитјан – јуниор, стипендист на Беркли во Бостон, гордо го носи името на неговиот татко, и со жар говори за карактеристиките на македонскиот етно-мелос.„Богати сме со една таква историја и мелос кој е толку многу комплициран, слушлив и певлив, од аспект на мелодии, но ритмиката е веројатно таа што го плени целиот свет. Основниот ритам во Македонија е 7/8. Потоа се движи кон 9, 11, 13, но акцентските целости се тие што ги разликуваат тие 7/8 од оние што се свират на Запад“, раскажува Гаро.По Њујорк, „Тавитјан брадерс“ продолжуваат за Лондон, каде ќе настапат на тамошниот џез-фестивал по повод 200- годишнина од раѓањето на Фредерик Шопен. Следуваат и два концерти во Португалија. Деновиве се подготвуваат и за снимање на новиот спот од проектот „Македонското срце чука во 7/8“, каде балкански ѕвезди пеат традиционални македонски песни. Патриотизам или културно освестување? И двете, велат браќата. Идејата била да се приближи македонскиот мелос до помладата публика на просторот на поранешна Југославија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.