Култура
Не очекува концерт за паметење
Лондонскиот филхармониски оркестар пристигна во Скопје. Оркестарот кој позади себе има 78-години историја во настапите на светските сцени за прв пат ќе настапи во Македонија. Предводен од својот шеф-маестро Владимир Јуровски, оркестарот ќе настапи заедно со македонскиот пијано-виртуоз, Симон Трпчески.„Убедена сум дека настапот на Лондонскиот филхармониски оркестар заедно со македонскиот виртуоз, Симон Трпчески, на спектакуларен начин ќе ја заокружи 2010 година. Не очекува концерт за паметење“, изјави Елизабета Канческа – Милевска, министер за култура на Република Македонија, на прес-конференцијата одржана по повод значајниот музички настан.Маестро Владимир Јуровски, шеф-диригент на Лондонскиот филхармониски оркестар е еден од најбараните диригенти на денешницата. Заедно со оркестарот прв пат е во Македонија. Во најава на концертот откри дека со Симон Трпчески ги поврзува повеќегодишно пријателство.„Се познаваме долго време и чест ми е што во Скопје заедно ќе изведеме дело од Сергеј Прокофјев, бидејќи тоа е композитор кој и двајцата го познаваме многу добро“, нагласи маестро Владимир Јуровски.Во однос на музичката соработка со Трпчески, диригентот Јуровски потенцираше дека македонскиот виртуоз е музичар кој не познава граници во изведбата на музичкото дело и дека концертите со него ги доживува како водење музички дијалог.Лондонскиот филхармониски оркестар во Скопје пристигна од Истанбул, Турција, а потоа заминува за Софија, Бугарија. Во овој период се наоѓа на турнеја низ Европа во земји во кои досега не настапувале.„Уживаме во турнејата и особено ни е драго што за прв пат ќе настапиме во Македонија“, изјави Роана Чендлер во име на целиот оркестар.Додека гостите од Лондон веќе се во Македонија, македонскиот музичар се уште е во Лондон, а во Скопје ќе се врати на денот на концертот. Во видеопорака упатена до медиумите, Трпчески нагласи два битни моменти поврзани со концертот во Скопје. Во своето портфолио ги поврзува јубилеите од првиот настап со Македонската филхармонија пред 15 години и првиот настап со Лондонскиот филхармониски оркестар во Лондон пред 10 години. Трпчески објасни дека концертот во Скопје се подготвува повеќе од две години. Истовремено вети дека како финале на целиот труд ќе понудат искрен и моќен звук, со длабочина во идејата и посебен манир во изведбата на делата.Програмата што оваа исклучителна комбинација уметници ја предвиде за македонската публика ќе ги опфати Симфонијата број 5 од Феликс Менделсон, Симфонијата број 3 од Јоханес Брамс, како и Концертот за пијано и оркестар број 3 од Сергеј Прокофјев, во чија изведба солист ќе биде нашиот пијано-виртуоз Симон Трпчески.Концертот на 10 декември во 20 часот во „Метрополис арена“ ќе се одржи во организација на „Култур Оп“, во соработка со „Ај Ем Џи Артистс“, чиј ексклузивец е и нашиот пијанист Симон Трпчески, а под покровителство на Министерството за култура на Република Македонија./крај/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.