Култура
Жарко Башески и ликовната група „Зеро“ учесници на Венециското биенале
Проектот „Прескок“ на скулпторот Жарко Башески под кураторство на националната установа Центар за култура „Марко Цепенков“ од Прилеп и проектот „Зеро-шлепер“ на ликовната група „Зеро“ под кураторство на националната установа, Национална галерија на Македонија се македонските претставници на претстојното 54. Венециско биеанале. Станува збор за најголемата интернационална ревија на уметност во светот, место каде се презентираат најновите остварувања на светската уметност која ќе се одржи од 4 јуни до 27 ноември.„За Македонија оваа манифестација претставува вистински предизвик и можност да ги покаже и сподели своите достигнувања и креативните идеи пред европската и светската јавност, посебно поради фактот што сме земја која се стреми да го достигне врвот во сите уметнички форми. Оваа година до Министерството за култура беа доставени дури седум предлог-проекти за учество на Венециското биенале. Комисијата во состав проф. Васил Василев, проф. Антони Мазнев и проф. Владо Величковски имаше одговорна задача, бидејќи сите понудени проекти беа добро осмислени. Сепак овие два избрани проекта нудат посовремени концепти кои на доследен и професионален начин би ја претставиле Македонија на оваа најзначајна светска ликовна манифестација,“ изјави министерката за култура Елизабета Канческа-Милевска.Проектот „Прескок“ на скулпторот Башески открива ново ликовно истражување со јасен и разбирлив ракопис кој е во духот на современото ликовно творештво. Проектот демонстрира нео-реалистичен и ликовен потфат вреден за внимание. „Го работам човекот како индивидуа и во овој случај се работи за вечната намера на секој човек сам себе да се надмине, да се прескокне на некој начин и да биде нешто повеќе од тоа што е во моментот. Тоа го прикажувам преку фигури од полиестер и силикон, како оние што на последната изложба ги работев, ќе бидат наративни, експлицитно изведени, реалистички до крај. Мислам дека имам добра проект со кој чесно и квалитетно би ја претставил државата. Се надевам дека со малку поголем ангажман на Министерството за култура ќе го покренеме интересот кон државата, “изјави скулпторот Жарко Башески. Проектот „Зеро-шлепер“ на ликовната група „Зеро“ е нов обид на членовите на оваа авангардна уметничка група по 80-те години на минатиот век да создава концепт или визија во кои ќе ги соединат своите индивидуални истражувања во заедничко дејствување како група. Станува збор за разновидни стилски определувања и отвореност кон најсовремените ликовни сфаќања и истражувања поврзани со актуелните случувања во светската уметност. „Се работи за осум уметници од кои секој има своја визија и тоа е еден коангломерат од визии. Кога ќе се отвори шлеперот, може да настане поплава од секвенци од естетика, паранои, стравови,“ изјави Александар Станковски кој е дел од проектот „Зеро“ Ова е деветта година по ред како Македонија се претставува на оваа престижно уметничко случување. Деновиве ќе биде одреден и буџетот кој ќе биде одвоен за претставување на Македонија на Венециското биенале. крај/сж
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).