Култура
Успешна турнеја на Балетот во Италија
На меѓународната турнеја на Македонскиот балет во Италија, која започна на 27 ноември и траеше до 31 јануари, беа изведени 50 изведби на „Лебедово езеро“, „Заспаната убавица“ и „Оревокршачка“
Нашите солисти настапија во четириесетина градови во познати театри чијашто историја говори за нивното значење во Италија и пошироко.Заедно со нив, на сцената се појавија врвни гости од балетските сцени од Европа меѓу кои Сергеј Сидорски, Игор Бучалев и други.„ Оваа турнеја беше историски момент за Балетот и ќе остави една трага во оваа институција. Имено, се ова што се случуваше во Италија не е случајно, бидејќи е резултат на напорната работа од 2006 година. Успехот е заеднички, бидејќи преку работата се направи една природна селекција на квалитетните уметници чиј што дострел беше ова нивно гостување,“ изјави Киро Павлов уметничкиот директор на Балетот кој го најави своето повлекување од оваа функција во Балетот. Тој се враќа на неговото место истакнат солист, но исто така ќе работи и како репетитор и педагог за мастер- класовите во Академијата од Милано.„Пред четири години започнавме со програмска цел да создадеме репертоар со кој ќе го подигнеме квалитетот балетските уметници во државата, но и ќе можеме да се претставиме надвор. Ние ја исполнивме целта. Направивме одличен репертоар и создадовме уметници кои на најдобар можен начин ја претставија културата. Се претставивме во врвни театарски куќи каде што настапувале многу познати уметници пред нас. Нашите првенци се претставија на највисоко професионално ниво. За тоа говорат аплаузите, овациите и поканите за повторните гостувања. Сите сали беа полни, а најголема потврда за тоа дека сме ја постигнале целта е што публиката во Рим тропаше со нозе од задоволство,“ изјави Тања Вујисиќ-Тодоровска главен педагог, репетитор и менаџер во МОБ.Првенците на Македонскиот балет, Ивана Коцевска, Мими Поп-Алексова, Марија Кичевска, Дмитро Чеботар и Бобан Ковачевски не го криеја своето задоволство од настапите во Италија и за сите нив ова претставува драгоцено искуство кое придонело за подигнување на нивните уметнички квалитети.„Бев пресреќна што настапував со моите колеги со кои неизмерно се поддржувавме и кога ни беше најтешко. Турнејата ни помогна да сфатиме дека можеме да направиме многу и да успееме. Подобро се запознавме меѓусебе што сигурно ќе придонесе за подобрување на квалитетот на играта, но и да го зголемиме нашето сопствено ниво.“ изјави Ивана Коцевска. „Најмногу што ми остана во сеќавање е кога игравме во театарот во Рим, една госпоѓа во првите редови клечеше на колена и не стана се дури не ја погледнав и лично и се поклонив. Овациите и воодушевувањето од публиката не можат да се опишат. Сум настапувала и во други познати театри, но ова го немам доживеано,“ изјави Марија Кичевска која по европската балетска кариера ќе биде дел од тимот на македонскиот Балет. Она што се подготвува во Балетот се априлските балетски вечери и подготовките околу овој настан што ќе се одржува за првпат се речиси завршени. Досегашниот уметнички директор на Балетот Киро Павлов им врачи благодарници на Тања Вујисиќ-Тодоровска и Горан Божинов за нивните придонеси како репетитори и педагози, а тој добри благодарница од директорот на МОБ, Дејан Прошев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.