Култура
Симон Трпчески: Уметниците се најголеми амбасадори на своите држави
Познатиот македонскиот пијанист Симон Трпчески се наоѓа на северно-американска турнеја од почетокот на февруари која ја започна во Сиетл, продолжи со својот прв рецитал во главниот град Вашингтон, во престижниот Центар Џон Кенеди, а оттука замина за Ванкувер, Канада
Настапите на Симон Трпечски на овој континент ќе ги заврши во познатата симфониска сала „Волт Дизни“ Лос Анџелес, следниот месец.Пред вашингтонската публика во Центарот „Кенеди„ се претстави со соната во це-мол од Јозеф Хајдн, со дела од Шопен и од македонскиот композитор Панде Шахов. „Најважно е човек професионално да си ја извршува својата работа. Јас тоа го правам на највисоко можно ниво. Во мојата професија нема импровизација и го правам тоа со огромна љубов. Еден комплимент што го добив во Сиетл е дека јас водам љубов со пијаното, и тоа кажува се`. Мислам дека ние уметниците сме најголеми амбасадори на своите држави“, вели маестро Симон Трпчески. Три вечери по ред во салата Дејвис симфони, во Сан Франциско, Трпчески ќе биде солист во изведбата на Концертот за пијано и оркестар од Григ, со Симфонискиот оркестар на Сан Франциско, под диригентската палка на Василиј Петренко.На нашата забелешка дека според познавачите – еднаш славен е засекогаш славен, пијанистот Трпчески вака реагираше: „Кога бев многу помал дадов интервју за Вечер. Насловот на текстот беше „Врвот ми е цел“. Се разбира дека врвот е многу релативна работа. До одреден момент во кариерата велат – ти работиш за името, а потоа тоа работи за тебе. Но, ти треба да работиш за себе и, како што велат, за самата музика. Јас нема да дозволам славата да работи за мене. Многу е потешко да одржиш едно ниво што си го достигнал отколку да го достигнеш тоа ниво“, вели Трпчески. На 16-ти април концертната серија продолжува со три настапи во престижната сала на Волт Дизни, во „Градот на ангелите“. Зад диригентскиот пулт на Филхармонискиот оркестар на Лос Анџелес ќе застане Јаап Ван Сведен, а на програма е Првиот концерт за пијано и оркестар на Рахманинов.Чудото од Македонија или виртуозот по пијано, како што го нарекуваат овдешните критичари е 35- ти пат во САД. И не запира тука. Најави дека во октомври на репортоарот во Центарот Џон Кенеди ќе има самостоен рецитал со вашингтонската симфонија. За САД вели дека се држава која знае да ги награди и поддржи квалитетните уметници и за возврат, тој лично, вели, секогаш вложува максимум енергија и посветеност.До крајот на следниот месец следат и три концертни вечери во Хјустон, пред да замине за Европа за двата концерта со Стразбуршкиот филхармониски оркестар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.