Култура
Исус Христос во очите на Рембрант
Во познатиот француски музеј „Лувр“ отворена е изложбата „Рембрант и личноста на Исус“, на која се претставени обидите на холандскиот сликар да побегне од класичното претставување на Исус Христос и да го претстави на нов начин
Во познатиот француски музеј „Лувр“ отворена е изложбата „Рембрант и личноста на Исус“, на која се претставени обидите на холандскиот сликар да побегне од класичното претставување на Исус Христос и да го претстави на нов начин, пренесуваат медиумите.Историчарите на уметноста, во текот на 20-тите години на 20-тиот век, меѓу уметничките дела на Рембрант пронашле слика со писменце на кое пишувало: „Слика на Исус Христос, таков како што тој навистина изгледал“, но, не посветиле големо внимание на напишаниот текст.„Пронаоѓајќи ја сликата во архивата на музејот дојдовме до идеја да поставиме изложба и со слики да се обидеме да одговориме на прашањата „Како навистина изгледал Исус Христос?“ и „Како воопшто било можно да се нацрта?“ – изјавил Блез Дуко, еден од организаторите на изложбата и кустос во одделението за фламански и холандски сликари во „Лувр“.„Контактиравме со музеите за уметност во Филаделфија и во Детроит и собравме стотина слики, во најголемиот број од Рембрант, но и од неговите ученици и современици. Сите тие во текот на својот живот трагале по вистинскиот изглед на Исус Христос“ – објаснил кустосот.Изложбата ја „отвора“ Рембрантовата слика „Аџиите во Емаус“, која тој ја насликал во 23-тата година од својот живот. На сликата е прикажан само профилот на Исус, додека од заднината се шири светлина.„Тоа е само почетокот на мистеријата. На некој начин Рембрант ни „порачува“ што ќе следува понатаму, а тоа е потрагата по вистинскиот изглед на Исус Христос“ – изјавил Дуко.Делумно, одговорот се наоѓа во соседната просторија, во која е поставена слика со распнатиот Христос создадена во 1661 година. На сликата е претставен човек на чие лице се гледаат страдање, болка и мачеништво.Слаб и неисхранет, вистинска спротивност на Христос кој го прикажуваат претходниците на Рембрант, како Рубенс, кој го претстави Исус како атлетски граден човек со боженствена убавина, дури и во мигот на смртта.Најзначајниот дел од изложбата се сликите кои ги прикажуваат портретите на Исус, каде Исус е понизен, сочувствителен, загрозен и неодлучен. Како модел на Рембрант му позирал еден Евреин на кој не му се знаат ниту името, ниту годините, ниту професијата. Се знае само дека живеел во еврејскиот кварт во Амстердам, исто како и самиот сликар.Блез Дуко верува дека токму на тој млад човек со брада и со долга коса се однесува писменцето во кое пишува дека тоа е вистинскиот изглед на Исус Христос, писменце кое толку многу ги збунило историчарите на уметноста.Изложбата во „Лувр“ ќе биде отворена до 18 јули годинава./крај/танјуг/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).