Култура
Отворен 4-от Фестивал на француски филм во Охрид
Со проекција на филмот „Анонимни емотивци“ на режисерот Жан-Пјер Америс, синоќа во Центарот за култура „Григор Прличев“, започна 4-то издание на Фестивалот на францускиот филм во Охрид.
Со проекција на филмот „Анонимни емотивци“ на режисерот Жан-Пјер Америс, синоќа во Центарот за култура „Григор Прличев“, започна 4-то издание на Фестивалот на францускиот филм во Охрид.
„Четвртото по ред издание на оваа престижна филмска манифестација ќе понуди свежи и несекојдневни филмски остварувања, кои ќе значат едно освежување на македонската филмска сцена и ќе бидат на огромно задоволство на вљубениците во филмската уметност“, истакна Дарко Стефановски, државен секретар за култура кој го отвори Фестивалот.
На проекцијата на филмот „Анонимни емотивци“ присуствуваше режисерот Жан-Пјер Америс , кој рече дека првпат е во Охрид и е мошне среќен што може лично да и’ го претстави своето последно филмско остварување на македонската публика.
„Филмот е комедија, очекувам да ја насмее публиката. Инспирацијата за филмот ми беа луѓето кои немаат доверба во себе. Дел од сценариото има автобиографски елементи, така што се надевам дека филмот ќе им помогне на оние што ќе го изгледаат да ја повратат изгубената самодоверба“, изјави режисерот Америс.
Годинава на црвениот тепих пред Центарот за култура „Григор Прличев“ во Охрид ќе продефилираат познати имиња на француската кинематографија.
„Нашиот фестивал е можеби единствен не само во Македонија, туку и пошироко на Балканот каде публиката секоја од фестивалските вечери ќе има можност да се сретне со некој од главните актери, режисери или сценаристи на филмовите што се на програмата“, рече Зоран Велјаноски Летра, извршен директор на Фестивалот.
Фестивалот има натпреварувачки карактер, а изборот на најдоброто филмско остварување, за најдобра машка и женска улога ќе го врши тричлено жири предвоено од македонскиот режисер Антонио Митриќески.
„Минатите изданија на фестивалот понудија навистина добри филмови. Франција е кинематографија што произведува над 270 филмови годишно. За ова фестивалско издание се избрани седум најдобри филмови, од кои дел се наградувани во Кан. Не сум изгледал ниту еден од филмовите“, така што останува сконцентирано да ги изгледаме, рече Митриќески.
На Фестивалот на францускиот филм во Охрид, кој се одржува во организација на Францускиот културен центар во Скопје, со поддршка на Министерството за култура на РМ, Филмскиот фонд, Градот Охрид, регионот Долна Нормандија, Универзитетот ЕСРА, како и повеќе познати француски компании во Македонија, ќе бидат прикажани десетина филмски остварувања на француската кинематографија. /крај/охрид.њуз
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.