Култура
Галичко културно лето
Со одржувањето на традиционалната Галичка свадба на 15 јули ќе започне манифестацијата „Галичко културно лето“.
Со одржувањето на традиционалната Галичка свадба на 15 јули ќе започне манифестацијата „Галичко културно лето“.„Покрај одржувањето на 47-та Галичка свадба, програмата на Галичкото културно лето го збогативме со повеќе настани“ – потенцираше Митре Ажиевски, претседател на МЗ Галичник, на денешната прес-конференција на која беа објавени деталите од програмата на Галичкото лето.Првиот настан во програмата ќе биде Ликовна колонија, која ќе се одржи од 15 до 17 јули. Со проектот „Роднокрајниот пејзаж на Личеноски“, во кој ќе учествуваат ликовните уметници Симонида Филипова Китановска, Соња Димовска, Илина Петрушевска, Кристијан Санев и Атанас Ботев, ликовната колонија ќе го одбележи јубилејот – 110 години од раѓањето на еден од основоположниците на македонската модерна ликовна уметност Лазар Личеноски. На денот на одржувањето на Галичката свадба, учесниците во колонијата ќе изработат едно заедничко дело кое ќе биде изложено пред сватовите и гостите присутни на свадбата.На 16 јули во Галичник ќе се одржат уште два културни сегмента од програмата на Галичкото лето. Националната галерија на Македонија ќе ја организира изложбата „110 години од раѓањето на Лазар Личеноски“, која ќе биде поставена во просториите на МЗ Галичник. Истиот ден на платото под црквата „Св. Петар и Павле“ ќе биде поставена биста на Ѓорѓија Пулески. Организатори на настанот се Музеи на Македонија и Минчо Јорданов, кои едновремено се и донатори на бистата.На бачилото „Смрдливи води“, кое се наоѓа на патот кон селото Галичник, на 16 јули ќе се одржи манифестацијата „Денови на овчарството“. Домаќин на манифестацијата е „Вардар ОЗ Градско“, која традиционално организира претставување на голем број земјоделски претпријатија кои се бават со овчарството, а во текот на денот се организираат и натпревари во стрижење овци, борби на пеливани и трка со коњи.Одржувањето на традиционалната Галичка свадба ќе започне на 16 јули во 19 часот со китење, редење на бајракот и фрлање пушка. Согласно традицијата, Свадбата има утврден тек во два дена.„Редоследот на програмските активности на свадбата во однос на претходните изданија има две промени кои се направени со цел сите случувања повеќе да се приближат до гостите. Првата промена се однесува на локацијата на куќата на невестата, која по желба на младенците, ќе биде куќата во која живеат во Галичник. Втората промена се однесува на локацијата за изведување на чинот „Канење на мртвите“. Годинава место на селските гробишта, зетот и сватовите ритуалот ќе го извршат пред старата црква „Света Петка“ во Галичник. Оваа локација се наоѓа на пократка оддалеченост од претходната, со што би се добило повеќе време за другите ритуали во текот на одржувањето на свадбата“, објасни Велимир Граоркоски, режисер на Галичката свадба.Од оваа година локациите, маршрутата и термините на изведување на поединечните чинови на Галичка свадба ќе бидат претставени на мапа, која е достапна на Интернет на сајтот www.galichnikwedding.mk.Годинашни зет и невеста на Галичката свадба се Љупчо Раваноски и Верица Митричка. Зетот и по татко и по мајка потекнува во Галичник и досега повеќе пати учествувал во организацијата на свадбата. Верица Митричка по потекло е од Куманово, но неколкупати досега учествувала како бајрактарица, а годинава има чест да биде невеста на Галичката свадба. Младите веќе седум години се заедно, а годинава им е исполни желбата да бидат зет и невеста на Галичката свадба. Свадбата ќе се одржи на 16 и 17 јули.Програмата на Галичко културно лето ќе има уште четири активности. Книжевната колонија ќе се одржи од 5 до 7 август, Галичката ликовна колонија ќе почне на 15 август, верскиот празник Преображение ќе се слави на 18 август, додека на 20 и 21 август МЗ Галичник ќе организира турнир во табла со учесници од цела Македонија./крај/макфакс/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).