Култура
„Кристалниот глубус“ на „Панкот не е мртов“ пристигна во Скопје
Веднаш по пристигнувањето во Скопје, режисерот Владимир Блажевски и продуцентот Дарко Попов остварија средба со новинарите по повод добивањето на наградата „Кристален глобус“
Филмот „Панкот не е мртов“ на 46-тиот Меѓународен филмски фестивал во Карлови Вари ја доби наградата „Кристален глобус“ во конкуренцијата „Источно од Запад“. Станува збор за фестивал од А-категорија во ранг на фестивалите во Кан, Берлин, Венеција, Локарно и Ротердам.„Радува фактот што филмот го почна својот интернационален живот на најубав можен начин за нас. Се надевам дека сега ќе го чекаат уште доста патувања и презентации и би сакал тоа да биде на сличен начин како што беше во Карлови Вари. Она што мене ми е најбитно е што филмот доби едно многу пријатно и многу зачудувачко препознавање од публиката на фестивалот“, изјави Владимир Блажевски, режисер на „Панкот не е мртов“, на прес-конференцијата во понеделникот во Филмскиот фонд на Македонија.На фестивалот во Карлови Вари биле прикажани 199 филмски остварувања, за кои биле продадени 126.302 влезници, а го следеле 649 акредитирани новинари и 814 филмски професионалци. Со фактот што стана добитник на награда, овие податоци ја навестуваат можната идна траекторија на прикажување на македонскиот филм.„Во текот на следните два месеца филмот веќе е поканет на фестивалот во Палич, потоа ќе го прикажеме во две селекции на фестивалот во Мотовун. Ќе следуваат проекциите во Херцег Нови, а за наесен ќе одиме на фестивалите во Солун, Котбус и Хихон“, објасни Дарко Попов, продуцент на филмот.Со оглед на фактот што филмот е снимен со мал буџет, дотолку повеќе изненади добивањето на награда на врвен филмски фестивал.„Тоа што филмот го правевме во герилски и голтарски услови не значи дека не бевме амбициозни, упорни и трпеливи. Иако филмот е снимен со малку пари, сепак, се задржани сите еснафски елементи“, потенцираше Блажевски.Реакциите на публиката на фестивалот биле искрени и, на моменти, дури и френетични.„Моите искуства од разговорите со публиката по проекцијата на филмот се дека ги препознаа сите димензии на филмот кои не се истакнати само во првиот план, значи не се само следење на голата приказна, туку ги препознаа и резовите со значење, и задкулисните слоеви на смислата што нашиот филм ги носи во себе. Тоа посебно ме израдува, бидејќи филмот е правен така што навидум изгледа поедноставно и попитко за следење, а сите други работи кои се појавуваат во втор или трет план, произлегуваат од целината. Токму таа глобална слика, каде што се препознаваат и локалните проблеми во филмот, и социјалните, транзициските, политичките, економските и психолошките моменти кои се дел од нашето општествено милје, публиката ги прочита и ги прими многу точно и многу убаво“, објасни Блажевски.Режисерот Блажевски нагласи дека наградата што филмот ја доби во Карлови Вари е заедничка награда на целата филмска екипа, која вложи многу енергија, време и ентузијазам во реализацијата на „Панкот не е мртов“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).