Култура
Свечено отворено „Охридско лето“
Со проектот „Трилогија Романа“ синоќа во Античкиот театар беше отворено 51-то издание на „Охридско лето“.
Со проектот „Трилогија Романа“ синоќа во Античкиот театар беше отворено 51-то издание на „Охридско лето“.Фестивалот „Охридско лето“ секоја година се одржува под покровителство на Претседателот на Република Македонија. Во својство на покровител, но и на домаќин на претседателите на Република Албанија и Република Црна Гора, Бамир Топи и Филип Вујановиќ, кои беа присутни на отворањето, македонскиот претседател Ѓорге Иванов се обрати пред присутната публика.„Вистинска чест и задоволство е да се биде покровител на Фестивалот кој континуирано ја промовира врвната европска и светска уметност во древниот Охрид, истовремено, афирмирајќи ја македонската култура и македонските уметници во Европа и во светот. Задоволството е дотолку поголемо, бидејќи годинава токму во Охрид сум домаќин на третиот Регионален претседателски самит кој ги потврдува нашите заложби за споделување, соработка и заедништво на патот кон нашата европска иднина. Верувам дека во таа решителност имаме и верен сојузник – културата, уметноста и музиката како универзален јазик на човештвото“ – рече Ѓорге Иванов, претседател на Република Македонија.Со зборовите на де ла Мартин, дека „музиката започнува онаму каде што завршува говорот“, македонскиот претседател го прогласи годинашното издание на „Охридско лето“ за отворено.На денот на отворањето на Фестивалот и македонските уметници испраќаат порака до светот. Пораката ја пренесе актерот Петар Темелковски.„Да се биде уметник значи да се биде почитувач на минатото, чинител на сегашноста и сонувач на иднината. Македонската уметност во своето долго паметење, во своето повеќемилениумско суштествување секогаш имала светла точка од која се излачувале спектакуларни знакови во форма на свидетели за вечноста на времето. Таква светла точка што го означува новото време и ни го предава од година во година, од генерација на генерација, да го чуваме и да го надградуваме, како доблест, како аманет и како одговорност, е и овој фестивал, што веќе израсна во духовна престолнина на светот, фестивал кој повеќе од половина век испраќа силна и јасна порака, дека културата на народите, на сите народи, треба да биде човекољубиво послание испишано со чисто срце, со блага душа и со прекрасен ум“, е пораката која во име на македонските уметници ја испрати Петар Темелковски.На отворањето на фестивалот беше изведен проектот „Трилогија Романа“ по музика на Оторино Респиги. Станува збор за продукција на познатата куќа „Ла Фура дел Баус“ од Барцелона, Шпанија, реализирана во копродукција со „Палау де лес Артес“ од Валенсија, Шпанија, и „Опера ди Рома“ од Рим, Италија.На сцената на Античкиот театар во Охрид, проектот беше реализиран со 96 музичари од Македонската филхармонија под диригентската палка на маестро Андреас С. Вајзер.Иако беше најавен како спектакл, сепак, синоќешната изведба на делото повеќе беше симфониски концерт проследен со уметничко видео кое ја следи музичката изведба.Треба да се нагласи извонредната изведба на прекрасната музика на Респиги од страна на оркестарот на Македонската филхармонија, и прецизното диригентско мајсторство на гостинот од Германија Андреас С. Вајзер. Покрај високите уметнички и естетски вредности на визуелниот дел во проектот, сепак, да се достигне димензијата на спектакл, во Античкиот театар недостигаше вистински перформанс на танчери на сцената.Фестивалот „Охридско лето“ продолжува со драмската програма. Денес, на сцената во предворјето на црквата Света Софија, ќе биде изведена претставата „geNOcide“, по текст на Љубиша Георгиевски, во режија на Владлен Александров од Бугарија, а во продукција на Драмскиот театар од Скопје./крај/макфакс/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).