Култура
Наградата „Денес 2011“ за Илија Прокопиев
Годишната награда за млад ликовен уметник „Денес 2011“ синоќа во Музејот на град Скопје му беше доделена на Илија Прокопиев.
Годишната награда за млад ликовен уметник „Денес 2011“ синоќа во Музејот на град Скопје му беше доделена на Илија Прокопиев.Центарот за современи уметности – Скопје, во соработка со Фондацијата за граѓанско општество од Њујорк веќе традиционално ја реализира Годишната награда за најдобар млад ликовен уметник во Република Македонија до 35 години. Наградата е насловена „Денес“, по еминентната македонска ликовна група од шеесеттите години.Право на аплицирање за учество на конкурсот имаа сите уметници на возраст до 35 години коишто оствариле самостојна изложба во 2010 година во Република Македонија.По доставување на апликациите од страна на уметниците и разгледување на истите, жирито во состав: Исмет Рамиќевиќ, уметник, Кристина Божурска, уметник, и Лазо Плавевски, историчар на уметност, како финалисти кои рамноправно учествуваа на годинашната изложба ги селектираше уметниците Ели Аиноска – Христовска, Илија Прокопиев, Благојче Наумоски – Бане и Филип Јовановски.Со одлука на жирито, наградата „Денес 2011“ ја доби Илија Прокопиев со делото „Студии за многу големи цртежи“.„Мојот мотив да се пријавам на конкурсот беше тоа што откако ја направив изложбата почувствував дека истата можеби треба да продолжи некако поинаку да живее и конкурсот за наградата „Денес“ беше вистинска шанса за тоа. На конкурсот учествував со дела кои беа изложени на мојата самостојна изложба, додека неколку дела се изработени по изложбата“, изјави Илија Прокопиев, откако дозна дека е добитник на наградата.„Секој потајно се надеваше дека ќе ја добие наградата. Се надевав и јас. Наградата „Денес“ и престојот во Њујорк што го обезбедува, пред сѐ, е голема мотивација, а Њујорк за секој млад уметник е големо искуство. Мојот престој таму ќе се обидам да го искористам на најдобар можен начин, со учење, средби и стекнување контакти и со посета на најзначајните светски музеи“, изјави Илија Прокопиев, за Макфакс.Уметникот Илија Прокопиев е роден во Скопје. Дипломирал на Факултетот за ликовни уметности во Скопје, на сликарскиот оддел во класата на Антони Мазневски, 2008 година. Досега, на публиката и се претставил со три самостојни изложби, во Културниот центар Е-Werk, Фрајбург, Германија, Културниот центар ЦК и во Отворено графичко студио, Скопје. Има учествувано и на повеќе групни изложби и проекти во земјата и во странство. Се појавува и како илустратор на книги, а како постдипломец на Интердисциплинарните културолошки студии во Скопје при Институтот за македонска литература пишува и објавува текстови од областа на културата и ликовната уметност.Почнувајќи од 2003 година Центарот за современи уметности – Скопје ја организира изложбата на финалните кандидати од кои на еден автор му се доделува наградата која се состои од стипендија која ги покрива трошоците за пат и шестнеделен престој во Меѓународната куќа, асоцирана со Универзитетот во Колумбија, Њујорк. Стипендијата во целост ја покрива Фондацијата за граѓанско општество од Њујорк.Досегашни добитници на оваа престижна награда во Р. Македонија се Славица Јанешлиева (2003), Група ОПА (2004), Далибор Тренчевски (2005), Атанас Ботев (2006), Борис Петровски (2007), Ана Ивановска (2008) и Ѓорѓе Јовановиќ (2009), Кристина Божурска (2010) и Илија Прокопиев (2011).Партнери на проектот за реализирање на изложбата се Фондацијата за граѓанско општество од Њујорк, Фондација Институт отворено општество – Македонија и Музеј на град Скопје. Изложбата е финансиски поддржана од Град Скопје и Министерство за култура на Р. Македонија./крај/макфакс/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).