Култура
Доделени признанија за афирмацијата на СВП
Управниот одбор и Дирекцијата на Струшките вечери на поезијата со пригодна свеченост во МАНУ им додели Благодарници на поранешни директори, претседатели и членови на Управен одбор, личности и институции
Управниот одбор и Дирекцијата на Струшките вечери на поезијата со пригодна свеченост во МАНУ им додели Благодарници на поранешни директори, претседатели и членови на Управен одбор, личности и институции, кои имаат особен придонес во афирмацијата на најстарата поетска манифестација во државата.
„Пред официјалниот почеток на јубилејните 50-ти Струшки вечери на поезијата, со Благодарниците сакаме да им оддадеме признание на сите кои досега вложиле дел од својот професионален и креативен потенцијал во развојот и афирмацијата на поетската манифестација, која стана препознатлив белег на Струга и на Македонија низ сите меридијани во светот“, изјави Славе Ѓорѓо Димоски, актуелен претседател на Управниот одбор на СВП.
На свеченоста во МАНУ присуствуваа поранешни членови на Советот и на Управниот одбор на СВП или нивни претставници. Признанијата им ги врачи Данило Коцевски, директор на СВП.
Благодарници за афирмацијата на СВП добија Ацо Шопов, Коце Солунски, Милан Ѓурчинов, Анте Поповски, Славко Јаневски, Гане Тодоровски, Симон Дракул, Матеја Матевски, Благоја Иванов, Јован Котевски, Слободан Мицковиќ, Петар Т. Бошковски, Трајан Петровски, Веле Смилевски, Петре Бакевски, Атанас Вангелов, Паскал Гилевски, Братислав Ташковски, Зоран Анчевски и Илјаз Османи, како членови на Совет или Управен одбор на СВП.
Признанија добија и поранешните директори Петар Чакар, Јован Стрезовски, Богомил Ѓузел, Ефтим Клетников, Разме Кумбаровски и сегашниот директор Данило Коцевски.
Знак на внимание Дирекцијата на СВП изрази и кон придонесот на Елизабета Канческа-Милевска, министер за култура, и академик Луан Старова, како и на институциите Министерство за култура, МАНУ, НУБ „Св. Климент Охридски“, Друштвото на писателите на Македонија, Македонската радиотелевизија, Општина Струга, „Скопско лето“, ЕЛЕМ, амбасадата на САД, УНЕСКО и Град Скопје./крај/макфакс/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.