Култура
Шмекот на Берлин на годинешниот Фестивал на новиот германски филм во Скопје
Седмиот фестивал на новиот германски филм во Македонија ќе започне денеска со свеченото отварање во Киното Милениум во Скопје.
Седмиот фестивал на новиот германски филм во Македонија ќе започне денеска со свеченото отварање во Киното Милениум во Скопје.
Фестивалот во Скопје ќе трае до 17 октомври во чии рамки ќе бидат прикажани 12 филмови, а потоа филмовите ќе може да ги погледне публиката Тетово, Кавадарци, Струмица, Штип, Прилеп и Битола.
Со едноставно мото „Ich liebe Film“, Амбасадата на Германија во Скопје и нејзиниот партнер германската „ПроКредит Банка“ и нудат на македонската публика можност за неповторлива филмска авантура со современите германски филмски остварувања.
По свеченото отварање, филмските проекции продолжуваат во Кино Фросина, а покрај Скопје, уште шест града во Македонија со Фестивалот на Новиот Германски филм ќе имаат збогатен културен и филмски репертоар.
Претставникот на Културното аташе на Германија, Франк Штесел и претставник од Про Кредит Банка Билјана Северинова, пред почетокот на фестивалот изјавија:
„Особено ни е драго што Фестивалот на новиот германски филм прерасна во традиција, со која од година во година ја зацврстуваме македонско-германската културна соработка. Кинематографијата несомнено е значаен производ на една култура. Оваа година со Берлин како водечки мотив, богат репертоар од сите жанрови и со звучни имиња познатото Берлинале, ќе се обидеме да ги задоволиме од година во година растечките критериуми на македонските љубители на германскиот филм. Почетна точка е харизматичната и чувствителна траги-комедијата ‘Винсент сака море’, а гледачите може да очекуваат драма, комедија, научна фантастика, како и содржини за најмладите“, рече Франк Штесел, претставник на Културното аташе на Германија.
„ПроКредит Банка, како банка со доминантен германски капитал, традиционално седум години по ред заедно со германската Амбасада преку организирање на фестивалот придонесува во културното живеење на граѓаните на Република Македонија. И овојпат таа ветува германско културно филмско уживање“, дополни Билјaна Северинов, претставник на „ПроКредит Банка“.
Покрај премиерниот „Винсент сака море“ ќе следат „Кој ако не ние“, „Гете“, „Градот по тебе“, „Деновите што идат“, „Алманија, добредојдовте во Германија“, „Авантурата на Песочко во Сонавија“, „Малиот, голем Берлин“,„Нојкелн анлимитид“, „Трагата на мечките“, „60 години Берлинале“, „Светлата на Берлин“, „Берлин е во Германија“./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.