Култура
Комеморативна седница во чест на проф. м-р Милан Фирфов
Комеморативна седница во чест на музикологот Милан Фирфов, кој почина во саботата, ќе се одржи во среда во Концертната сала на Факултетот за музичка уметност при Универзитетот „Св. Кирил и Методиј“ во Скопје.
Во рамките на седницата, за животот и делото на Милан Фирфов ќе говори Деканот на УКИМ ФМУ проф. м-р Гордана Јосифова-Неделковска и ќе биде прикажан краток документарен филм за уметничката, педагошката и културната дејност на Милан Фирфов изработен од ИРАМ.Милан Фирфов е роден во 1943 година во Скопје во семејство на истакнатите музички уметници, етномузикологот и композитор Живко Фирфов и првенката на Македонската опера, сопранот Данка Фирфова. Завршил Педагошка академија во Скопје во 1963 година, на групата музичко воспитание, дипломирал на одделот за пијано (1969) во класата на Андреј Прегер, соло пеење (1970) во класата на Никола Цвејиќ и диригирање (1980) во класата на Душан Сковран и Станко Шепиќ , а магистрирал на одделот за соло пеење (1978) во класата на Зденка Зикова на Факултетот за музичка уметност во Белград. Како сестран уметник делувал во повеќе области: соло пеење, пијано, диригирање, музичка критика, педагогија и општествени дејности.Милан Фирфов бележи бројни настапи низ Македонија, Србија, Хрватска, Словенија, Шпанија и Холандија. Како солист баритон настапувал со Македонската филхармонија, Камерниот оркестар на Радио Телевизија Скопје, Детскиот хор „Пиколо“, Хорот на Факултетот за музичка уметност во Скопје, Нишкиот симфониски оркестар и ансамблот „Света Софија“. Соработувал со диригентите Фимчо Муратовски, Ангел Шурев, Александар Лековски, Тома Прошев, Димитрије Бужаровски, Томислав Шопов, Сандро Занинович и Маријан Фајдига. Најзначајните успеси како репродуктивен уметник Милан Фирфов ги остварува на полето на вокалните рецитали. Неговиот широк репертоар содржи стари мајстори, германски лид, француска соло песна, творештво на современите македонски композитори и останатите современи автори. Во 1972 година ја започнува соработката со музичкиот уметник Димитрије Бужаровски кој се јавува како негов пијано соработник на огромен број настапи. Како резултат на оваа соработка Бужаровски создава повеќе циклуси за глас и пијано чии први изведби ги доживуваат на концертите со Фирфов. Поголемиот дел од рециталниот пеачки репертоар на Фирфов е снимен во Музичката продукција на МРТ. Како диригент настапувал со Хорот на Операта при МНТ, Хорот на Музичката младина на Македонија, Хорот на Музичко-балетскиот училишен центар, Хорот „Мирче Ацев“, Хорот на Факултетот за музичка уметност во Скопје, Хорот на Македонската радио телевизија и на машкиот октет „Хорот на Ангелите“, ансамбл формиран од самиот Фирфов во црквата Св. Архангел Михаил во Скопје во 1993 година. Покрај ова, во повеќе наврати диригирал со Македонската филхармонија, како и со Нишкиот симфониски оркестар и Симфонискиот оркестар од Суботица. Тој е основоположник и диригент на камерниот оркестар „Музикум Академикум“ (1996-2000).Како оркестарски диригент соработувал со: Ги Туврон – труба, Франција, Рита Кинка – пијано, Србија, Ласло Варга – виолончело, Будимпешта, Благоја Ангеловски – труба, Михајло Докузов – хорна, Михајло Куфојанакис – виолина, Васил Атанасов – обоа, Живко Фирфов – виолончело, Милка Ефтимова – мецосопран, Марија Муратовска – сопран, Нина Среброва – пијано, Гордана Јосифова – обоа, Марија Малинова – флејта и други.Како оперски диригент, Милан Фирфов има реализирано над 40 изведби на „Шеќерната приказна” – музичката игра за деца од Димитрије Бужаровски, ја поставува и диригира „Приказна за штурецот и мравката” од Сотир Голабовски, а ја диригира и операта “Илинден” од Кирил Македонски.Првиот концертен настап Милан Фирфов го реализирал како пијанист во 1967 година на концерт организиран од Музичката младина на Македонија. Во 1970 година Фирфов настапил како пијано соработник на својата мајка, оперската певица Данка Фирфова, а како солист пијанист реализирал и снимки за Македонското радио.Во периодот од 1977 до 1981 Милан Фирфов се јавува како рецензент во весникот „Нова Македонија” каде има објавено 104 рецензии за музичките настани во Македонија.Милан Фирфов го проведува својот работен век во Факултетот за музичка уметност во Скопје од 1969 година до неговото пензионирање во 2005 гдоина, каде предава: пијано, свирење хорски партитури, свирење оркестарски партитури, хорско пеење и соло пеење. Тој е автор на Прирачникот за свирење хорски партитури во Це клучеви.Особено забележителна е неговата класа по соло пеење, во која се образувале Никола Китановски – тенор, Марјан Николовски – тенор, Магдалена Митевска – сопран, Билен Еминов – тенор, Александра Дукаетова – мецосопран, Лазар Стевановиќ – баритон, Ернест Ибраимовски – баритон, Марјан Стојановски – тенор и Марија Наумовска – сопран.Покрај ова Милан Фирфов бил професор и на Факултетот за драмска уметност во Скопје, МБУЦ “Илија Николовски Луј” и Факултетот за уметности во Приштина.Во текот на своето 40-годишно делување Милан Фирфов е и особено активен на општествен план остварувајќи повее функции во Музичката младина на Македонија, Здружението на музичките уметници на Македонија, Тетовските Хорски Одзиви, фестивалот Охридско лето, Македонскиот музички совет, Сенатот на Универзитетот „Св. Кирил и Методиј” и Факултетот за музичка уметност во Скопје.Милан Фирфов почина на 28 април 2012 година во Скопје. /крај/со/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).