Култура
Предавања до областа на кураторството во ГЕМ
На првата вечер од отворањето на симпозиумот Кураторски размени, во клубот ГЕМ, во среда навечер во 20 часот воведна презентација на тема Развој на кураторството и посредувањето во современата уметност, ќе одржи Дороти Рихтер.
Рихтер, инаку, е кураторка, теоретичарка и раководителка на постдипломските студии по кураторство на Institute Cultural Studies, Universtiy of Fine Arts, во Цирих.
Во рамки на нејзиното предавање таа се осврнува на развојот на кураторските практики и посредувачките стратегии во современата уметност преку поставување на три основни прашања во широк времски и теоретски контекст: „Кои сме? (во однос на кураторството и уметничкото посредување), Од каде доаѓаме? и Каде одиме?“
Дороти Рихтер била уметнички директор на Künstlerhaus во Бремен, Германија, каде курирала серија проекти, изложби, разговори и симпозиуми, кои, меѓу другото, ги истражуваат прашањата на социјално ангажирани практики, феминистичките позиции и уметнички колаборации денес. Има одржано низа предавања на Merz Akademie во Штутгарт, Универзитетот во Бремен, Critical Curatorial Cybermedia курс на Ecole des Beaux Arts, Женева и Универзитетот во Линебург. Од 1998 до 2009 година, таа е основач и координатор на Curating Degree Zero Archive. Во 2008 година го основала web-списанието www.on-curating.org.
Вечерната сесија ќе ја продолжи Марко Стаменковиќ кој со неговото излагање Оспорените и осудените, се осврнува на концептот на „самоубиствен бомбашки напад“ како на моќно присутен концепт во современиот свет, но и како на нешто со недоволно јасно значење во рамки на современиот дискурс. Преземениот ризик, со цел да се артикулира дискурсот околу формите на насилство идентификувани како „самоубиствен бомбашки напад“ го детектира како јасен пример за изложениот притисок при критичкото размислување – секогаш кога овој вид на дискурс однадвор е прифатен од доминантна, „нормативна“ гледна точка.
Марко Стаменковиќ е историчар на уметноста, критичар и куратор. Роден е во Врање (Србија) а сега живее во Гент (Белгија). Член е на ИКТ – Меѓународната асоцијација на куратори на современа уметност (Луксембург). Дипломирал на институтот за историја на уметност на Филозофскиот факултет во Белград. Магистрирал во областа на културна политика и културен менаџмент (УНЕСКО), на уметничкиот Универзитет во Белград, на интердисциплинарните студии акредитирани од страна на Универзитетот Лион 2. Докторант е на Факултетот за уметност и филозофија, на катедрата за филозофија и етика на Универзитетот во Гент – со докторска дисертација на тема: „Самоубиствени култури. Теории и практики на радикално повлекување – транснационална културна и медиумска парадигма (2001-2011)“.
Славчо Димитров дипломирал Општа и компаративна книжевност на Филолошкиот Факултет на УКИМ, а магистрирал на одделот за Родови студии и филозофија при Институтот Евро-Балкан на тема ‘Генеалошка деконструкција на исповедниот субјект: Етико-политички импликации“. Докторант е на одделот за Родови студии и филозофија, на Институтот Евро-Балкан, на тема ‘Реполитизација на телесноста’. Покрај истражувачкиот и предавачкиот ангажман и интерес, како и интересот кон хуманистичките теоретски колажи, Димитров е посветен на активизам за човекови права на маргинализираните заедници, со посебен фокус кон квир и феминистички активизам. Директор е и на Коалиција ‘Сексуални и здравствени права на маргинализираните заедници’, Скопје. Моментално работи како асистент предавач на последипломските Родови и културни студии при Институтот. Предметите на кои е ангажиран се од областа на културните теории, родовите студии, студии на маскулинизмот, квир теоријата, постколонијалната критика и телото и родот.
Неговото излагање на тема Емоционална архива на квир искуства го испитува потенцијалот кој овој вид на архивирање го има во оспорувањето на одредени хегемонистички режими на дистрибуција на видливоста и разбирање, односно-одредени режими на моќ./крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).