Култура
Македонска бура во „Животот на Пи”
Новото кино Cineplexx се отвора со ‟Животот на Пи”, филм кој ги помести границите во 3Д технологијата, во чија изработка учествуваше и тимот на ФХ3Х, работејќи на сцените од бурата.
Филмот е адаптација на мегахит романот на Јан Мартел со истоимениот наслов, изводлива единствено во изведба на режисерот Анг Ли кој досега двапати е наградуван со Оскар.
Според фaбулата на романот, во раните 70ти години, младиот Пи Пател и неговото семејство ја напуштаат Индија и заминуваат за Канада во потрага по нов почеток. Таткото на Пи е чувар во зоолошката градина, па тие патуваат со животните кои планираат да ги продадат за да створат капитал за својот нов почеток. Но по една страшна бура, бродот потонува и Пи одеднаш се наоѓа сам опколен со вода со раздразливиот тигар Ричард Паркер.
”Во поглед на технологијата употребена за визуелни ефекти, ‟Животот на Пи” е во врвот, бар од филмовите кои ќе излезат оваа година”, вели Кристијан Даниловски, извршен продуцент во ФХ3Х. ”Визуелно филмот е извонреден и претставува мало ремек дело во поглед на 3Д сликата. Во изработката на визуелните ефекти на овој филм, ФХ3Х учествуваше како дел од тимот на Technicolor MPC од Лондон со кои соработува од минатата година (Прометеј, Гневот на Титаните, Шерлок Холмс 2). Тимот на ФХ3Х работеше на овој проект кон крајот на 2011 и почетокот на 2012”, изјави Даниловски.
”Нашиот тим работеше на сцените кои што беа снимени во базен за бранови”, изјави Александар Вишемирски, супервизор на тимот кој работеше на овој проект. ”Интересно е да се напомене дека сите сцени на разбуркано море се снимани во затворено студио и нашиот тим работеше на отстранување и подготовка за додавање на елементи во кадрите, како би се постигнала максимална веродостојност. На сцените со бурата работеа 12 визуелни артисти од нашето студио, но сите со нетрпение чекаме да го видиме финалниот резултат бидејќи од она што се зборува во медиумите од нашата индустрија, станува збор за визуелен спектакл”, изјави Вишемирски.
Специфично за овој филм е самиот визуелен израз. Режисерот Анг Ли ни овозможува вистинско филмско доживување, во буквален смисол на зборот. Режисерот ја однел екипата на патување со брод сред бура каде имале прилика да доживеат од прва рака како изгледа бура со бранови над 3 метри. Ова искуство придонесува кон најголемиот квалитет на режисерот Ли: автентичност. Филмот ги поместува границите на 3Д технологијата, што е единствената причина што бил воопшто снимен. Филмовите кои се снимаат на вода се озлогласени дека секогаш го пробиваат рокот и буџетот. Згора не се, филмот немал ниедна звезда. Но откако Ли покажал предвизуелизација на сцените од бродоломот и аудицијата со Сурај, избран за ликот на Пи, менаџментот на Fox 2000 решиле да продолжат со проектот. Се надеваме ќе уживате во финалниот резултат. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Филмот на Цветановски со награда за најдобар филм во Калифорнија
„Бизнисот на задоволството“ на Гоце Цветановски ја доби наградата за најдобар долгометражен филм на „Риверсајд Филм фестивал“ во Калифорнија, САД.
Фестивалот којшто се одржа од 10 до 14 април, во своето 22-годишно постоење се залага за промоција на храбри филмови кои обработуваат општествени предизвици, но и говорат за смелоста на човековиот дух.
Цветановски го радува тоа што филмот по вторпат e наградeн во САД, откако минатиот месец беше прогласен за највпечатлив филм на 30. издание на „Седона интернешнал филм фестивал“ во Аризона.
„Калифорнија е центар на американската филмска индустрија, и секако дека како автор сум горд што добивме награда овде, и тоа во конкуренција со американски филмови со многу поголеми буџети. Едвај чекам да завршиме со оваа светска фестивалска турнеја и во септември да го презентираме пред нашата публика. Очекувам филмот да отвори теми за дискусија на повеќе нивоа, но пред се‘ сакам да го продолжиме трендот од последниве години, во кој на домашните гледачи им се враќа довербата и желбата да гледаат македонски филмови“, рече Цветановски.
„Бизнисот на задоволството“ досега доби осум награди на филмските фестивали низ светот, од кои пет се за најдобар долгометражен филм.
Филмот ја следи приказната на новинарка, која опседната со исчезнувањето на нејзината најдобра пријателка, подготвува тајна операција со цел да разоткрие мрежа за трговија со жени. Но, како што нејзините соучесници се приближуваат до шефот, ситуацијата излегува од контрола.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Филмот е снимен со поддршка на Агенцијата за филм.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.