Култура
Македонската култура пред австриската публика
Богата и разновидна културна програма преку која македонската култура ќе биде претставена пред австриската публика ќе се реализира годинава по повод одбележувањето на дваесетгодишнината од воспоставувањето на дипломатските односи со Република Австрија.
Годишнината од дведеценискиот континуитет на искрено пријателство и доверба помеѓу нашите две држави, ќе биде одбележана и со реализација на културни содржини преку кои австриската култура ќе биде претставена и во Република Македонија., соопшти Министерството за култура.
Македонската современа танцова естетика, во септември, пред австриската јавност ќе биде претставена преку изведбата на балетската претстава „14 часа”, за која музиката ја напиша Кирил Џајковски, а кореографијата и сценографското идејно решение се на Игор Киров. Во оваа современа балетска поставка во режија на Наташа Поплавска, настапуваат истакнати првенци од Македонската опера и балет, меѓу кои и примабалерината Александра Мијалкова, Васил Чичијашвили и други.
Драмскиот театар, во австриската престолнина Виена предвидено е да ја изведе претставата „2012 – Последните Македонци” по текст и режија на Сашо Миленковски, додека пак македонската современа ликовна сцена ќе биде претставена со изложбата на Музејот на современата уметност која содржи дела од македонски и австриски уметници.
Ова значајно ликовно претставување ќе биде проследено и со концерт на нашата реномирана пијанистка и амбасадор на културата во Австрија, Елена Мисиркова.
Пред извесен период, со одбележување на 10-годишнината од организирањето на Виенскиот бал, во Скопје започна и реализацијата на програмата за претставување на австриската култура во Република Македонија. Пред македонската јавност во Скопје, Битола и во Охрид во следниот период ќе бидат презентирани повеќе културни содржини преку кои на македонската публика ќе и биде доближена австриската современа културна сцена.
Предвидена е изложба на цртежи на Леополд Форстнер, како и групната изложба „Obsessions”, во чии рамки ќе бидат претставени дела од македонски и австриски современи автори. Во Скопје ќе се одржи предавање на австриската реномирана историчарка Лиза Фишер која ќе говори за психоаналитичарот Зигмунд Фројд.
Австриската музичка сцена ќе биде претставена преку концерт на двајца реномирани австриски изведувачи на оргули, а во повеќе градови во Македонија ќе биде изведена операта „Cosi fan tutte”.крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Филмот на Цветановски со награда за најдобар филм во Калифорнија
„Бизнисот на задоволството“ на Гоце Цветановски ја доби наградата за најдобар долгометражен филм на „Риверсајд Филм фестивал“ во Калифорнија, САД.
Фестивалот којшто се одржа од 10 до 14 април, во своето 22-годишно постоење се залага за промоција на храбри филмови кои обработуваат општествени предизвици, но и говорат за смелоста на човековиот дух.
Цветановски го радува тоа што филмот по вторпат e наградeн во САД, откако минатиот месец беше прогласен за највпечатлив филм на 30. издание на „Седона интернешнал филм фестивал“ во Аризона.
„Калифорнија е центар на американската филмска индустрија, и секако дека како автор сум горд што добивме награда овде, и тоа во конкуренција со американски филмови со многу поголеми буџети. Едвај чекам да завршиме со оваа светска фестивалска турнеја и во септември да го презентираме пред нашата публика. Очекувам филмот да отвори теми за дискусија на повеќе нивоа, но пред се‘ сакам да го продолжиме трендот од последниве години, во кој на домашните гледачи им се враќа довербата и желбата да гледаат македонски филмови“, рече Цветановски.
„Бизнисот на задоволството“ досега доби осум награди на филмските фестивали низ светот, од кои пет се за најдобар долгометражен филм.
Филмот ја следи приказната на новинарка, која опседната со исчезнувањето на нејзината најдобра пријателка, подготвува тајна операција со цел да разоткрие мрежа за трговија со жени. Но, како што нејзините соучесници се приближуваат до шефот, ситуацијата излегува од контрола.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Филмот е снимен со поддршка на Агенцијата за филм.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.