Филм
Златната палма на Кан за ‘Животот на Адел'
Француско-тунискиот режисер Абделатиф Кешиш е добитник на Златната палма на 66-то издание на Канскиот филмски фестивал за францускиот филм „Животот на Адел“ (La vie d’Adele).
Филмот „Живото на Адел. Дел 1 и 2“ (La vie d’Adele – Chapitre 1 & 2 со меѓународно име „Сината – најтоплата боја“) е сторија за страстната врска меѓу две млади жени и беше еден од најпровокативните филмови прикажани годинава во главната конкуренција, а во саботата ја освои и наградата на Меѓународната федерација на филмските критичари (FIPRESCI).
Публиката со долготраен аплауз ги поздрави актерките кои на сцената се појавија со насолзени очи, а како што забележуваат француските медиуми, ова е првпат Златната палма да се доделува на филм во кој отворено се третира хомосексуалноста, овојпат женската.
Главниот лик во филмот, 17-годишната Адел, ја толкува Едел Ексаркопулос, многу сака деца и посакува да стане учителка. Непосредно пред својот 18-ти роденден таа ја запознава Ема, ја толкува Леа Сејду, мистериозна девојка со светли коси, и се вљубува во неа. Филмот е направен според стрипот на Жули Моро „Синиот ангел“ од кој е подоцна направен анимираниот филм „Модрото е топла боја“ и содржи многу експлицитни сцени на секс. Многу скоро Франција го донесе законот за легализирање на истополовите бракови, меѓутоа политичкиот контекст на проблемите на хомосексуалната љубов, како што признава самиот Кешиш, не го возбудила, тој само сакал да прикаже „само љубовна приказна, којашто ги вклучува сите убавини на една врска“.
Кешиш наградата ѝ ја посвети на француската младина со којашто се запознавал во текот на подготовката на филмот.
„Имав прекрасна екипа во филмот. И јас ви благодарам на сите за оваа работа. И им благодарам на сите коишто ми помогнаа да го создадам овој филм“, изјави Кешиш забележувајќи дека неговиот филм е филм за слободата и заедничкиот живот. Режисерот, исто така, им посака на сите да љубат и да бидат слободни.
Добитник на Гран При на 66-от Кански фестивал на жирито коешто работеше под претседавање на славниот режисер Стивен Спилберг е филмот „Внатре во Левин Дејвис“ (Inside Llewyn Davis) на браќата Жоел и Итан Коен со Џастин Тимберлејк и Кери Малиган, посветен на њујоршката фолк сцена од 1960-те. Од името на режисерите наградата ја прими актерот Оскар Ајсак кој настапи во филмот за фолк пејачот кој се обидува да се пробие на сцената.
За најдобар режисер е прогласен најмладиот учесник во главната конкуренција, Мексиканецот Амат Ескаланте, кој сними социјална драма за животот во мексиканската провинција – „Ели“ (Heli).
За автор на најдоброто сценарио наградата ја доби Кинезот Џи Чжанк за филмот „Допир на гревот“ (Tian zhu ding – A Touch of Sin) во кој покрај работата на сценариото се јавува и како режисер.
Наградата на жирито на годинешниот фестивал во Кан ѝ припадна на јапонската мелодрама „Каков татко, твој син“ (Soshite chichi ni naru – Tel pere, ton fils) на режисерот Хирокадзу Корееда.
За најдобра актерка е прогласена Французинката Беренис Бежо која се појави во семејната драма на Иранецот Асгар Фархади „Минато“ (Le Passe). Најдобар актер, пак, е 76-одишниот Брус Дерн за ролја на пргавиот старец Вуди Грант кој решил на лотарија да освои милионска премија во црно-белиот филм од ткн жанр роуд-муви „Небраска“ во режија на Александар Пејн. Дерн, кој има работено и со славниот Алфред Хичкок, изјави дека со работата на филмот на Пејн решил да стави крај на својата актерска кариера.
Главната награда за краткометражен филм ја доби корејскиот „Safe“ на режисерот Мун Бонг-Гон. За најдобар дебитантски филм е прогласен „Ilo Ilo“ на сингапурскиот режисер Антони Чен, кој ја раскажува сторијата за односите во едно сингапурско семејство. Филмот учествуваше и во паралелната секција на фестивалот „Две седмици на режисерите“.
Во петокот првата награда во конкуренција на студентски краткометражни филмови Cinefondation на 66-от Кански филмски фестивал му припадна на американскиот филм „Игла“ на студентката на Чикашката школа за примената уметност (The School of the Art Institute of Chicago) Анахита Жазвинизаден.
Канскиот филмски фестивал годинава се одржуваше од 15-ти до 26-ти мај. Во жирито под раководство на Спилберг, на 66-то издание на еден од најпрестижните и најгламурозни фестивали, беа и режисерите Анг Ли, Кристиан Мунџиу, Намои Каваси, сценаристката Лин Ремзи и актерките Видија Балан, Даниел Отоји, Никол Кидман и Кристоф Валц./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.
Филм
Утре се отвора четвртиот Фестивал на грчки филм
Утре, на 7 април 2024 година, во 20 часот, во Кинотеката на Северна Македонија (Никола Русински 1, Скопје 1000) ќе биде отворено четвртото издание на Фестивалот на грчки филм. На отворањето ќе биде прикажан кусометражниот филм „Тишината на рибата кога умира“ на Василис Кекатос (2019, 19′), а потоа долгометражниот филм „Не би сакал да сум непристоен, но треба сериозно да разговараме“ на Јоргос Георгопулос (2019, 99′).
Ова се две црни комедии во кои што идејата за смртта се прикажува со доза на хумор. Филмот „Тишината на рибата кога умира“ учествуваше на некои од најважните фестивали како Sundance, а Василис Кекатос е еден од најважните претставници на кусометражните филмови со многу награди, вклучително и Златна палма во Кан.
Фестивалот е во ко-организација на Амбасадата на Грција во Скопје и Меѓународниот филмски фестивал Киненова спонзориран од фирмите Armos Balkan и Mermeren.
Влезот е бесплатен.
Култура
Во февруари 50-годишен јубилеј на Кинотека: Старите вредности во нови контексти
Пред 5 децении е формирана македонската кинотека. Честитки за сето она што досега го направила оваа значајна културна установа. Една од основните дејности на филмскава институција е да го прикаже сето она што го има, и ново и старо; ова второто во нови контексти и изданија. Тоа ќе биде карактеристика на програмата на најкусиот месев во годината – февруари. Календарски, ќе трае 29 дена. Ете можност да се види сето она што кинотеката го подготвила за февруарските денови.
Ќе се стартува со премиерна проекција. Со филм кој има наслов СЛОБОДА. Тоа е краткометражен филм во омнибус формат, чијшто автор е филмскиот критичар Златко Ѓелески. Веднаш потоа враќање децении наназад. Ќе бидат проектирани неколку архивски филмски записи од 1912 до 1952. Тоа се дел од новопримените кино-материјали што кинотеката ги прибра во текот на изминатата година.
Кинотека се решила, враќајќи се децении наназад, да потсети на филмовите создадени во 40-тите, 50-тите, 60-тите, 80-тите, 90-тите и 2000-тите. Режисерите се од различни земји – Италија, Франција, Германија, Шведска, САД. Ставени се во различни контексти, во нови програми. Всушност, станува збор за циклуси на Великаните на фестивалот на филмската камера БРАЌА МАНАКИ и пократок цилкус филмови на францускиот режисер на т.н. француски нов бран Луј Мал.
Во исклучително богатата кинотечна понуда се и неколку филмови на чехословачкиот режисер, оскаровецот Јан Кадар.
Она што е многу интересно, многу потребно за да се знае и запамети, се петте документарни македонски филмови со етнолошка содржина. Во нив е забележана традицијата, обработени се народни и религиозни обичаи од средината на 20-тиот век. Во четири од нив Вера Кличкова, пионерот на етнолошкиот филм кај нас, е сценарист, режисер или консултант.
Филмофилите ќе бидат почестени да го видат сигурно еден од најозборуваните лански филмови – НАПОЛЕОН на Ридли Скот. Во различните оценки за филмот доминираат, што е сосема разбирливо, Англичаните и Французите. Едните го фалат, другите го кудат. Критиките за најновата продукција на Скот се поделени, но не смее да се изостави фактот дека, и покрај одредени пропусти, станува збор за прецизно сработен биопик. Дело кое функционира на неколку нивоа – како биографска сторија, историска рекреација, но и омаж кон еден од омилените филмови на Ридли Скот – Бари Линдон од 1975, по сценарио и режија на Стенли Кјубрик.
Уште една филмска творба којашто предизвика интерес и претежно позитивни рецензии – УБИЈЦИ НА ЦВЕТНАТА МЕСЕЧИНА на Мартин Скорсезе– ќе биде проектирана во кино салата на Кинотека месецов.
Во финалето на месецов, ќе погледнеме два филма со музичка содржина. Познатиот ТОМИ, рок операта на Кен Расел, ќе биде прикажана на оригинална 35 милиметарска лента. Новитетот е музичкиот документарец за екс ју панк легендите Панкрти. Специјален гостин на кинотеката тие денови ќе биде фронтменот на групата, Перо Ловшин.
Февруари е можеби календарски пократок месец , но затоа ќе биде исполнет со исклучително богата кино-програма.