Филм
Со филмот „Heil Caesar“ на браќата Коен започна 66-то Берлинале
Со проекцијата на филмот на режисерско-продуцентскиот тандем на браќата Џоел и Итан Коен – „Да живее Цезар“ (Heil Caesar), во четвртокот вечерта во германската престолнина Берлин беше отворено 66-то издание на Филмскиот фестивал попознат како Берлинале.
Фестивалот за отворен го прогласија претседателката на годинешното фестивалско жири, американската актерска легенда Мерил Стрип, кон која во Германија се однесуваат со особен пиетет, и директорот на Берлиналето, Дитер Кослик.
Претходно на публиката и многубројните ѕвезди од филмскиот свет им се обратија германската државна секретарка за култура Моника Грутерс и градоначалникот на Берлин, Михаел Милер, кои предупредија на актуелната мигрантска криза, во контекстот на годинешното мото на Берлиналето – „Право на среќа“.
Претходно во четвртокот беше најавено дека главниот протагонист на филмот „Heil Caesar“, Џорџ Клуни, во текот на фестивалот ќе се сретне со германската канцеларка Ангела Меркел со која ќе разговараат за бегалската криза. „Сакам да видам што можеме заеднички да сториме“, изјави Клуни кој во досегашната кариера се истакна и со хуманитарни и социјални проекти.
Во филмот на браќата Коен, Џорџ Клуни го толкува ликот на холивудски актер од 1950-те кој славата ја стекнал со снимање историски спектакли, но среде снимањето на новиот филм е грабнат.
„Првото Берлинале се одржа во 1951 година, кога беше донесена Женевската конвенција за статусот на бегалците. Никој не зборува дека тоа е лесна задача. Но ѕидовите, бодликавата жица и наредбите да се пука, тоа се симболите коишто никогаш повеќе не смеат да тргнат од нашата земја“, изјави берлинскиот градоначалник Михаел Милер од сцената на Дворецот на Берлиналето на плоштадот што го носи името на легендарната актерка Марлен Дитрих, коешто беше директно пренесувано со превод на официјалната интернет страница на фестивалот.
Берлиналето, како што истакна Милер, „бил и останува фестивал на слободата“. „Тоа е силна порака, која треба моќно да делува деновиве“, додаде.
Постојаната последните години домаќинка на фестивалот, актерката Анке Енгелке, намерно на мешавина од англиски и германски ги покануваше актерите, актерките, режисерите и продуцентите во салата.
„Голема чест преставува да се биде денеска во градот кој го сака филмот, го сака софистицираниот провокативен филм…. Многу сум среќна што сум тука. Претставува вистинска привилегија да се биде во вакво жири“, изјави Мерил Стрип.
На прашањето на водителката како ќе гласа како претседателка на жирито, доколку за некој филм се изедначени гласовите, Стрип се пошегува велејќи дека тоа ќе зависи како кон неа се однесуваат авторите на филмовите. „Имам два гласа, бидете добри со мене“, порача актерката.
На годинешното Берлинале, кое ќе трае до 21-ви февруари, во десетте селекции ќе бидат прикажани вкупно 434 филмови. Во главната конкуренција ќе бидат прикажани 23 филма, а за главните награди – Златната и Сребрената мечка претендираат 18 дела, додека другите се вон конкуренција, вклучително и филмот на браќата Коен, а за 19 филмови во Берлин ќе се одржи светската премиера./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.
Филм
Утре се отвора четвртиот Фестивал на грчки филм
Утре, на 7 април 2024 година, во 20 часот, во Кинотеката на Северна Македонија (Никола Русински 1, Скопје 1000) ќе биде отворено четвртото издание на Фестивалот на грчки филм. На отворањето ќе биде прикажан кусометражниот филм „Тишината на рибата кога умира“ на Василис Кекатос (2019, 19′), а потоа долгометражниот филм „Не би сакал да сум непристоен, но треба сериозно да разговараме“ на Јоргос Георгопулос (2019, 99′).
Ова се две црни комедии во кои што идејата за смртта се прикажува со доза на хумор. Филмот „Тишината на рибата кога умира“ учествуваше на некои од најважните фестивали како Sundance, а Василис Кекатос е еден од најважните претставници на кусометражните филмови со многу награди, вклучително и Златна палма во Кан.
Фестивалот е во ко-организација на Амбасадата на Грција во Скопје и Меѓународниот филмски фестивал Киненова спонзориран од фирмите Armos Balkan и Mermeren.
Влезот е бесплатен.
Култура
Во февруари 50-годишен јубилеј на Кинотека: Старите вредности во нови контексти
Пред 5 децении е формирана македонската кинотека. Честитки за сето она што досега го направила оваа значајна културна установа. Една од основните дејности на филмскава институција е да го прикаже сето она што го има, и ново и старо; ова второто во нови контексти и изданија. Тоа ќе биде карактеристика на програмата на најкусиот месев во годината – февруари. Календарски, ќе трае 29 дена. Ете можност да се види сето она што кинотеката го подготвила за февруарските денови.
Ќе се стартува со премиерна проекција. Со филм кој има наслов СЛОБОДА. Тоа е краткометражен филм во омнибус формат, чијшто автор е филмскиот критичар Златко Ѓелески. Веднаш потоа враќање децении наназад. Ќе бидат проектирани неколку архивски филмски записи од 1912 до 1952. Тоа се дел од новопримените кино-материјали што кинотеката ги прибра во текот на изминатата година.
Кинотека се решила, враќајќи се децении наназад, да потсети на филмовите создадени во 40-тите, 50-тите, 60-тите, 80-тите, 90-тите и 2000-тите. Режисерите се од различни земји – Италија, Франција, Германија, Шведска, САД. Ставени се во различни контексти, во нови програми. Всушност, станува збор за циклуси на Великаните на фестивалот на филмската камера БРАЌА МАНАКИ и пократок цилкус филмови на францускиот режисер на т.н. француски нов бран Луј Мал.
Во исклучително богатата кинотечна понуда се и неколку филмови на чехословачкиот режисер, оскаровецот Јан Кадар.
Она што е многу интересно, многу потребно за да се знае и запамети, се петте документарни македонски филмови со етнолошка содржина. Во нив е забележана традицијата, обработени се народни и религиозни обичаи од средината на 20-тиот век. Во четири од нив Вера Кличкова, пионерот на етнолошкиот филм кај нас, е сценарист, режисер или консултант.
Филмофилите ќе бидат почестени да го видат сигурно еден од најозборуваните лански филмови – НАПОЛЕОН на Ридли Скот. Во различните оценки за филмот доминираат, што е сосема разбирливо, Англичаните и Французите. Едните го фалат, другите го кудат. Критиките за најновата продукција на Скот се поделени, но не смее да се изостави фактот дека, и покрај одредени пропусти, станува збор за прецизно сработен биопик. Дело кое функционира на неколку нивоа – како биографска сторија, историска рекреација, но и омаж кон еден од омилените филмови на Ридли Скот – Бари Линдон од 1975, по сценарио и режија на Стенли Кјубрик.
Уште една филмска творба којашто предизвика интерес и претежно позитивни рецензии – УБИЈЦИ НА ЦВЕТНАТА МЕСЕЧИНА на Мартин Скорсезе– ќе биде проектирана во кино салата на Кинотека месецов.
Во финалето на месецов, ќе погледнеме два филма со музичка содржина. Познатиот ТОМИ, рок операта на Кен Расел, ќе биде прикажана на оригинална 35 милиметарска лента. Новитетот е музичкиот документарец за екс ју панк легендите Панкрти. Специјален гостин на кинотеката тие денови ќе биде фронтменот на групата, Перо Ловшин.
Февруари е можеби календарски пократок месец , но затоа ќе биде исполнет со исклучително богата кино-програма.