Филм
Златниот лав во Венеција за шведскиот филм „Гулаб“
Шведскиот филм „Гулаб седи на гранка и размислува за животот“ (A Pigeon Sat on a Branch Reflecting on Existence) на култниот 71-годишен шведски режисер Рој Андерсон ја освои во саботата навечер главната награда на 71-то издание на Венецијанскиот филмски фестивал – Златниот лав.
Златниот лав на шведскиот филм му е доделен на филмот кој изобилува со хумористични скечеви, кои ги истражуваат егзистенцијалните прашања. Рој Андерсон примајќи ја наградата изјави дека бил инспириран од големиот италијански режисер Виторио де Сика, особено од неговиот филм „Крадци на велосипеди“ од 1948 година. „Со голема чест ја примам оваа награда, особено овде во Италија, земјата која даде толку филмски ремек-дела. Ќе настојувам и натаму да правам добри филмови како оние на Виторио де Сика“, изјави Андерсон при врачувањето на наградата од страна на претседателот на жирито, францускиот композитор на филмска музика Александр Депле, на сцената пред Палатата на филмот на венециско Лидо и им порача на колегите да го следат примерот на големиот италијански режисер. Наградата за најдобра режија – Сребрен лав му припадна на 77-годишниот руски режисер Андреј Кончаловски за филмот „Белите ноќи на поштарот Алексеј Трјапицкин“ чие дејствие е сместено во село покрај езеро во Русија и ги следи животите на локалните луѓе, што понекогаш е снимано и со скриена камера. Документарниот филм на американскиот режисер Џошуа Опенхајмер „Поглед на тишината“(The Look of Silence) за малку познатите факти за масовните егзекуции во 1960-те по неуспешниот комунистички државен удар од 1960 ја доби наградата на жирито за добар филм.Италијанскиот филм „Гладни срца“ (Hungry hearts) на режисерот Савиер Констанц, кој истакна дека филмот го направил за помалку од милион долари ги доби двете награди за најдобри главни ролји. Во машка конкуренција „Пхарот на Вопли“ му припадна на Адам Драјвер, а во женска на италијанската актерка Ална Рорвахер. Признанието коешто се доделува во чест на славниот италијански актер Марчело Мастројани за најдобро актерско деби отиде кај младиот француски актер Ромен Пол за улогата до филмот „Последниот удар на чеканот“(Le dernier coup de marteau).Специјалната награда на жирито на 71-от Венецијански филмски фестивал му припадна на турскиот филм „Сивас“, а наградата што го носи името на уште еден великан на италијанскиот филм – Луиџи де Лаурентус за најдобар дебитантски филм му припадна на индискиот „Court“, кој беше прогласен и за најдобар филм во програмата Хоризонти.Во специјалната конкуренција на програмата Venezia Classici, на којашто се прикажуваат обновените верзии на стари филмови, за најдобар беше прогласен „Необичен ден“(Una giornata particolare) на италијанскиот режисер Еторе Скола во кој главните ролји ги толкуваа Софија Лорен и Марчело Мастројани./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.
Филм
Утре се отвора четвртиот Фестивал на грчки филм
Утре, на 7 април 2024 година, во 20 часот, во Кинотеката на Северна Македонија (Никола Русински 1, Скопје 1000) ќе биде отворено четвртото издание на Фестивалот на грчки филм. На отворањето ќе биде прикажан кусометражниот филм „Тишината на рибата кога умира“ на Василис Кекатос (2019, 19′), а потоа долгометражниот филм „Не би сакал да сум непристоен, но треба сериозно да разговараме“ на Јоргос Георгопулос (2019, 99′).
Ова се две црни комедии во кои што идејата за смртта се прикажува со доза на хумор. Филмот „Тишината на рибата кога умира“ учествуваше на некои од најважните фестивали како Sundance, а Василис Кекатос е еден од најважните претставници на кусометражните филмови со многу награди, вклучително и Златна палма во Кан.
Фестивалот е во ко-организација на Амбасадата на Грција во Скопје и Меѓународниот филмски фестивал Киненова спонзориран од фирмите Armos Balkan и Mermeren.
Влезот е бесплатен.
Култура
Во февруари 50-годишен јубилеј на Кинотека: Старите вредности во нови контексти
Пред 5 децении е формирана македонската кинотека. Честитки за сето она што досега го направила оваа значајна културна установа. Една од основните дејности на филмскава институција е да го прикаже сето она што го има, и ново и старо; ова второто во нови контексти и изданија. Тоа ќе биде карактеристика на програмата на најкусиот месев во годината – февруари. Календарски, ќе трае 29 дена. Ете можност да се види сето она што кинотеката го подготвила за февруарските денови.
Ќе се стартува со премиерна проекција. Со филм кој има наслов СЛОБОДА. Тоа е краткометражен филм во омнибус формат, чијшто автор е филмскиот критичар Златко Ѓелески. Веднаш потоа враќање децении наназад. Ќе бидат проектирани неколку архивски филмски записи од 1912 до 1952. Тоа се дел од новопримените кино-материјали што кинотеката ги прибра во текот на изминатата година.
Кинотека се решила, враќајќи се децении наназад, да потсети на филмовите создадени во 40-тите, 50-тите, 60-тите, 80-тите, 90-тите и 2000-тите. Режисерите се од различни земји – Италија, Франција, Германија, Шведска, САД. Ставени се во различни контексти, во нови програми. Всушност, станува збор за циклуси на Великаните на фестивалот на филмската камера БРАЌА МАНАКИ и пократок цилкус филмови на францускиот режисер на т.н. француски нов бран Луј Мал.
Во исклучително богатата кинотечна понуда се и неколку филмови на чехословачкиот режисер, оскаровецот Јан Кадар.
Она што е многу интересно, многу потребно за да се знае и запамети, се петте документарни македонски филмови со етнолошка содржина. Во нив е забележана традицијата, обработени се народни и религиозни обичаи од средината на 20-тиот век. Во четири од нив Вера Кличкова, пионерот на етнолошкиот филм кај нас, е сценарист, режисер или консултант.
Филмофилите ќе бидат почестени да го видат сигурно еден од најозборуваните лански филмови – НАПОЛЕОН на Ридли Скот. Во различните оценки за филмот доминираат, што е сосема разбирливо, Англичаните и Французите. Едните го фалат, другите го кудат. Критиките за најновата продукција на Скот се поделени, но не смее да се изостави фактот дека, и покрај одредени пропусти, станува збор за прецизно сработен биопик. Дело кое функционира на неколку нивоа – како биографска сторија, историска рекреација, но и омаж кон еден од омилените филмови на Ридли Скот – Бари Линдон од 1975, по сценарио и режија на Стенли Кјубрик.
Уште една филмска творба којашто предизвика интерес и претежно позитивни рецензии – УБИЈЦИ НА ЦВЕТНАТА МЕСЕЧИНА на Мартин Скорсезе– ќе биде проектирана во кино салата на Кинотека месецов.
Во финалето на месецов, ќе погледнеме два филма со музичка содржина. Познатиот ТОМИ, рок операта на Кен Расел, ќе биде прикажана на оригинална 35 милиметарска лента. Новитетот е музичкиот документарец за екс ју панк легендите Панкрти. Специјален гостин на кинотеката тие денови ќе биде фронтменот на групата, Перо Ловшин.
Февруари е можеби календарски пократок месец , но затоа ќе биде исполнет со исклучително богата кино-програма.