Култура
„Името е име“ продолжува со позитивното влијание, следи прикажување во САД и Норвешка
Документарниот филм, „Името е име“ продолжува со позитивното влијание во светот, пет години по неговата премиера. Во вторник филмот ќе биде прикажан на престижниот Браун Универзитет во Провиденс, држава Роуд Ајленд – САД.
Таму, студенти од Македонија организираат прикажување на филмот како дел пд серијата филмови прикажани од Медународната Браун Организација, во соработка со Вотсон институтот за меѓународни студии. Професорот Кит Браун од катедрата за Меѓународни студии на Браун Универзитетот и автор на повеќе книги за Македонија, заедно со продуцентот Џејсон Мико ќе бидат достапни за дискусија по прикажувањето на филмот.
Целта на овој филм, вели продуцентот Џејсон Мико, е пред се да се допре до публиката со оваа тема, а со тоа истата да се едуцира и охрабри.
„Едукација за сите оние кои не се запознаени со спорот, охрабрување на Македонците во борбата да се исправи оваа неправда, и забава за целата публика“, изјавува Мико.
Дополнително, филмот ќе биде прикажан во четвртпк, 23 април, во македонската амбасада во Осло, Норвешка. Прикажувањето е промовирано од амбасадорот Енвер Абдулахи, во соработка со режисерот на филмот Сигурјон Еинарсон, кој ќе биде таму за отворена дискусија со публиката.
За филмот Еинарсон вели: „Ова го правиме за да го привлечеме вниманието на широката меѓународна јавност за овој спор. Сакаме да му дадеме глас на македонскиот народ во оваа борба во неправдата поради присилното нарекување на Македонија со нешто друго освен сопственото име“.
Од 2009 година филмот имаше повеќе меѓународни прикажувања низ светот, Канада, САД, Австралија, Обединетото Кралство, Норвешка, Белгија и други европски држави но и премиера во Република Македонија. Веќе пет години филмот продолжува да ја кажува приказната на македонскиот народ и зошто тие едноставно одбиваат да се нарекуваат со друго име освен – Македонци.
Документарниот филм беше снимен во 2008 година, во нарација на Сер Ендрју Моушн, поет лауреат од Обединетото Кралство, со музика од Мум, Сигур Рос и Еартх Афаир (Исланд), Монте-Негро и Грахам Неш (САД), Кирил и Тоше Проески (Македонија).
Мортен Харкет, главниот вокал на бендот А-Ха ја донираше сопствената песна „Името е име“ за овој филм. Песната беше дел од неговиот албум „Писма од Египет“, од 2008 година./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Под слоганот „Приказна се чита“ денеска почнува Саемот на книга
Во арената „Борис Трајковски“ во Скопје денеска ќе биде отворено 36. издание на Саемот на книга, кој во седумте саемски дена ќе понуди книги од домашни и странски автори од преку 60 издавачки куќи од земјава и регионот.
На официјалното отворање на Саемот на книга обраќање ќе има министерката за култура Бисера Костадиновска Стојчевска.
Слоганот на манифестацијата е „Приказна се чита“.
– Слоганот „Приказна се чита“ прави поврзаност помеѓу опцијата за објавување „стори“ (на англиски „story“, што во превод значи приказна) на социјалните мрежи со приказните кои ги бараме во литературата и кои се раскажани во нашите омилени книги. На тој начин, Саемот се обидува да испише една нова страница во постоењето, приближувајќи се до новата генерација и новиот стил на живот преку јазик и жаргон препознатлив за модерното време – се вели во најавата за годинашното издание.
Со секоја купена редовна влезница ќе се донираат 15 денари за СОС детско село. Исто така, по повод 23 април – Светскиот ден на книгата, во СОС детско село и ДУЦОР „Партенија Зографски“ од Скопје – средно училиште за ученици со оштетен слух ќе бидат донирани по 100 книги и бесплатни годишни претплати од Boksy – изложувач на саемот, за година онлајн читање на книги.
Саемот на книга ќе биде отворен секој ден, од 10.00 до 22.00 часот. Билети можат да се најдат на влезот на Саемот, како и онлајн преку www.karti.com.mk.
Култура
Промоција на кривопаланечки драми од Страхил Алексиќ
Во НУ Центар за култура Крива Паланка , во петок со почеток во 12 часот, ќе се одржи промоција на кривопаланечките драми „Ожењи се Санде калајџија“ и „Најефтината свадба“ , чиј автор е Страхил Алексиќ.
Драмските дела се инспирирани од вистинси настани кои се дел од кривопаланечката историја и традиција, а Алексиќ ги има напишано пред 30-тина години.
Драмата „Ожењи се Санде калајџија“ за првпат е поставена и изведена во 90-тите години под раководство на проф. Марица Николовска, а пред повеќе години беше реобновена и претставена пред кривопаланечката публика од Драмското студио при НУ Центар за култура, во режија на Глигор Цветковски. Во 2018 година, пак, е изведена од ученици од СОУ„Ѓорче Петров“, под раководство на проф. Катерина Наковска Митовска, што јасно говори за интересот кај познавачите на драмското творештво, младите актерски таленти и кривопаланечката јавност.
Делото „Најефтината свадба“ досега не е драматизирано и не е познато на јавноста.
Страхил Алексиќ е првиот и засега единствен автор од Крива Паланка кој напишал драмски дела што сведочат за кривопаланчките настани од минатото, со што се потврдува нивната неизмерна вредност.
Издавач на кривопаланечките драми на Алексиќ е НУ Центар за култура од Крива Паланка, рецензент е Емилија Колевска, а подготовката на делата и промоцијата се реализираат во соработка со ЛУ Градски музеј и Општина Крива Паланка.
Настанот е дел од програмата на манифестацијата „Крива Паланка-Град на културата 2024“.
Култура
Изложба „Сликарството на Ликовната академија во Штип“ во КИЦ во Софија
Во галеријата на Културно-информативниот центар на Северна Македонија во Софија на 18 април (четврток) 2024, со почеток од 18:30 часот, ќе биде отворена ликовната изложба „Сликарството на Ликовната академија во Штип“.
На изложбата ќе бидат претставени дела кои се настанати во Ликовната академија при Универзитетот „Гоце Делчев“ во Штип, во периодот од 2019 до 2023 година. Составот на авторите е од поранешни и сегашни студенти во оваа образовна установа, и тоа се: Александра Јеротијевиќ-Андреева, Бојана Тошевска, Вангел Крстиновски, Дејан Витанов, Ивана Ивановска, Крсте Тарабунов, Миа Ефремова и Мики Иванов.
Нас. доц. д-р Иво Пецов, како куратор на изложбата, се погрижи да бидат избрани нај карактеристичните дела од ареалот на штипската Ликовна академија, во согласност со целите на нејзината програма – да образува кадри од областа на класичното сликарство.
Во образовната програма „Класично сликарство“ студентите од оваа изложба работеле под менторство на различни наставници, и тоа: Лариса Бондаренко и Владимир Недајборшч од Украина, Викторија Егорова и Игор Егоров од Русија, како и македонските професори: Јана Јакимовска, Јордан Ефремов, Слободан Милошески и Ванѓа Димитријева-Кузманоска.
Жанровски нај застапена е мртвата природа, а исто така може да се видат и лицата на некои од авторите преку жанрот автопортрет, како и дела кои биле дел од специфични задачи од опфатените предмети во Ликовната академија.
Изложбата ги опфаќа класичните сликарски техники: маслени бои на платно, акрил на платно, сув пастел на хартија и слично, а форматите се галериски.
При селектирањето на делата се акцентираше врз владеењето на академските вештини во сликарството. При селекцијата беше отворена можноста за учество на дела од автори кои развиле свој посебен стил и уникатност во изразувањето, за чиј развој дала придонес Ликовната академија во Штип.
Целта на изложбата е да го претстави квалитетот на ликовната обука и да ја афирмира Ликовната академија во државата и регионот, да го претстави развојниот пат на креативните личности сврзани со оваа институција.