Во Музејот на современата уметност – Скопје, в среда (18 април), ќе биде отворена меѓународната изложба со наслов „Сè што ни е заедничко“.

Изложбата ја адресира несигурноста во контекст на разни социјални, политички и културни амбиенти, поврзани со ранливоста и егзинстенцијалната непредвидливост. Во состојби на нестабилност одредени популации и групи страдаат или се обесправени во своите општествени констелации и стануваат изложени на симболични и материјални насилства што резултираат со конфликти, транзиции, ограничувања и злоупотреби на трудот, миграции и егзодуси, родови нееднаквости и неправди. Доколку општата несигурност го означува она што сите ние го споделуваме, но исто така она што нè разликува и нè одвојува од останатите, дали можеме да пронајдеме практики што се насочени кон заедничко добро или да изградиме наша заедничка акција? Следствено, се поставува прашањето за можноста овие дисперзирани неспокојни субјективитети да дејствуваат заеднички.

Изборот на осумнаесет уметници нè запознава со дела што даваат увид во ситуации на разни несигурни и расцепкани историски контексти посочувајќи на можноста да се инволвираат во сегашноста барајќи од нас ангажирано да ги преиспитаме сопствените знаења, искуства и ставови. Проблемите на кои тие се осврнуваат се трагични, тие се состојби на политичка манипулираност, на социјална потиштеност и исклученост, на културна потчинетост и зависност од низа одлучувачки фактори што сведочат за секојдневното неспокојство.

Куратори на изложбата, која ќе биде свечено отворена во 20 часот, се Мира Гаќина и Јованка Попова.

Во просториите на Националната галерија на Македонија, објект Даутпашин амам, утре (3 април), со почеток во 19 часот, ќе се одржи предавање со прошетка низ изложбата „Борко Лазески – 100 години од раѓањето“ со историчарот на уметност, Кирил Пенушлиски. На предавањето публиката ќе може директно да се запознае поблиску со делото и творештвото на големиот Борко Лазески и во интеракција со доктор Пенушлиски да дознае нешто повеќе за овој великан на македонската уметност.

Изложбата „Борко Лазески 1917-1993“, на која се претставени шеесетина дела од речиси сите творечки фази на авторот, беше поставена во рамките на програмските активности на Националната галерија на Македонија за одбележување еден век од раѓањето на најпознатиот македонски монументалист и втемелувач на витражот во Македонија. Изложбата содржи оригинални дела од помал формат и фотографии од монументите на Лазески, како и досега реставрираните скици од неговата „Фреска за НОБ“, која до земјотресот во 1963 стоела во холот на старата железничка станица во Скопје.

Како што истакнуваат од Националната галерија на Македонија, изложбата предизвикала огромен интерес кај нашата публика, но и кај претставници на дипломатскиот кор во Република Македонија и пошироко во регионот, кои, како што се вели во соопштението од оваа институција, веднаш го препознале значењето на овој македонски уметник кој се образувал и творел во ателјето на големиот Андре Лот.

Воедно, кураторот на изложбата на Лазески, Маја Чанкуловска-Михајловска, информира дека таа ќе може да се види уште неколку дена, односно до 5 април годинава.

По повод 73 годишнината од постоењето на Македонски народен театар, на 3 април, вторник, во 12 часот, во фоајето на театарот, ќе биде отворена изложбата „Моќта на актерот“.

Изложбата е посветена на актерите кои ги имало во разни претстави, на оние актери на кои најбројни им се т.н. епизодни ликови, без кои не може речиси ниту една претстава. На оние кои многу посветено и дисциплинирано го направиле секој лик свој, му ја дале својата душа.

Поместени се оригинални фотографии на повеќе од триесет актери кои работеле од првата сезона на МНТ, далечната 1945/46 година, па сè до почетокот на овој век. Тоа се: Вера Вучкова – Жежељ, Добрила Пуцкова, Добрила Чабриќ – Ивановска, Тома Киров, Кирил Ќортошев, Цветанка Јакимовска, Ратко Гавриловиќ, Драга Арсенска – Велможин, Драги Крстевски, Стојка Цекова, Борис Стефановски, Драги Костовски, Пантелеј Мирковски, Таше Кочовски, Кирил Попов, Вукан Диневски, Чедо Камџијаш, Анче Џамбазова, Димитар Костов, Кирил Андоновски, Душко Костовски, Владимир Светиев, Александар Џуровски, Кирил Псалтиров, Мирче Доневски, Кирил Коруновски, Александар Шехтански и Гоце Влахов.

На повеќе од 120 фотографии, велат од МНТ, се гледа трајниот печат што тие го оставија врз историјата на театарот.

Изложбата ќе биде отворена за јавноста во текот на месец април.