Изложби
Патување, изложба на 39 современи уметници од Македонија и Ј.Кореја во Националната галерија на Македонија – Мала станица
„Патување“ е насловот на изложбата на која ќе се претстават дела од триесет и девет современи уметници од Македонија и Јужна Кореја, од каде гостуваат уметниците од групата Егзит. Изложбата ќе биде отворена во среда, 3-ти август во 2016, 20:30 во Националната галерија на Македонија во објектот Мала станица и ќе биде отворена до 20-ти август.
На изложбата ќе бидат поставени дела во најразчилни медиуми, инсталации, аудио‒инсталации, објекти, реди‒мејд објекти, фотографии, слики и цртежи. Изложените дела се од голем, среден и мал формат.
Од Македонија изложуваат голем број реномирани автори, како и млади талентирани уметници, а од Јужна Кореја се претставуваат уметниците од групата Егзит. Групата Егзит е формирана во градот Ченгчу во 2010 година и е отворена за соработки. Во неа покрај основачите, секоја година кон изложбите се приклучуваат нови членови, а исто така покануваат и гости од странство.
Изложуваат по двапати годишно, еднаш во Кореја, еднаш во странство. Во својот прв каталог ја цитираат мислата на Фрида Кало „Се надевам дека Излезот носи задоволство, и се надевам дека никогаш нема да се вратам”, што го појаснува значењето и поводот за избор на нивното име. Организатор и куратор на изложбата „Патување“ е Маја Кировска, уметник од Македонија, која соработката со групата Егзит ја започна во 2014 година на еден настан, во MC Gallery во Њујорк, каде со концерт во иста вечер беа отворени три изложби, две на македонски автори а една на автори од групата Егзит од Јужна Кореја. Потоа набрзо започнаа подготовките за гостување на групата Егзит во Македонија на заеднилка изложба со македонски автори.
Токму заради остварување контакти и соработки од ваков тип, практика на MC Gallery е отворањата на одделните изложби галеријата да ги одржува во една вечер, каде покрај контактите со посетителите, уметниците имаат можност меѓусебно да се запознаат. Преговорите со галерија од градот Ченгџу во Јужна Кореја, за пренесување на изложбата „Патување“ во Јужна Кореја веќе се во тек.
„Преку делата на оваа изложба, авторите ги прикажаа своите погледи на темата ’Патување’ разгледувана во најширока смисла на зборот, патување како движење од точка А во точка Б, земени како позиции во просторот и времето или преминување од една во друга состојба. Тие ги разгледаа условите со кои се соочува субјектот или објектот кој патува, влијанијата и промените кои ги претрпува, како и крајните позиции или резултати од ваквото патување.
Изборот на темата беше поттикнат од актуелните случувања и состојби во светот, од општите човекови состојби и принципи, непроменети стотици и илјадници години, како и од универзалните принципи на природата кои никогаш не се менуваат.
Она што прво ни паѓа на памет кога ќе го слушнеме зборот патување е патување во друга земја. И покрај состојбите во светот и бројните напади на локациите каде има голема концентрација на странски туристи како што се аеродромите, како ништо да не ги спречува патниците во нивната намера, аеродромите се пополни од било кога, штетите од несреќите се санираат со рекордна брзина а сообраќајот и протокот на луѓе продолжува како ништо да не се случило.
Патувањата ги прошируваат нашите видици. Патувањата се дел од работата на многу професионалци ширум светот. Тие се значаен дел и од работата на уметниците кои патуваат на резиденции, отвoрања на изложби и други професионлни престои. Комуникацијата носи нови идеи, а секој контакт со нова средина или нови луѓе носи влијанија кои најчсто резултираат со поинакви креативни решенија.
Денес најзастапени патувања можеби се туристичките, кои се разликува од истражувачките експедици, по тоа што туристите одат по проверен пат, користат воспоставени системи на активности и воглавно се заштитени од тешкотии и опасност.
Имајќи пасош со кој туристички можеме да патуваме во многу земји без виза, забораваме дека не сите луѓе на планетава ја имаат таа привилегија, привилегијата на слободата на движење која би требала да биде основно човеково право. Жителите на многу земји во светот не се во можност да извадат виза за да патуваат. И не беше толку одамна, пред 2009 година, кога на граѓаните на Република Македонија им беа потребни визи за да патуваат во земјите на Европа. Покрај пасошите и визите, материјалните средства се неопходен предуслов за еден човек да може да си дозволи патување.
Додека голем дел од популацијата ја има привилегијата да оди на безбедни патувања, денес среќаваме една поинаква категорија на патници, присилени поради прогон или војна, да тргнат на опасни патувања, на кои многу од нив го губат животот. Од минатата година и со сопствени очи бевме сведоци на најголемата бегалска криза после Втората светска војна, кога илјадници луѓе дневно транзитираа низ нашата земја. Само од почетокот на 2016 година, скоро 3000 лица го загубиле животот или се водат за исчезнати во водите на Медитеранот.
Кога ќе умре човек, кај народот се вели дека душата патува на оној свет, а смртта го означува моментот кога душата конечно ќе го напушти телото. Од ваквото поимање на смртта произлегува и терминологијата во повеќе јазици како и во македонскиот архаичен говор, каде често се срекаваат изразите, си премина, си замина, си отиде човекот.
Различно од реалниот живот, уметноста може да ни дозволи да креираме поинаква визија за светот, онаков каков сакаме да биде, онаков каков што предвидуваме дека ќе биде, онаков каков што стравуваме дека ќе биде… да не однесе на патување во иднината, во друга временска или просторна димензија, светот на соништата, во паралелна реалност, или во реалноста на уметничкото дело за која зборува Малевич.” – Маја Кировска, куратор на изложбата
Уметници: Александра Јовановска, Ана Ивановска, Ана Јовановска, Ана Лазаревска, Ангел Миов, Благојче Наумоски – Бане, Борче Богоевски, Викторија Попоска, Горазд Попоски, Горан Менков, Гордана Вренцоска и Далибор Тренчевски.
ЕГЗИТ: Loy Kim (Лој Ким), Kyusun Lee (Кјусан Ли), Jiyeon Mun (Џијан Мун), Insuk Ryu (Инсук Риу), Giljae Jeong (Гиљце Цонг), Dongrack Son (Донграк Сон), Iksong Jin (Иксонг Џин), Yuntaek Sa (Јунтек Са), Mijeong Lee (Миџонг Ли), Sunyoung Lee (Санјонг Ли)Changlim Lee (Чанглим Ли), Soongu Han (Сангу Хан).
Зорица Зафировска, Ивана Пирковска, Јана Манева – Чупоска, Јовица Мијалковиќ, Кристина Хаџиева, Маја Кировска, Марија Сотировска – Богдановска, Марко Георгиевски, Нина Нинеска, Перо Кованцалив, Петра Јовановска, Тони Димитров, Урош Вељковиќ, Христијан Санев и Христина Зафировска./крај/мф/ст
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Изложби
Мице Јанкуловски ја отвори изложбата во Букурешт
Синоќа, во 19 часот, беше отворена самостојната изложба на слики од Мице Јанкуловски, „Надвор од црното“, во галеријата „Галатека“ во Букурешт.
Автор на концептот е Корнелија Конеска, а куратор – Анка Боериу, универзитетски професор на Националниот универзитет за уметност на Романија.
За уметничкото творештво на Јанкуловски
Како уметник повеќе од пет децении Јанкуловски континуирано е посветен на истражувањето во областа на сликарството и цртежот, но експериментирал и се претставувал преку повеќе уметнички дисциплини (сликање на стакло, карикатура, анимиран филм, палиндроми…) заради што меѓународната професионална јавност го препознава како мултимедијален уметник. Во своето уметничко дело тој постојано ги истражува формата, просторот, бојата, небојата и движењето како елементи што се повторуваат.
Јанкуловски првенствено се занимава со истражување или поточно барање на разните форми, кои ги поставуваат темелите за создавање уметност. Неговите интереси вклучуваат испитување на врските меѓу формите и просторот, нивното заемно влијание и како формите се движат во даден простор. Кога се набљудуваат неговите слики и цртежи, може да се забележи дека доминантни се геометриските форми, но на крајот тие еволуираат во поорганска и невоздржана форма. Рабовите на овие форми играат клучна улога во дефинирањето на просторот и овозможуваат тој да функционираат како кохезивна целина.
Последната фаза на концептуални слики на Јанкуловски се одликува со монохроматичност, модуларност, мултипликација и минимализам. Уметникот користи систематски пристап за примена на основни форми, како што се кругови, квадрати и триаголници на големи квадратни платна, користејќи само црна боја. Формите се создаваат со правење шари на намази од дебел слој црна боја. Во зависност од тоа дали намазите се нанесуваат на заднината или на самите форми, се постигнува дополнителен впечаток на позитивно/негативно. Серија од дела се создава со мултипликација на формите во платната, како и со мултиплукација на самите платна, што резултира со големи концептуални дела, како полиптиси.
Веднаш треба да се забележи дека црното, т.е. небојата, како што понекогаш се дефинира, е единствениот протагонист на делото… покрај светлината како составен дел на конечниот резултат.
Во однос на просторната организација на концептуалните дела од повеќе делови, Јанкуловски секогаш се труди да обезбеди можност за нивно читање, без разлика на позицијата на деловите, за да може да се набљудуваат поставени на разни начини – резултат на неговиот првичен интерес за палиндромите (зборови што се читаат исто и напред како назад).
Индивидуалниот творечки потпис во делата на Јанкуловски се стреми кон контемплативност и медитативност со претставување на постојаната различност на универзалниот поредок. Неговата потреба да ги пренесе горенаведените односи во (речиси) дводимензионални дела е на ниво на филозофска интерпретација, при што секое дело има своја приказна и отвора мноштво нови димензии.
Неговото најново уметничко творештво е истражување со карбон (познатата најцрна боја) – боја откриена со најновите нанотехнологии, која обезбедува поглед во непознатото надвор од сè што досега е познато за црното.
За изложбата „Надвор од црното“
Основниот мотив на изложбата е визуелен одговор на прашањето: „Што има надвор од границите?“
Наспроти белата боја (која ги рефлектира сите бои), црната ги апсорбира сите бои и се доживува како граница каде што сите бои завршуваат. Дали е така? Што е зад или подобро надвор од црното? Според перцепцијата на Јанкуловски – повеќекратна реалност!
Концептот на изложбата е една од тие реалности. Главните атрибути на неговото уметничко дело му дозволуваат да прави бескрајни варијации и разни реалности, но како докажан минималист ги постигнува со минимални елементи. Како и секогаш, тој користи само црни квадратни платна со разни растери со црн акрилик. Конечниот резултат се постигнува со мултипликација на формите и со комбинација на модуларните (претходно обмислени) формати на платната распоредени во полиптиси.
Изложени дела:
„Ноќите на Тоскана“, 2019 (сегмент)
Полиптих од 10 слики, акрилик на платно, 195 x 1.950 cm (195 x 195 cm/секоја)
„Круговите на Леонардо“, 2020 (сегмент)
Полиптих од 4 слики, акрилик на платно, 195 x 780 cm (195 x 195 cm/секоја)
„Хоризонтален свет“, 2021 година
Полиптих од 4 слики, акрил на платно, 195 х 390 см (97,5 x 97,5 cm/секоја)
„Дијагонален свет“, 2021 година
Полиптих од 4 слики, акрил на платно, 195 х 390 см (97,5 x 97,5 cm/секоја)
Изложби
Самостојна изложба на Глигор Кондовски во „Центар Јадро“
На 2 ноември, во 20 часот, во КСП „Центар Јадро“, ќе се одржи самостојна изложба на фотографии на Глигор Кондовски со наслов „Импровизации“.
На отворањето на изложбата настапува џез-триото: Глигор Кондовски – виолина, Владан Дробицки – тромбон, Дени Омерагиќ – контрабас. Изложбата ќе ја отвори Мирко Попов.
„Во овој фотографски момент Глигор ја поставува фотографијата на ниво на класичната визуелна техника. Медиумот е граница, но ликовниот израз е високата визуелна точка на вкрстување на сите технички патувања. Слободниот дух и слободната рака во овој случај го одвеле уметникот на најнеочекуваните фотографски надминувања, а слободата како апсолут во сите сфери од животот ја носи и како ангажирана идеја овој современ уметник. Овие фотографии поставуваат прашања: што е слобода, ги преиспитува границите на слободата, односот на современиот човек кон слободата, како и тоа што е внатрешна, а што надворешна слобода?“, рече м-р Билјана Билбилоска, ликовен уметник.
М-р Глигор Кондовски (1980) дипломира на Факултетот за музичка уметност, вокално-инструментален оддел, отсек виолина. Дипломира на вториот Факултет за драмски уметности при Тетовскиот универзитет, филмска и ТВ-режија. Магистрира на Факултетот за драмски уметности во Скопје, филмско и ТВ-сценарио. Моментно е вработен како наставник по виолина во ДМУ „Тодор Скаловски Тетоец“ во Тетово. Во 2008 година негова композиција Green dance е во компилациско ЦД со наслов Imamo dobro glasbo, издадено преку Радио Вал 202 при РТВ Словенија. Во 2014 година учествува со експериментален филм „Рестарт“ на Микорарт фестивал во Белград, Србија. Во 2016 на Festival u Slavonski brod, Croatia. Во 2016 на Indipendent European Cinema, во Нови Сад, Р. Србија. Во 2017 на студентскиот филмски фестивал New wave Софија, Р. Бугарија. Во 2019 со филмот „Попладневни малини“ учествува на државен филмски фестивал во Крушево, на Вива фестивалот во Сараево, Босна и Херцеговина и на Inshort fest во Нигерија. Прва самостојна изложба на фотографии со наслов „Обични профили“ ја прави во Смедеревска Паланка, Р. Србија, во 2018 година, како и со дел фотографии учествува на: изложба на фотографии во Музејот на современата уметност и „ЕУ инф-центарор“ во склоп на проектот Денови на разноликоста, 2017. Самостојна изложба со наслов на фотографиите: „Тетовски џез-моменти“, 2019, со поддршка на Министерството за култура. Самостојна изложба на фотографии со наслов: „На сцена“, 2020, со поддршка на Министерството за култура. Самостојна изложба на фотографии со наслов: „Сфера“, со поддршка на Министерството за култура, 2021 година. Во 2020 го издава музичкиот албум: Here, под македонската етикета „Шарла“, после тоа за истата етикета ги издава албумите: „Беседа“ за соло виолина импровизација и Hover, 2021 година. По тоа, за ПМГ ЏЕЗ го издава албумот: Nightscape, во 2021 заедно со џез-тромбонистот Владан Дробицки и во 2022 година за истата дискографска куќа го издава албумот: „Разгледи“ заедно со Марија Каева – вокал, Владан Дробицки – тромбон. Со композицијата Once upon a train учествува на една компилација наречена „Клавирско небо“ во Р. Србија, 2021 година. Во 2022 го издава соло албумот: Encounter за издавачката куќа ПМГ ЏЕЗ. Неколку промотивни настапи на албумот: „Крај Вардарот сесии“ во „Аудиокултура“. Настап на Џез-фестивалот: „Крај Вардарот џез“, 2023, и настап на Скопско лето, 2023 година.
Изложби
Отворање изложба на фотографии на Ерина Богоева во МКЦ
Вечерва, во 20 часот, во Галеријата 2 на Младинскиот културен центар, ќе биде отворена изложба на фотографии со наслов „Македонските архитектурални скулптури“ од Ерина Богоева.
По многу години истражување и фотографирање на архитектурата од втората половина на ХХ век во Скопје, во 2017 година Ерина ја посветува својата последна изложба „Затемнетиот град“ токму на таа тема, а во 2018 година со иста инспирација ја издава и монографијата „Скопје – архитектурата како фотографска скулптура“.
Непобитен факт е дека монументалистичката архитектура е присутна не само во главниот град туку и во целата држава и таа досега ретко била предмет на истражување, фотографирање и презентирање. Во Скопје и во другите градови таа е често занемарена, оставена на маргините и пропаста. Амбивалетниот однос кон тие (веќе историски) времиња влијае врз фактот на неможноста да се постигне одвојување на убавината на градбите од политичкиот и историскиот контекст на времето во кое се создавани. Преку фотографијата Ерина ја прикажува оваа архитектура во целосната нејзина скулптуралност, комплетно извадена од временскиот и просторниот контекст.
Изложбата е поддржана од Министерството за култура на Република Северна Македонија и од Младинскиот културен центар и е од продажен карактер.
Ерина Богоева е родена на 2.7.1988 во Скопје. Нејзините почетоци во уметноста и поконкретно во фотографијата се поврзани со програмата на меѓународната матура, во склоп на средното образование во гимназијата „Јосип Броз Тито“ во Скопје. Таа е самоук фотограф и активно се занимава со фотографија од 2007. Во октомври 2021 година Ерина ја има својата петта самостојна изложба „Мистеријата зад женскиод поглед“, поддржана од Europe House Skopje по што се одржува и дискусија инспирирана од изложбата, а посветена на жените во креативните индустрии во нашата земја. Истата година, во ноември, Ерина е дел од фотографската изложба на модното списание „Вог“ во Милано преку фондацијта ВИД.
Изложба ќе биде отворена за посетителите до 15 октомври 2023.