Хорот „Драган Шуплевски“ при ФМУ – Скопје, под раководство на маестро проф. м-р Сашо Татарчевски, настапи на еден од најголемите универзитетски фестивали во Европа.

Universitas Cantat е фестивал со долга традиција и форум на најквалитетните универзитетски хорски ансамбли од светот. Хорот „Драган Шуплевски“ по третпат ја доби поканата за учество, што, како што велат, само по себе е извонредно признание.

Концертите на хорот „Драган Шуплевски“, овој пат во формација на женски хор, поминаа со огромна посетеност и интерес. Првиот концерт се одржа во градот Калиш, во прекрасната катедрала „Св. Никола“.

„После концертот, свештеникот кој ја раководи катедралата организираше прием за хорот, при што имавме чест да видиме голема фреска на која се претставени патроните на нашиот Универзитет „Св. Кирил и Методиј“ во Скопје, светите браќа Кирил и Методиј“, соопштија од хорот.

Вториот концерт се одржа во впечатливата концертна сала на универзитетот „Адам Мицкјевич“ во Познањ, пред бројна публика, која не штедеше аплаузи после изведбата на секоја од композициите. За овој концерт маестро Татарчевски избра програма со композиции од македонските бардови на хорското творештво: Тодор Скаловски, Трајко Прокопиев, Драган Шуплевски, Кирил Македонски и Александар Лековски.

Посебно впечатливи и позитивни беа бурните реакции на останатите учесници на фестивалот, ансамбли од САД, Германија, Унгарија и Полска кои ги продолжија аплаузот и овациите и откако нашите девојки ја напуштија сцената.

Освен самостојните концерти,  студентките учествуваа и во работилници како и во заедничката подготовка и изведба на композицијата On – Off од композиторот Зузана Фалковска, специјално создадена за овој настан.

„Ваквите континуирани успешни настапи на хорот ‘Драган Шуплевски’ значат голема афирмација за Факултетот за музичка уметност, УКИМ и за државата во целина и носат покани за учество и на други еминентни музички настани. Овие настапи и претставувања на Факултетот за музичка уметност – Скопје се поддржани од Министерство за култура УКИМ и ФМУ – Скопје, а се под покровителство на претседателката на државата, Н.Е. Гордана Сиљановска – Давкова по повод 60 години ФМУ – Скопје“, се наведува во соопштението.

Агенцијата за филм ја поздравува одлуката на Владата, донесена на седницата одржана на 12 мај, со која е усвоен Предлог-законот за игри на среќа и за забавните игри, кој понатаму ќе биде проследен во собраниска процедура.

„До 2015 година дел од надоместоците со кои се финансираше Агенцијата за филм вклучуваа и процент од приходите од игрите на среќа. Оваа одредба беше укината со Одлука на Уставниот суд во 2016 година, кога беа укинати член 12 став 1 алинеи 8 и 9 и член 63 став 3 од Законот за филмската дејност, што предизвика значително намалување на буџетот на Агенцијата и сериозно влијаеше врз можностите за континуирано финансирање и развој на филмската дејност.

Во 2025 година, Агенцијата за филм поднесе предлог-измени во рамки на новиот Предлог-закон за игри на среќа и за забавните игри, со барање овие надоместоци повторно да бидат вратени во законското решение“, велат од Агенцијата.

Со предложените законски измени, се предвидува Агенцијата за филм да добива 3 отсто од уплатените давачки од игрите на среќа, без ограничување на висината на средствата на годишно ниво, што претставува значаен исчекор за стабилизација и развој на филмскиот сектор.

Овие средства, како што се наведува, ќе овозможат поголема финансиска одржливост и функционалност на Агенцијата, зголемена поддршка за домашната филмска продукција, развој на нови креативни содржини, како и отворање можности за поддршка на телевизиски серии, дебитантски проекти и млади автори.

Дополнително, се предвидува поддршка за развој на проекти и сценарија, развој на кино мрежата, издаваштво од областа на филмот, како и создавање филмски содржини за деца. Ваквото решение ќе придонесе за зајакнување на македонската аудиовизуелна индустрија, нејзина поголема меѓународна конкурентност и поттикнување на културниот и економскиот развој преку филмот.

Во рамките на 54.издание на престижниот меѓународен фестивал „Мајски оперски вечери“ на 20 мај со почеток во 20.00 часот, на сцената на Националната опера и балет ќе се изведе операта „Мадам Батерфлај“ од Џакомо Пучини – едно од најемотивните и најизведуваните дела на светскиот оперски репертоар. Станува збор за музичка драма со силна човечка приказна, во која љубовта, надежта и предавството се испреплетуваат во трагична судбина.

Диригент на претставата е гостинот од Грција, Мирон Михаилидис, а режијата ја потпишува Александар Текелиев (Бугарија). Сценографијата е на Живојин Трајановиќ, костимографијата ја изработи Лира Грабул, концерт-мајстор е Верица Ламбевска, а хор-мајстори се Јасмина Ѓорѓеска и Ѓургица Дашиќ.

Во насловната улога – Чо Чо Сан (Мадам Батерфлај) настапува гостинката од Италија, Доната Д’Анунцио Ломбарди, во улогата на Пинкертон – Хектор Лопез (Мексико), а во улогата на Шарплес – Енрико Маручи (Италија). Во останатите улоги настапуваат: Марика Поповиќ, Исмет Вејсели, Невен Силјановски, Јане Дунимаглоски, Соња Пендовска Мадевска, Валентина Димитриевска, Марко Димовски, Марко Гапо, Дарко Станојловски, Борко Биџовски, Филип Мирчевски, Никола Чедомировски, Шинаси Рамдан и Васко Здравков, заедно со хорот и оркестарот на Националната опера и балет.

„Мадам Батерфлај“ е опера за безусловната љубов и за кревката надеж што опстојува и покрај разочарувањето. Пучини во ова дело маестрално ги спојува западните музички традиции со ориентални мотиви, создавајќи партитура исполнета со лирска нежност и драматичен набој. Неговата посветеност на силна и трогателна приказна се чувствува во секоја музичка линија, правејќи ја оваа опера една од најемотивните во оперската литература.