Култура
Македонија се сеќава на Тоше и неговите песни
Пред осум години на 16 октомври 2007 година во 6.20 часот во сообраќајка кај Нова Градишка загина македонскиот поп пејач, Тоше Проески, најголемата македонска ѕвезда, пејач и хуманитарец.
Осум години по неговата смрт, не само Македонија, на него и на неговите песни се сеќава цел Балкан и се присетува на кобното утро кога се дозна тажната вест за загинувањето на Тоше. Неговата менаџерка, Лилјана Петровиќ во изјава за хрватскиот весник „Јутарнји лист“ вели дека за родителите на Тоше како да застанало времето. Таа редовно контактирала со нив, но вели дека нивната тага со ништо не може да се излечи.„Утеха им даваат нивните внуци Кристијан и Никола, синовите на сестрата на Тоше, Дора. Четиринаесетгодишниот Кристијан многу потсетува на Тоше, и пее и свири“, изјавила Петровиќ.По трагедијата таа целосно се повлече од естрадата. Живее во Ниш и се занимава со производство на етерични масла и одгледува лаванда.Долгогодишната девојка на Тоше, Андријана Будимир, пред две години се омажи за угостител во Скопје и има син Максим. По смртта на Тоше, Петровиќ и Будимир се соочија на суд по изјавите на Петровиќ за хрватските медиуми дека Будимир лаже дека последните смс пораки Тоше и ги пратил нејзе и тврдеше дека воопшто не контактирале.Будимир ја тужеше и судот пресуди Петровиќ да и исплати 300.000 денари на Будмир за клевета. Возачот на џипот „туарег“ Ѓорѓи Ѓорѓиевски ја одлежа двегодишната затворска казна на којашто беше осуден за сообраќајката во која загина Тоше. Сообраќајката се случила кога возилото со кое патувал во насока на Загреб удрило во приколка на камион, а потоа се извртело и удрило во заштитната ограда.Тоше загинал на местото на несреќата, а во моментот на сударот спиел на совозачкото седиште од автомобилот.Во несреќата повредени беа менаџерката Петровиќ и возачот Ѓорѓи ,кои беа хоспитализирани во болницата во Нова Градишка.Според изјава на возачот на камионот Славиша Кузмановиќ, возилото „Фолксваген Туарег“ во кое се возел Тоше, со голема брзина удрило во приколката на камионот. Возачот на камионот не се појави на судењето, а Ѓорѓиевски по пресудата кратко искоментира „И покрај сé Тоше си е Тоше“.Неодамна објавена е нова песна на Тоше на ромски јазик ‘Efta purane ikone’ ./крај/мф/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.