Daily news
Почнува „Лица без маски“- во компетиција седум претстави за „кафканијанството“ и „орвелизмот“
Со „Претстава за четири актери, неколку свињи…“ во изведба на независниот театар „Ќендра мултимедија“ од Косово, утре со почеток во 20 часот на сцената на Драмски театар-Скопје, ќе почне 10. Јубилејно издание на Интернационалниот театарски фестивал „Лица без маски“, кој годинава се одржува под мотото „Остави трага“.
Во официјалната натпреварувачка програма, се селектирани седум претстави кои кореспондираат со начелата и принципите на фестивалот. Претставите од годинешната програма во најголема мера се критика на општествениот миг во кој живееме ние луѓето без разлика на која страна од светот. Претставите од официјалната програма се движат на самата линија на „кафканијанството“ и „орвелизмот“.
Очигледно е тоа со претставата од Косово, како и со „Фармата“ во изведба на италијанскиот театар „Софија Амендолеа“ од Италија. Тука се и гостите од Русија, „32. Физички театар“ од Таганрок , кои годинава доаѓаат по втор пат во Скопје и ќе настапат со „Ноќта на огнот“, бугарската монодрама „Сè на масата“ работена според делата на Чарлс Буковски, а во режија на Ана Батева, дела кои конечно третираат горливи актуелно-општествени теми на едно пошироко, глобално ниво. Среќни сме што годинава во програмата имаме и македонски независни продукции. Тука е и бескрупулозната „Да ми го поздравиш и бациш“, на театарот „Артопија“, „Скршената стомна“ од Интимен театар-Битола, „Прво ќе ме земеш, после ќе ме…“, на Театар „Крик“ од Скопје, истакна селекторот на фестивалот Игор Ивковиќ.
Фестивалот ќе се одржува од 8-12 април, 2017 на сцените во Драмски театар, Дом на АРМ, Театар Комедија и „Мала сцена“ на Драмски театар –Скопје.
Честа да го отвори фестивалот оваа година, во име на пријателите на фестивалот и припадна на актерката и режисерка Снежана Коневска-Руси. И годинава фестивалот ќе додели три награди: Гранд при, Награда за најдобра режија, Награда за најдобро актерско остварување, а за нив ќе одлучува тричленото жири во состав: Дејан Дамјановски, режисер, Трајче Ѓеорѓиев, актер и Тони Димков, новинар и театарски критичар, изјави Миодраг Костиќ, директор на ИТФ „Лица без маски“.
Десетте години на фестивалот покрај официјалната програма, во текот на годината ќе бидат организирани и дополнителни настани, кои ќе го означат успешниот развој.
Една деценија „Лица без маски“, за нас значи многу, затоа што од година во година интересот за учество е се` поголем. „Лица без маски“ станува и бренд на мапата европски и светски фестивали. На македонската публика и нудиме се поквалитетна програма, која кореспондира секога со актуелниот миг, потенцираше Миодраг Костиќ.
Фестивалот и оваа година е поддржан од Министерството за култура и Град Скопје, а е во реализација на независната продукција „ТЕАТАР 007“ и Конгресен центар „Александар Македонски“. крај/мф/ав
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.