Култура
Министерката Канческа-Милевска ја прими младата балерина Стефанија Гаштарска
Министерката за култура Елизабета Канческа-Милевска во вторник ја прими младата балерина Стефанија Гаштарска, која на Светскиот балетски натпревар во Романија, кој се одржа од 19 до 21 март, во конкуренција од 200 учесници од целиот свет, го освои сребрениот медал.
На средбата, на која присуствуваа и директорот на Музичко-балетскиот училиштен центар „Илија Николовски–Луј“, Јован Бицевски, и професорката Соња Здравкова-Џепароска, министерката за култура ѝ го честиташе високото признание на Стефанија. Канческа-Милевска истакна дека учеството на Стефанија на балетскиот натпревар во Романија претставува не само нејзин личен успех, туку тоа е успех и за државата и за промоцијата на Република Македонија како земја на млади талентирани уметници.
Таа ја подвлече важноста од поддршката за младите таленти и квалитетните кадри, кои во наредниот период од особено значање е да станат дел од институциите во културата.
Директорот на Музичко-балетскиот училиштен центар „Илија Николовски–Луј“, Јован Бицевски се заблагодари на поддршката која Министерството за култура во континуитет ја дава за афирмацијата на младите уметници и подвлече дека успехот на младата балерина е огромен, бидејќи на натпреварот во Романија златото не било воопшто доделено, така што Стефанија освоила најголем број бодови во својата категорија.
По освоеното меѓународно признание, Гаштарска во јуни годинава, со поддршка на Министерството за култура, ќе настапи и на познат меѓународен балетски натпревар во Орландо во Соединетите Американски Држави каде ќе се претстави со кратка балетска точка за која музиката ја изработи Кирил Џајковски.
Стефанија, која има 13 години и е ученичка во осмо одделение, појасни дека на натпреварот, освоила најголем број поени во својата натпреварувачка група за класичната варијација, по што учествувала и на натпреварот за наградата гран при, каде што партиципирале осум натпреварувачи од сите групи и категории кои имаат добиено најголем број поени. Младата балерина, како претставник на Република Македонија, се претставила и на завршниот гала-концерт, на кој, покрај наградените учесници на натпреварот, настапиле и неколку врвни светски балетски имиња.
Меѓу учесниците од Јапонија, Кореја, Австралија, Велика Британија, Франција, Шпанија, Шведска, Полска, Бугарија, Србија, Босна и Херцеговина, Хрватска, Романија, освен Стефанија, се натпреваруваа и две ученички од основното и една од средното балетско училиште „Илија Николовски-Луј“ од Скопје од класата на проф. Соња Здравкова-Џепароска. Натпреварот бил оценуван од референтна жири-комисија составена од реномирани балетски уметници и уметнички директори на балетски компании од Русија, Куба, САД, Порторико, Германија, Кореја, ЈАР, Србија, Хрватска и Романија. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
(Видео) „Кафе де Анатолија“ во живо во Сули ан во Скопје: фузија на музика и историја
Во хармонична фузија на култура, историја и музика „Кафе де Анатолија“ го претстави својот најнов жив настап, снимен меѓу древните ѕидови на Сули ан во Стариот базар/чаршија на Скопје.
Во соработка со Факултетот за уметности овој посебен настап ги обединува познатите уметници Маџноон (Majnoon) од Турција, Били Естебан (Billy Esteban), А. Јовевски (Aleksandar Jovevski) и Емра Кантуровски (Emrah Kanturovski) за несекојдневно музичко искуство.
Наспроти познатиот пејзаж на еден од најиконичните симболи на Скопје, овој жив настап е повеќе од само изведба – тоа е прослава на традицијата, иновацијата и универзалниот јазик на музиката.
Сули ан, карванска станица од 15 век, стои како доказ за богатата историја и културното наследство на Скопје. Почетно позната како водена крчма поради близината до реката Серава, Сули ан служела како витален дом за патници и трговци кои поминувале низ регионот. Во текот на вековите тоа ја видело менувачката историја развивајќи се од вибран пазар до центар за културна размена. Денес, тоа останува симбол на неодоливиот дух на Скопје привлекувајќи посетители од далеку, кои бараат да се потопат во неговата бурна минатост.
Вметнат во ѕидовите на Сули ан лежи Факултетот за ликовни уметности, светилник на креативност и уметнички израз. Основан во 1980 година како дел од Универзитетот „Св. Кирил и Методиј“ факултетот нуди широк спектар на курсеви во фини и визуелни уметности градејќи го талентот на будни уметници и научници. Неговото присуство во Сули ан дополнително ја истакнува крстосницата на традицијата и иновацијата бидејќи студентите и Факултетот истовремено се инспирираат од богатото архитектонско и културно наследство што ги опкружува.
На оваа историска и креативна заднина настапот на „Кафе де Анатолија“ се развива ткаејќи го звучното платно што преминува граници и жанрови. Од зафатните мелодии на кавал до пулсирачките ритми на тамбурата, секоја нота резонира со духот на Скопје, одек се слуша низ древните коридори на Сули ан. Маџноон (Majnoon), Били Естебан (Billy Esteban), А. Јовевски (A. Jovevski) и Емрах Кантуровски (Emrah Kanturovski) донесуваат свој уникатен талент на сцената инфузирајќи традиционалната музика со современ печат. Додека музиката го исполнува воздухот, публиката се пренесува на патување на чувствата, опфатени во видот и звуците на Стариот базар на Скопје. Калдрмите, украсени со вековно стара архитектура, обезбедуваат живописна заднина за настапот зголемувајќи го општото искуство за гледачите. Ова е доказ за моќта на музиката да ги обедини луѓето во културите и континентите пресекувајќи го јазот помеѓу минатото и сегашноста.
Како што последните ноти стивнуваат, ехото на живиот настап на „Кафе де Анатолија“ престојува оставајќи неизбришлив печат на сите што имале среќа да го видат.
„Кафе де Анатолијa“ е македонска продукциска и издавачка компанија основана во 2017 година од Моника Илиева (Monika Ilieva), Никола (Nickarth ака Rialians On Earth) и Зоран Илиев (Billy Esteban). Постои од 2009 година како концепт и претставува една од основачите на новите жанрови Organic House, Oriental Deep House и Ethno House на светската музичка сцена. Со повеќе од 4.000 артисти диџеји, кои настапуваат глобално, нивниот каталог содржи над 6.000 музички композиции (најголем светски каталог во Organic House-жанрот. „Кафе де Анатолијa“ е најнаградуваната музичка издавачка куќа на „Јутјуб“ со 31 Creator Award, првиот македонски бренд промовиран во Њујорк на Тајмс сквер, а соработуваат со глобални брендови, како Forbes, Giorgio Armani, W Hotels, Four Seasons, GoTurkiy. Многу списанија, како Forbes, Billboard, Entrepreneur, Gulf News, Gothic Magazine, Influencive, The Jerusalem Post, CDA Mag, и многи други публикации имаат пишувано за растечкиот тренд бренд на „Кафе де Анатолијa“ во светот. Никола Илиев и Моника Илиева се дел од Forbes Business Council и присуствуваа на Forbes Under 30 и Forbes 30/50 самитите по добиената ексклузивна покана од Forbes, организацијата за најуспешни млади претприемачи и бизнис-лидери од целиот свет, за 2022, 2023 и 2024 година.
Култура
Во галеријата „Рудиќ“ – годишна изложба на фотографии на фотоклубот ЕЛЕМА – Скопје
На втори април, во 19 часот, вторник, во Рудиќ галерија ќе биде поставена клубска изложба на фотографии, „ЕЛЕМА 2024“.
„ЕЛЕМА 2024“ е изложба која го означува креативниот и творечкиот континуитетот на ФК Елема низ долгите години постоење и промовирање на фотографската уметност.
Како прва годишна клубска изложба она ги најавува идните активности на Клубот кои секако ќе бидат претставени во периодот кој следи, со јасен акцент на индивидуалноста на авторите слободниот дух, секогаш со нов пристап и нови трендови кон создавањето на фотографијата за што ЕЛЕМА секогаш имала капацитет.
Ќе бидат изложени фотографии на реномирани македонски автори: Раде Луковиќ, Дејан Гилевски, Кирил Штрков, Вацлав Лукиќ, Цветан Гавровски, Владимир Арсовски, Катарина Николов, Драгољуб Николовски и Боро Рудиќ.
Култура
Костадиновска-Стојчевска: Ги исполнуваме препораките на УНЕСКО и заеднички овозможуваме трајна заштита на Охридскиот Регион
Министерката за култура и претседателка на Националната комисија за УНЕСКО, Бисера Костадиновска-Стојчевска, денеска во Охрид оствари работна средба со претставниците на реактивната мониторинг-мисија на УНЕСКО, која е составена од членови на Центарот за светско наследство, Меѓународниот совет за споменици и локалитети и Меѓународната унија за заштита на природата. Средбатата се одржа во Завод и Музеј – Охрид, а учество зедоа и членовите на Националниот координативен тим од нашата држава и директорката Ирена Шајн.
„Министерството за култура и Националниот координативен тим посветено работат на спроведување на препораките од УНЕСКО во делот на заштита на културното наследство. Не отстапуваме од грижата за Охридскиот Регион и зачувување на статусот на престижната листа на УНЕСКО. Уверена сум дека обединети, сите заедно, централната, локалната власт и невладиниот сектор во заедничка координација со забрзана динамика ќе продолжиме да ги исполнуваме насоките на УНЕСКО во подобрување на состојбите со реткото природно и културно наследство на нашиот регион“, потенцира Костадиновска- Стојчевска.
На средбата стана збор за актуелните состојби поврзани со заштитата на културното наследство во Охридскиот Регион, начините за надминување на предизвиците и напредокот што го има остварено државата во однос на последните препораки на УНЕСКО.
Министерката со македонските експерти ги информира членовите на реактивната мисија за сите реализирани, како и за тековните активности поврзани со препораките, како што е донесувањето на стратегискиот план за рехабилитација на природното и културното наследство на Охридскиот Регион, изработката на правни документи, меѓу кои предлог-закон за управување со светското природно и културно наследство и предлог-закон за изменување и дополнување на Законот за прогласување на старото градско јадро на Охрид за културно наследство од особено значење.
Беше дискутирано и за завршените активности за заштита на дрвената платформа во Заливот на коските, пристапот до заштитените културни добра, изработката на „упатство за иматели на недвижни културни добра во Охридскиот Регион – светско наследство на УНЕСКО“, со цел да им се помогне на имателите на недвижни културни добра во Охридскиот Регион да ги исполнат своите права и обврски.
Средбата беше дел од агендата на тридневната заедничка реактивна мониторинг-мисија на членовите од Центарот за светско наследство на УНЕСКО, Меѓународниот совет за споменици и локалитети (ИКОМОС) и Меѓународната унија за заштита на природата во прекуграничното светско наследство „Природно и културно наследство на Охридскиот регион“ во Република Албанија и во Северна Македонија.