Нова поетска книга „Танцот на времето“ од поетесата Ели Маказлиева

Во издание на „Бата прес“ излезе од печат најновата поетска книга „Танцот на времето“ од поетесата Ели Маказлиева. Објавувањето на делото е поддржано од Министерството за култура и туризам како проект од национален интерес во литературата.

Рецензентката Елизабета Бандиловска, за „Танцот на времето“, меѓу другото, пишува: „Станува збор за современо поетско остварување кое носи лирска, емоционална и филозофска рефлексија за човековото постоење, минливоста на животот и препознатлива топлина што допира до универзалните теми во животот што брзо и ритмички минува.

Книгата е ново, свежо поетско остварување во кое авторката со зрела поетска мисла на суптилен и длабоко емотивен начин низ стихови го истражува текот на времето и неговата минливост. Книгата е дело кое преку стихови создава жива сила што го обликува човекот, неговите чувства, спомени и соништа правејќи блискост до широк круг љубители на поезијата.

Во два циклуси, преку лирски израз исполнет со сензибилитет и симболика, Маказлиева создава поетски свет во кој минливото добива трајност, а секој миг носи своја внатрешна тежина и значење.

Ова издание претставува значаен придонес во современата македонска поезија и уште една потврда за континуираниот творечки пат на авторката.

Книгата ќе биде промовирана денес во 18:00 часот во Промотивниот центар на Саемот на книгата, во салата „Борис Трајковски“. Промотивна реч ќе има проф. д-р Елизабета Бандиловска, а стихови ќе чита и настанот ќе го модерира актерката Софија Насевска Трифуновска.