Сакам да потенцирам особено овде од Кичево, една работа која е дел од лудилото и стравот од пораз на СДСМ и ДУИ а тоа е онаа брутална кампања која овие денови се води кон ВМРО-ДПМНЕ од страна на Зоран Заев и ДУИ особено во делот од медиумите кои се во албанскиот блок чија задача е да се оцрнува нашата партија, истакна претседателот на ВМРО-ДПМНЕ, Христијан Мицкоски, на митингот во Кичево.

„Си велам каква само каша им е во главата кога соочени со страв панично смислувале теми како да нападнат. Сите советници на Заев избегаа зошто постојано ги лажеше, му останаа само оној Филипче и оној Љупчо Николоски – Путерот па им текнало дека ќе разгоруваат етнички тензии и ќе кажат дека ВМРО-ДПМНЕ биле националисти. Па за да го засилат впечатокот ДУИ ќе повика на мобилизација против ВМРО-ДПМНЕ, и сето така тоа ќе биде филувано во дел од новоформирани портали на албански јазик кои е јавна тајна дека се под патрон на еден млад вечен советник, а повремено министер од ДУИ, кој, пак, велат поискусните од мене, своевремено прв трчал во Парламентот да ги гласа владите на ВМРО-ДПМНЕ. И бил често виден гостин во еден скопски хотел во центарот на градот. И нескриено се воодушевувал на сите политики од тоа време, а сега поради пари, пусти пари и моќ дехидрира од плукање врз мене и ВМРО-ДПМНЕ. И во таквиот занес токму Заев заедно со тие неколкумина околу него подгреваат сосема свесно етнички тензии. Зошто? Само за тоа што фотелјата и тие пусти пари, слава и моќ им се важни“, рече Мицкоски.

„Сега е совршено јасно зошто никој не брка криминалци, затоа што полицијата на Спасовски и Заев се занимава со пишување  казни и на малтретирање луѓе за нешто што не го направиле. Таквата дружина раководена од Спасовски се осмелила полициската служба да ја користат за партиски, наместо за државни цели, еден вид  параполициски структури за партиски цели. Тоа го нема ниту во Танзанија“, рече Мицкоски.

Мицкоски повика на обединување против власт,а а излезноста, како што рече, е клучот за тоа.

Како поминува времето до денот на гласање, притисоците, пропагандната машинерија на власта, обидите за поткуп на вашиот глас се засилуваат. И тоа го прават не затоа што се моќни, туку затоа што се слаби и знаат дека ќе загубат. Само слаба власт посегнува кон злоупотреба на моќта на државата. И тука сакам да потенцирам неколку работи. Лудилото во кое се наоѓаат пред сè поради стравот од пораз кој ќе им се случи е толку големо што тие посегнаа да шират невистини, да подгреваат тензии, да измислуваат работи, рече лидерот на ВМРО-ДПМНЕ, Христијан Мицкоски, на вечерашниот митинг во Кичево.

„Овие денови ми доаѓаат информации од повеќе општини и градови како локалните функционери на СДСМ се закануваат до вработените во администрацијата, создавајќи страв дека доколку дојде во промена на власта, ВМРО-ДПМНЕ ќе ги брка од работа. Ние не сме Зоран Заев, живи луѓе не јадеме“, рече Мицкоски.

Затоа, кажа Мицкоски, испраќам порака до тие луѓе да не се плашат.

„Сигурни се нивните работни места и на овие избори да излезат на гласање и слободно и независно од  какви  било притисоци да си ја изразат својата волја позади параванот. Не плашете се затоа што тие кои го велат тоа, треба единствено тие да се плашат, затоа што јас ги гледав во очи и им велев ќе одговарате за сите криминали. Луѓето кои работат за плата не смеат да бидат цел на политички прогон, ниту, пак, ми паѓа на памет да правам некаква одмазда кон недолжни граѓани. Треба и конечно да заврши времето кога луѓето кои се недолжни да треперат за тоа дали ќе се промени власта затоа што може да останат без работа. Јас и градоначалниците на ВМРО-ДПМНЕ ќе се занимаваме со работа, проекти и развој, и за тоа е потребен секој еден човек, а не со чистки, притисоци и реваншизам“, рече Мицкоски од Кичево.

Мојата визија за Скопје предвидува овозможување на современи услови за учење за нашите деца. Мора да имаме соодветни модели за одржување на образовниот процес за младите и тие тоа го заслужуваат во 21 век. Со брзи и ефикасни решенија ќе им покажеме на сите наши млади дека местото им е тука, дома и дека треба да останат во Скопје, нагласи кандидатката за градоначалник на Град Скопје, Данела Арсовска, на денешната панел дискусија на тема „Младите во градот Скопје, младите во центар“.

Во ера на дигитализација Арсовска изјави пред учесниците во панелот дека е потребно да се вложува во младите кои се дел или кои имаат афинитети во ИКТ (информатичка, комуникациска и телекомуникациска) индустријата. Таа додаде и дека ќе се залага за младите луѓе, преку транспарентен процес за избор на Совет на млади, дигитализирање на сите информации за млади со еден клик, преку проектот Е-млади, дигитализација на средните училишта и проектот за е – Младински културен центар.

„Ќе вложиме не само во основни средства, туку и во информатичка опрема за секој ученик со којашто ќе може да располага и секој наставник. Ќе им помогнеме на младите претприемачи. Во рамки на МКЦ преку процес на социјално претприемништво и во соработка со невладиниот сектор ќе почне со работа Центар за младинско претприемништво“, изјави Арсовска од денешната панел-дискусија со младите во општина Центар.