Со цел зголемување на производството на електрична енергија од обновливи извори, како и за намалување на трошоците за електрична енергија, на институциите формирани од општините и на предлог-објекти од општините се реализираше Проектот за проектирање и поставување  фотоволтаични системи во 36 општини и на 108 јавни објекти.

На барање на Владата, Европската Унија (ЕУ) се согласи да обезбеди 15,5 милиони евра за развој на руралната инфраструктура. Вкупниот износ на Програмата, вклучувајќи го и кофинансирањето од страна на Владата, изнесува 20,667 милиони евра. Програмата ја имплементираше Министерството за финансии, во соработка со Светската банка како посебен сегмент за ИПА-рурални инвестиции во рамките на проектот за подобрување на општинските услуги. Овие средства на општините им се доделуваат во форма на грантови за да ја подобрат инфраструктурата во руралните средини.

Во рамките на Министерството за финансии-МСИП, Проект за подобрување на општинските услуги со средства од ЕУ ИПА-грант успешно се реализираше Проектот за проектирање и поставување фотоволтаични системи во 4 региони и тоа:

– Источен Плански Регион, 11 општини: Берово, Виница, Делчево, Карбинци, Кочани, Македонска Каменица, Пехчево, Пробиштип, Чешиново-Облешево, Штип, Зрновци;
– Југозападен Регион, 10 општини: Вевчани, Дебарца, Македонски Брод, Охрид, Дебар, Кичево, Пласница, Струга и Центар Жупа и Ресен;
– Полошки Плански Регион, 9 општини: Јегуновце, Маврово и Ростуше, Боговиње, Брвеница, Врапчиште, Гостивар, Желино, Теарце и Тетово; и
– Североисточен Плански Регион 6 општини: Кратово, Крива Паланка, Куманово, Ранковце, Старо Нагоричане и Липково.

Фотоволтаичните системи се поставени во објекти на вкупно 68 училишта, од кои 11 за средно и 57 за основно образование. Од нив, 58 фотоволтаични системи се поставени на училишните згради и 10 на спортските сали при училиштата. 6 фотоволтаични системи се поставени на детски градинки, 18 на општинско-административни објекти, 2 системи на домови на култура, 3 на спортски општински сали и по 1 фотоволтаичен систем e поставен на здравствен дом, територијална единица за противпожарна заштита и тренинг-центар.

За намалување на трошоците за електрична енергија кај јавните субјекти инсталирани се 3 фотоволтаични системи на пречистителни станици за отпадни води, и тоа во Берово, Кичево и Македонски Брод, како и 4 системи на фабрики за вода за водоснабдителен систем (Штип, Струга-Шум, Гостивар и Тетово) и една пумпна станица за водоводен систем во Карбинци.

Кај ваквите објекти, каде корисникот работи 24 часа и е голем потрошувач, заштедите во потрошена електрична енергија може да изнесуваат од 28 до 82%, или 45% во просек месечно, односно 1.000 евра по објект за месец. Кај осумте вакви објекти со вградени фотоволтаични системи, заштедата годишно може да изнесува 96.000 евра.

Во јавните објекти од типот на општински-административни згради, училишта, градинки културни домови и слично (мали потрошувачи), заштедите во потрошена електрична енергија месечно може да изнесуваат од 20-76% (просечно 45%) што изнесува 80 евра по објект месечно. На 100 вакви објекти вградени се фотоволтаични системи и заштедата кај нив годишно може да изнесува 96.000 евра.Вкупната заштеда на средства за сите 108 објекти годишно може да изнесува околу 190.000 евра, соопшти Владата.

Преку ноќта беше претежно облачно со повремен дожд на истокот и југоистокот. Утринава врнежи има и во делови од Пелагонија и во Скопје.

Во текот на денов на запад ќе биде променливо облачно со сончеви периоди, а преку централните делови и особено на исток ќе има зголемена облачност со повремени врнежи од дожд со слаб до умерен интензитет. Врнежите попладне ќе престануваат. Ќе дува слаб претежно северен ветер. Дневната температура ќе биде во интервал од 11 до 16 степени.

Во Скопје умерено до значително облачно и со слаб северен ветер. Температурата ќе достигне 16 степени.

Во Македонскиот народен театар со почеток во 19:30 часот во организација на Министерството за политички систем и односи меѓу заедниците ќе се одржи Свечената академија по повод прославата на Денот на албанската азбука.

Денот на албанската азбука или Битолскиот конгрес го одбележува состанокот на десетици албански научници кои од 14 до 22 ноември 1908 година се состанале со цел создавање на албанската азбука. На Битолскиот конгрес делегатите од Албанија и албанските здруженија и клубови од целиот свет донеле одлука за прифаќање на латиницата со некои промени, адаптирајќи 36 букви на албанскиот јазик. Со тоа, 22 ноември останал како ден за помнење на албанскиот народ, познат како Ден на албанската азбука.

Министерството за политички систем и односи меѓу заедниците организираше серија настани по повод прославата на Денот на албанската азбука. Централната манифестација – Свечена академија, ќе се одржи во Македонскиот народен театар, со почеток во 19:30 часот на која ќе присуствува претседателот на Владата, претседателот на Собранието, министри, претставници од политичките партии, претставници на дипломатскиот кор, истакнати личности од општествениот и политички живот во Северна Македонија.