Македонија
Арсовска во Чаир: Чаршијата ќе стане култно место, извор на соживотот во Скопје

Независната кандидатка за градоначалник на Скопје, поддржана од ВМРО-ДПМНЕ, Данела Арсовска, истакна дека еден од приоритетните проекти од нејзината програма за Чаир и Скопје е Старата чаршија, која, како што рече, мора да стане култно место за градот велејќи дека со тоа ќе се врати соживотот во Скопје.
„Ние мораме да ги вратиме луѓето во Чаршијата. Да стане култно место. Од исклучителна важност е да ги заживееме Чаршијата и занаетите, да ја зголемиме нејзината туристичко-економска понуда и да ја направиме уште еднаш сврталиште на сите скопјани. Градот ќе посвети дополителна грижа, во рамките на своите надлежности, на зачувување и популаризација на Куршумли ан, Капан Аан, Сули ан, Чифте амам, Даутпашиниот амам и Безистенот. Ќе работиме и на целосно соодветно осветление на Чаршијата, поддршка и промоција на старите занаети, олеснување на пристапот до Чаршијата и нејзина популаризација. Ќе дадеме и поддршка за организирање голем број културни настани на просторот на Старата чаршија. Тука повторно ќе го оживееме соживотот во Скопје“, порача таа вечерва пред граѓаните на општина Чаир.
Посочи дека врвен фокус ќе бидат и проширувањето и реконструкцијата на една од главните артерии на градот, булеварот Цветан Димов.
„Оној ист булевар што го ветија и го заборавија ќе го опремиме со уште по една дополнителна лента, како и надвозник од мостот ‘Бит-пазар’ до ‘Христијан Тодоровски – Карпош’. Оваа делница ќе претставува ефикасен и брз конектор на општините Чаир, Бутел и Центар“, истакна Арсовска.
Во соработка со општинската власт вети и нови катни гаражи и паркиралишта кај „Чаирчанка“, амбулантата во Чаир и Топанско Поле.
„Ќе проектираме и нов крак на улицата Боца Иванова од кружниот тек до булеварот Христијан Тодоровски – Карпош, ќе ја прошириме ‘Македонско-косовска бригада’ и ќе обезбедиме брз и лесен превоз на сите граѓани. Но, нема да ги заборавиме и новите велосипедски патеки, кои ќе го поврзат Чаир со Центар и Бутел“, изјави кандидатката за градоначалник на Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Намалена видливост поради магла на Попова Шапка

Сообраќајот на државните патишта се одвива непречено, по наместа влажни коловози. Намалена видливост поради магла 50-60 метри има на Попова Шапка, информираат од АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
За влез во Влада Алијанса нека ги спречи автобусите со млади од Тетово и Гостивар кои ја напуштаат Македонија, побара Мицкоски

Лидерот на ВМРО – ДПМНЕ, Христијан Мицкоски, побара Алијанса за Албанците да покаже програма за да може да се разбере нивната желба за влез во Владата. Нагласи дека програма за влез во Влада со реформи за подобар живот на граѓаните не слушнал од ниту една политичка партија ниту пак од политичарите од Алијанса за Албанците.
„Во ред, еве го смениле мислењето, не сакаат повеќе да бидат опозиција, сакаат да бидат власт. Не можам да ги оправдам, но ги разбирам. Ќе ги разберам до крај ако видам платформа со која ќе ги спречат автобусите од Гостивар и од Тетово на млади луѓе да ја напуштаат Македонија и да кажат ние со оваа политика ќе ги спречиме тие луѓе. Ќе ги повикаме да се вратат назад“, рече Мицкоски.
Од Алијанса за Албанците, како политичка партија со многу лекари, Мицкоски вели дека очекувал да понуди платформа во здравството со која ќе понудат услуги кои пациентите ги заслужуваат.
„Не нудат програма, а велат ќе влеземе во Влада. Се поставува прашањето за што ако не за фактот да им се придружат на овие кои го крадат македонскиот народ. Еве нека ми каже некој со кој друг аргумент тие може да го оправдаат нивниот влез во Владата ако не е ова. Не гледам програма“, рече лидерот Мицкоски.
Тој и денес повика час поскоро да се организираат предвремени парламентарни избори оти во спротивно вели дека ќе се зголеми бројот на автобуси кои ја напуштаат Македонија.
Македонија
Место да ја плукате и мразите Македонија, подобрете го стандардот, за 30 отсто е намален бројот на жители во Бугарија, порача Мицкоски

Лидерот на опозицијата Христијан Мицкоски ги повика македонските власти да престанат со аматеризмот кога се работи за македонско – бугарските односи и понуди помош и поддршка со застанување во прв ред, доколку одлучат да донесат одлука за заштита на македонските национални интереси.
Мицкоски вели дека и покрај сите отстапки, „свитканата кичма“ и се што оваа Влада попушти против интересите на народот, политичкиот аналфабетизам не довел до тоа да трпиме лавина критики и навреди од политичарите од северниот сосед со кои како некој намерно да сака да ја втурне државата во процес во кој ќе се политизира европската интеграција. Тој смета дека е крајно време да се престане од политички маргиналци да се создаваат политички херои па јавно упати пораки и до македонските власти до бугарските политичари.
„Мојата порака до македонските власти е да престанат со овој тип на аматеризам аналфабетизам и егзебиционизам и се што е во заштита на македонските национални интереси ВМРО-ДПМНЕ е тука да поддржи, да застане во првите редови. Мојата порака до бугарските политичари е да се посветат на подобрување на стандардот во нивната Бугарија наспроти тоа да градат кампања на тој кој повеќе ја мрази и кој повеќе плука по Македонија и по Македонците. Затоа што изминативе 30 години за 30 % е намален бројот на жители во Бугарија. Не случајно тие бегаат од Бугарија и покрај тоа што е земја членка на ЕУ, тие немаат доверба во политичарите што се таму. Гледаат дека наместо да работат за интересите на Бугарија работат за лични интереси и се богатат, нешто слично како што се случува и овдека, она што го работи Владата на ДУИ поддржана од СДСМ“, рече Мицкоски.
Тој смета дека политичарите треба да разберат дека треба да бидат слуги на народот, а не да работат само за своите лични потреби и да ги задоволуваат своите хедонистички потреби.