Македонија
Арсовска: Со промена на проектот за улицата Васко Карангелевски, вреден над 77 милиони денари, зачувуваме над 100 дрвја

Дрворедот на улицата Васко Карангелески ќе биде целосно зачуван, претходниот проект со реконструкцијата предвидувал сечење на дрворедот на потегот на целата улица. Со новиот проект ќе се зачува целото зеленило и ќе се посадат нови 30-ина дрвја, истакна градоначалничката на град Скопје, Данела Арсовска.
„Првичниот проект на улицата предвидуваше целосно отстранување на 100-ина дрвја за да може да се изврши реконструкцијата. Се направи промена на планот како да се зачува дрворедот и да се зголеми бројот на дрвја и на овој потег. Дрворедот пред пензионерскиот дом ќе биде целосно зачуван, над 100-ина дрвја, стари 100-ина години на овој потег, ќе ги зачуваме, а веќе беа пресадени 16-ина здрави дрвја заедно во соработка со Општина Аеродром, тие се веќе пресадени на потегот кај основното училиште ‘Љубен Лапе’“ изјави Арсовска на денешниот увид на градежните работи.
Таа рече дека барањето да се отвори оваа улица и да се реконструира овој потег е по барање на голем број граѓани што гравитираат на овој потег и на голем број јавни објекти, кои се во интерес на граѓаните, а со што би се растоварил сообраќајот на овој потег.
„Вредноста на улицата е 77,5 милиони денари, а рокот за изградба во должина од еден километар е 2023 година, чија реконструкција ќе биде и реализирана од страна на Град Скопје, добиваме голема поддршка од граѓаните за реконструкција на улицата и со новата промена на проектот успеавме да направиме заштита на дрвјата“, истакна Арсовска.
За градоначалникот на Аеродром, Тимчо Муцунски, измената на проектот значи многу за граѓаните на Аеродром, како и дека досега за само неколку месеци се засадени над 400 нови садници за зголемување на зеленилото во општина Аеродром.
„Јас и градоначалничката Арсовска апсолутно сме посветени кон реализација на нашите ветувања. Поврзано со овој проект, ветивме дека ќе има нови сообраќајни решенија и токму тоа и го има. Дека ќе биде спасен дрворедот, апсолутно се спасува дрворедот. Според претходниот проект, како што објасни градоначалничката Арсовска, требало над 100 дрвја да бидат целосно исечени, сега сите тие дрвја ќе бидат спасени. Во однос на нашите заложби поврзани со засадување нови дрвја, морам да истакнам дека во последните неколку месеци, од ноември, на територијата на општина Аеродром имаме над 400 нови садници, што значи дека ние работиме посветено на нашите ветувања. Овој проект е од огромно значење, што обезбедува сериозно сообраќајно решение, бидејќи сите сме свесни за сообраќајниот хаос во кој е оставен градот. И тука е потребно да се реализира, ќе се реализира во согласност со нов проект, а граѓаните на крајот ќе бидат сведоци дека дрвјата и овој многу значаен дрворед за дел од општина Аеродром, каде што јас сум израснал, целосно ќе биде спасен и ние го реализираме сето она што заедно со градоначалничката Арсовска во текот на кампањата го ветивме“, изјави Муцунски.
Директорот на ЈП „Паркови и зеленило“, Ангеле Сотировски, посочи дека стручни лица од Градот и ЈП „Паркови и зеленило“ извршиле увид и процена, според која само дивоизраснатите дрвја штетници биле отстранети.
„Поврзано со сечењето на 10-те дрвја, мораме да потенцираме дека тоа се десет дивоизраснати дрвја, кои беа на неодредена површина. Морам да напоменам дека сѐ што е сечено претходно е по налог на претходната градска власт. Пред да бидат исечени овие дрвја екипи излегоа на терен за процена и мора да се знае дека покрај тоа што тие дрвја се дивоизраснати, имаат и специфична коренова структура и имајќи предвид дека станува збор за кисели дрвја, кои се штетници, и имајќи предвид дека тука минува подземната инсталација, едноставно не можеше да бидат пресадени“, изјави Сотировски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Лефков објави видео од хаосот во Собрание

Пратеникот од ВМРО-ДПМНЕ, Миле Лефков објави видео на Фејсбук од хаосот во Собранието.
Од опозициската партија велат дека претседателот на Собранието, Талат Џафери ги заклучил внатре.
„ Заклучени пратеници и хаос во Собрание! Диктатурата на ДУИ/СДСМ олицетворена во Талат го покажува грдото лице во Собрание!“.
Македонија
Џафери ги заклучи вратите на салата во Собранието и ги исклучи микрофоните

Собранискиот спикер Талат Џафери побара да се заклучат собраниските врати од салата за да службите пребројуваат пратеници, а пратениците на ВМРО-ДПМНЕ жестоко реагираа и посочија дека тоа се прави со цел во салата да не можат да влезат и други пратеници. По заклучувањето на вратите, пратениците прашуваа врз основа на што заклучува собраниски врати, а тој одговори: „Деловникот“. Пратеници
„Немате право да зборувате во прво лице“, рече Силјановска, а тој одговори: „Вас во петто ќе ви зборам, оди седи таму не ви дадов збор“, а пратеничката врати: „Знаете каде ви е вам местото“
Џафери на реакциите да не заклучува врати, посочи: „Јас наредувам. Спушти камера, затворете врата. Пребројте пратеници колку има“, а пратениците се собраа околу неговиот пулт. Џафери одново реагираше: „Тргни се од тука, не сум те повикал. Тргни се од тука. Седете на свои места“.
„Кој ти дава право да заклучиш сала?“ одново го праша Никола Мицевски, координаторот на пратеничката група на ВМРО-ДПМНЕ, а Џафери кажа: „Деловникот“.
„Правото на движење е мое право“, му одговори Мицевски, а Џафери возврати: „Јас сум претседател на Собранието“.
„Кој ти дава право да не заклучуваш тука? Не сум ти затвореник јас тебе. Врз основа на што ме држиш?“, реагираше Мицевски, a Џафери возврати со ист одговор: „Деловникот“.
Бидејќи микрофоните во салата беа исклучени, а јавноста не може во живо да ги следи седниците поради тоа што Собранието нема можност за тоа, пратеникот Бојан Стојаноски се обрати до јавноста преку социјалните мрежи:
„Автократот ги исклучи микрофоните. Неколку пати ги заклучуваат вратите, за пратениците од надвор да не можат да влезат во Собранието. Вака не се одлучува демократски. Ова е срамота, насилие. Ова се случува по скандалозното однесување кон собраниските службеници“, кажа Стојаноски.
Жестоката расправија во Собранието продолжи. Додека се правеше список за говорници, Џафери му даде процедурално на координаторот Никола Мицески.
„Заклучивте врата на пратеничка група надвор од секое поведение. Уставот вели дека движењето е неприкосновено. Си толкуваш деловник како сакаш. За што се боревте, за да не заклучат тука, да не киднапираат? Не сме ние Кастриот! Срамота е бе! Па Кастриот можете да го чувате на бели ѕидови, не пратеничката група на ВМРО-ДПМНЕ. Влегуваш од грешка во грешка, срамота е ова! Заклучувањето на вратата е скандал. Да заклучиш пратеници, 40 пратеници, кој ти дава право, која е таа сила?“, реагираше Мицески.
И Силјановска имаше жестока реакција.
„Пцуевте, пуаквте на избирачко место, што ли ќе доживееме од вас!“, реагира Силјановска.
Македонија
Османи – Дендијас: Грција продолжува да биде силен лобист за Македонија

Министерот за надворешни работи Бујар Османи денес беше домаќин на својот хомолог министерот за надворешни работи на Грција Никос Дендијас, кој допатува во работна посета на Северна Македонија.
За време на тет а тет средбата констатирана е подготвеноста за натамошно унапредување на стратешкото партнерство преку конкретни форми на соработка и ангажмани, што обезбедува поблиско поврзување меѓу двете држави и двата народа. Ваквата соработка претставува модел за целиот регион, за тоа каква треба да биде соработката и како успешно да се разрешуваат отворените прашања меѓу два соседи. Во тој контекст, се разговараше за исполнувањето на обврските од преспанскиот договор, како и влијанието на договорот врз севкупниот развој на односите и соработката меѓу Северна Македонија и Грција. Постигнатите резултати, беше нагласено, го надминуваат националното ниво и позитивно влијаат врз севкупните односи во регионот.
Соговорниците разменија ставови за најновите состојби во регионалната соработка, руската агресија врз Украина, соработката во рамките на НАТО, како и ЕУ портфолиото на Северна Македонија и останатите држави од регионот, меѓу другото и поради фактот што Грција продолжува да биде силен лобист за нашата интеграција.
„ Како НАТО сојузници ние имаме и обврска да се грижиме за регионалната стабилност и во оваа насока особено сум задоволен што имаме координиран пристап во интерес на регионот и на Европа”, нагласи Османи, аргументирајќи дека стартот на преговорите со Северна Македонија и Албанија претставува најдобриот начин да се врати европскиот кредибилитет во регионот, и во оваа насока додаде „особено ме радува фактот што ја имаме целосната поддршка на Грција“.
„ Се разговараше и за економската соработка, енергетското поврзување, кое е клучно за обезбедување на диверзификација во снабдувањето со енергенси, брзото оспособување и отворање на граничниот премини Маркова Нога-Лемос и туризмот.
Посетата на министерот Дендијас е втора посета на грчкиот шеф на дипломатијата во помалку од една година, што говори за неговата посветеност за иднината на нашите билатерални односи и за европската перспектива на нашиот регион. Министрите ќе имаат прилика да продолжат со серијата средби на претстојниот самит на Процесот за соработка на Југоисточна Европа кој ќе се одржи во Солун на почетокот на јуни, како и за време на вториот Преспа форум за дијалог на кој ќе учествува и министерот Дендијас, кон средината на истиот месец во Охрид.