Арсовска-Томовска: Јазот меѓу можностите и потребите на жените лидери се помал

Министерката за информатичко општество и администрација Марта Арсовска Томовска учествуваше на вториот ден од „Глобалниот самит на жени лидери 2017“, во организација на Сојузот на стопански комори на Македонија, а во соработка со Асоцијацијата на бизнис жени во Република Македонија.

Таа говореше на панелот „Лидери на дигиталната економија“, на тема: „Иднината, во време на дигитализација и мобилност“, при што се осврна на технологијата како професија која нуди многу можности, придонесува за отворање на нови работни места, и наоѓа примена во сите сфери на општеството.

Министерката воедно потенцираше дека Македонија уште во 2012 година од страна на Обединетите Нации, беше посочена како земја со најиновативен пристап во мотивирањето на младите жени и девојки да се вклучат во технологијата, преку иницијативата „Девојки во ИКТ“ која е се уште актуелна.

Истакнувајќи дека работните места во технологијата стануваат сé подефицитарни и дека јазот меѓу можностите и потребите е сé поголем, Арсовска Томовска порача дека информатиката не е само машка професија и дека на младите девојки и жени треба да им се сугерира да ја изберат, бидејќи оваа професија обезбедува сигурна иднина.

Дводневниот „Глобалeн самит на жени лидери 2017“, ги обедини жените кои се успешни во својата професија во најразлични области: политика, економија, дипломатија, претприемништво, новинарство. Учествуваа над 40 еминентни жени лидери во улога на панелисти и преку 300 гости од земјава и странство./крај/со/бб