Сообраќајот на регионалниот пат  Кочани кон Спортско-рекреативниот центар „Пониква“ на потегот од место викано „аеродром“ до паркингот кај објектот на МВР утре ќе биде во прекин.

СВР Штип ги известува граѓаните дека сообраќајот ќе биде во периодот од 8 до 16 часот поради одржување вежба на припадниците на МВР.

СВР Штип апелира до граѓаните да ги почитуваат наредбите што ги издаваат полициските службеници.

Лидерот на ВМРО-ДПМНЕ, Христијан Мицкоски, кој заедно со потпретседателот на партијата, Александар Николоски, е во Будимпешта на средба со унгарскиот премиер, Виктор Орбан, и министерот за надворешни работи, Петер Сијарто, изјави дека добиле недвосмислена поддршка за евроинтегративниот процес на Македонија.

„Утрото го почнавме со работен појадок кај министерот за надворешни работи, господинот Петер Сијарто, а денот го продолживме на еден работен состанок со претседателот на владата и големиот пријател на Македонија, господинот Виктор Орбан. Разговаравме за актуелната политичка и економска ситуација во Македонија, ги пренесоа нивните искуства во справувањето со ковид-пандемијата, која иста така се чувствува и овде во Унгарија.

Истовремено, зборувавме за блокираниот пат на Македонија во рамките на Европската Унија и нашите домаќини го споделија своето искуство како течеа преговорите кога Унгарија практично стануваше членка на Европската Унија.

Од страна на домаќините уште еднаш беше реафирмирана недвосмислената поддршка за Македонија, за македонскиот народ, за граѓаните на Македонија и недвосмислената поддршка во евроинтегративниот процес да Македонија еден ден да биде членка на Европската Унија.

Да напоменам дека еврокомесарот за проширување, господинот Оливер Вархељи, потекнува токму од нашата сестринска партија Фидеш. Ги продолживме разговорите за внатрешните случувања во рамките на ЕНП (Европската народна партија), се согласивме и го поздравивме изборот на новиот претседател на нашата сестринска партија ЦДУ во Германија и очекуваме плодна заедничка работа помеѓу сестринските партии на ВМРО-ДПМНЕ – Фидеш и ЦДУ“, истакна Мицкоски.

Претседателот Стево Пендаровски го прими шефот на делегацијата на Европската Унија во Република Северна Македонија, амбасадорот Дејвид Гир.

На средбата беа разменети мислења и информации за европските перспективи на Република Северна Македонија за можностите за почнување на пристапните преговори за членство во Европската Унија и за текот на имплементацијата на реформите во насока на исполнување на европските стандарди.

„Целосната интеграција на земјите од Западен Балкан во Европската Унија е суштинска гаранција за натамошен демократски развој, стабилност и просперитет на регионот. Ниедна земја членка на Унијата не смее преку поставување ирационални барања да ја доведува во прашање европската иднина на нашиот народ“, посочи на средбата претседателот Пендаровски додавајќи дека само преку дијалог и почитување на принципите и темелните вредности на Европската Унија и на меѓународното право може да се надминат билатерални разлики и предизвици.

Република Северна Македонија останува силно посветена на политиката на добрососедство и регионална соработка, истакна претседателот Пендаровски потенцирајќи дека почетокот на преговорите за членство ќе претставува дополнителен поттик за забрзување на реформите.

На средбата беа разменети мислења и за актуелните мерки и состојби во Европската Унија во насока на справување со пандемијата на Ковид-19, при што претседателот Пендаровски изрази благодарност за солидарноста и поддршката од ЕУ за здравствениот сектор, како и за финансискиот пакет со цел справување со социо-економските последици од пандемијата.