Државниот јавен обвинител Ненад Савески вчера првпат телефонски разговарал со премиерот Христијан Мицкоски.

Според информацијата од обвинителството, во разговорот не станало збор за детали од конкретни предмети, вклучително и за одлуката за запирање на истрагата за набавката на мазут за ТЕЦ Неготино.

„Јавниот обвинител на РСМ не може да спречи некого да му се јави телефонски. Вчера за првпат воопшто телефонски му се јави Претседателот на Владата на РСМ, но во разговорот во ниту еден момент не стана збор за детали од конкретен предмет, вклучително и за предметот за кој покажувате интерес. На прашање на Претседателот на Владата, во разговорот му беше кажано истото она што вчера беше јавно објавено од обвинителството во медиумите – дека предметот не е рефериран во републичкото обвинителство и дека државниот јавен обвинител за одлуката дозна по нејзиното донесување“, се истакнува во информацијата од обвинителството.

Од таму се додава дека предметниот јавен обвинител од ОЈОГОКК одлучува самостојно.

„Имено согласно чл.3 од Законот за јавното обвинителство, обвинителството се организира според принципите на хиерархија и субординација, но почитувањето на овие принципи не смее да ја загрози самостојноста и одговорноста на секој јавен обвинител во вршењето на функцијата“.

Во напишаното се додава дека уставно загарантираната самостојност на Јавното обвинителство се обврзани да ја почитуваат сите.

Одлуката за стопирање на истрагата за набавката на мазут е уште еден удар врз довербата на граѓаните во правосудниот систем, вели министерот за правда, Игор Филков во неговата реакција за запирање на истрагата за мазутот.

„Во време кога јавноста очекува расчистување на сомнежите за милионски криминал и злоупотреби, добиваме порака дека предмети од висок јавен интерес се затвораат без целосна разрешница.

Како министер за правда, сметам дека оваа одлука мора итно да биде преиспитана.

Очекувам целосна транспарентност од Обвинителството за гонење организиран криминал и корупција и јасни одговори врз основа на кои факти и аргументи е донесена ваквата одлука“.

Истовремено, како што вели, очекува Советот на јавни обвинители и надлежните институции да отворат прашање за одговорноста на Ислам Абази.

„Затоа што ваквите одлуки директно ја рушат довербата на граѓаните во правосудниот систем“.

Премиерот Христијан Мицкоски очекува случајот за набавка на мазут за ТЕЦ „Неготино“ во кој се осомничени поранешниот директор на ЕСМ, Васко Ковачевски, сопствениците на компанијата „РКМ“, Ерџан Сулкоски и Ратко Капушевски, Асмир Јахоски од „Пуцко Петрол“ и уште деветмина, да биде вратен на повторно разгледување. Основното јавно обвинителство за гонење организиран криминал и корупција (ОЈО ГОКК) соопшти дека ја сопира постапката оти по една година истрага не утврдиле докази за кривични дела.

„Јас вчера прво со неверување ја слушнав таа вест, а второ бев шокиран од тоа што го слушнав. Добро е што АД ЕСМ, поранешно ЕЛЕМ кога ќе ја добие одлуката ќе вложи жалба и очекувам дека случајот повторно ќе биде вратен на преразгледување и повторна анализа. Ако тоа не се случи, тогаш Обивнителството дефинитивно го губи својот кредибилитет со овој обвинител, сме го коментирале, Ислам Абази,  и немам дополнително што друго да кажам. Јавноста знае за каков обвинител станува збор“, рече премиерот Мицкоски денес одговарајќи на новинарски прашања по прошетката во обновените операциони сали во ГОБ „8 Септември“.

За одлуката за сопирање на постапката премиерот Мицкпски вели дека не знаел ниту државниот јавен обвинител.

„Сакам да кажам дека во текот на вчерашниот ден разговарав со јавниот обвинител Ненад Савески на оваа тема. Тој ме информираше дека не бил информиран за оваа одлука на ОЈО ГОК кое го води Ислам Абази. Претпоставувам дека по вложената жалба од страна на АД ЕСМ случајот ќе биде разгледан и вратен на повторно анализирање“, рече премиерот Мицкоски.

ОЈО ГОКК вчера извести дека ја запираат истрагата оти од прибраните докази не се утврдило дека осомничените незаконски склучувале договори и анекси, переле пари или направиле злоупотреби при јавните повици за набавка на мазут за ТЕЦ „Неготино“. Истрагата утврдила дека постапките биле спроведувани согласно законите и транспарентно.