Вицепремиерот задолжен за европски прашања, Бујар Османи, се сретна со претставниците од Министерството за надворешни работи на Сојузна Република Германија, Кристијан Хелбах и Томас Осовски кои се во работна посета на земјава.

„Од аспект на европските интеграции Германија отсекогаш сме ја сметале за наш стратешки партнер, во чии иницијативи ги наоѓаме мотивацијата и перспективите за нашиот успех“, изјави Османи изразувајќи огромна благодарност за континуираната поддршка од страна на СР Германија за нашите напори во исполнувањето на препораките на ЕУ како и за севкупните активности на Германија во насока поддршка на политиката на проширување на ЕУ на земјите од Западен Балкан.

За време на средбата Османи се осврна на динамиката на спроведување на реформите предвидени во План 18, при што посочи на континуитет на реформскиот процес преку конкретен напредок во клучните реформски области – правосудството, безбедносните и разузнавачките служби, реформата на јавната администрација и борбата против организираниот криминал и корупцијата, кои ќе претставуваат основа за овогодинешниот извештај на Европската Комисија, а воедно изрази и уверување дека истиот по квалитет ќе го замени минатогодишниот.

„Во периодот кој ни претстои неопходна ни е поддршка од страна на сите наши пријатели внатре во Унијата за да ја прошириме европската приказна на Балканот, и да го отстраниме европскиот скептицизам преку конфирмација на одлуката за отпочнување на преговорите со Република Северна Македонија на јунските самити на Европската Унија“, истакна Османи.

Министерството за труд и социјална политика соопшти дека со новиот правилник за листата за видовите телесни оштетувања, врз основа на кои се стекнува со правото на паричен надоместок и процентите на оштетувањата, воведува надоместок и за жените коишто имаат обострана ампутација на дојка.

Досега право на надоместок имаа само жените со еднострана и обострана радикална ампутација на дојка. Воведувањето на ова право од пензиско инвалидско осигурување е на барање на повеќе Здруженија на жени за борба против ракот на дојка.

Од Министерството велат дека во новиот правилник, којшто веќе е на сила, се воведува и табеларно прецизно утврдување на острината на видот и процентите на телесно оштетување според острината на видот. Исто така е подобрен и целиот текст на самиот правилник.

Претседателот на Судскиот совет, Зоран Караџовски, пристигна во Обвинителството за гонење организиран криминал и корупција. Тој е повикан на распит во oбвинителството да даде исказ за предметот со спорната одлука за покачените плати на членовите на Судскиот совет од минатата година.

Надлежниот обвинител за гонење организиран криминал и корупција истражува евентуална кривична одговорност за злоупотреба на службената положба и овластување и нанесена штета на буџетот со исплата на додатоците кои не се пропишани со Законот за плати на членовите на Судскиот совет.

Oсновното јавно обвинителство за гонење организиран криминал и корупција во декември минатата година оформи предмет по допрен глас по објавите на медиумите за донесените одлуки на Судскиот буџетски совет за обезбедување средства за исплата на додатоци на плата, со кои за членовите на Судскиот совет се определува да се исплатат додатоци во висина од 35 отсто од основната плата.Како што соопшти тогаш ЈОРМ, обвинителството ќе ја испитува основаноста на донесените одлуки за исплата на додатоци на плата за членовите на Судскиот совет и извршената исплата.

Надлежниот јавен обвинител истражува евентуална кривична одговорност за злоупотреба на службената положба и овластување и нанесена штета на буџетот на Република Македонија со исплата на додатоците кои не се пропишани со Законот за плати на членовите на Судскиот совет.