Заврши состанокот на Централниот одбор на СДСМ, на кој присустваа повеќе градоначалници, министри, заменици и пратеници од владејачката партија.

Како што изјави генералниот секретар, Љупчо Николовски, на состанокот биле избрани повеќе нови членови на партиските комисии, а за координатор на Форумот на жени ја избрале пратеничката Снежана Калевска-Ванчева.

За претседател на комисијата за внатрешни работи е избран Зоран Верушевски, за здравство Венко Филипче, за култура Роберт Алаѓозовски, за надворешни работи Едмонд Адеми, за транспорт Благој Бочварски, за информатичко општество Драган Гоцевски.

Николовски исто така соопшти дека партијата формирала и нова комисија за спроведување на политиките од концептот „Едно општество за сите“.

Заврши состанокот на Централниот одбор на СДСМ на кој во проширен состав, во присуство на повеќе градоначалници, министри, заменици и пратеници, беше донесена одлука за нова декларација за поддршка на раководствосто на СДСМ и власта, во насока на тоа да продолжи бескомпромисната борба со криминалот и корупцијата за сите предмети и за јакнење на правната држава.

„Последните случувања покажуваат дека постои целосен заштитен механизам што функционира на релација граѓани – МВР – Обвинителство што може да се справи со крининал и корупција, а сите се еднакви пред законот“, изјави генералниот секретар на партијата, Љупчо Николовски.

Во однос на функционерите за кои има сомнежи во јавноста дека се вмешани во рекет, Николовски кажа дека е потребна темелна истрага за целосна борба против криминалот и корупцијата.

На прашање дали на состанокот биле присутни функционерите со псевдоними Кики и Фрики, кои се споменуваат дека се замешани во случајот, Николовски не сакаше конкретно да одговори, потенцирајќи дека состанокот се одржал во проширен состав и дека биле присутни повеќе пратеници, министри, градоначалници и членови на ЦО.

Во врска со утрешната лидерска средба, генералниот секретар на партијата рече дека ќе се одржи и дека ќе се разговара за пописот, СЈО и изборниот законик.

Како што кажа, на Централниот одбор на СДСМ не станало збор за предвремени избори.

На првото собрание на ДУИ што се одржа во Сарај пред партискиот конгрес свое обраќање имаше лидерот на партијата, Али Ахмети, кој зборуваше за, како што рече, пропагандата која сите на див начин и како волци ја организираат против ДУИ.

„Каде им се фактите, нека покажат еден аргумент од десетиците илјади прислушкувања дека некој од ДУИ ја има злоупотребено власта и довербата, дали овие луѓе мислат дека Албанците пасат трева и ќе нè казнат нас поради приватни разговори, тие може да имаат краткотраен ефект, но подоцна граѓаните ќе почнат да размислуваат“, истакна претседателот на партијата.

Ахмети рече дека како лидер на ДУИ прв ќе ги поздрави издржаните докази против функционери од неговата партија.

„Дали некој украл, нека ги дадат прислушкувањата, дали некој дал наредба за противзаконско дејствување, јас ќе ги поздравам прв од ДУИ ако ги даваат овие факти, но такви нема затоа што ние не сме избрани за да ја изневериме довербата на гласачите. Јас не велам дека нема и ѓаволи, ајде да ги пронајдеме, но не со празни зборови туку со одредени дејствија“, посочи тој.

Во излагањето се задржа и на тоа што ДУИ го направила за Албанците во земјава.

„Да застанеме и да направиме анализа кој направил најмногу за оваа земја, на сè што е направено, не само напишаното, но и документираното во сите области на дејствувањето, од националното знаме до унивезитетите, јазикот, културата, што се подигнаа на повисоко ниво“, посочи Ахмети.

Воедно истакна дека ДУИ како движење има цврста историја затоа што е дел и продолжение од отпор пред освојувачите и оние кои, како што рече, сакаат да ги искоренат Албанците од оваа земја.

„Останува оваа обврска, ова богатство, дека народите и граѓаните со фанатизам ги чуваат изградените вредности. Ако на Ирците им ја чепнеш Шин Фејн или ИРА, која произлегува како ДУИ од ОНА, ќе ти ги искорнат очите затоа што се повредува историјата, вредноста. Но и ние треба со фанатизам и со голема посветеност да ги зачуваме и збогатиме овие вредности, но да не ги засрамиме ни нашите предци, ниту нашите соборци, затоа што човек од лакомост може да направи и погрешни потези, но ние секогаш треба да го имаме компасот затоа што потекнуваме од една организација и механизам што има пролеано крв и безбројни жртвувања“, истакна лидерот на ДУИ во рамките на неговото обраќање на Изборното собрание на ДУИ во Сарај.