Македонија
(Видео) Дворски игри за избор на обвинители – Штерјев и Јовески се сретнале пред одлагањето на седницата

Утрово, како што дознава „Макфакс“, Коле Штерјев, претседателот на Советот на јавните обвинители, пред почетокот на седницата бил во републичкото Обвинителство, каде што се сретнал со државниот јавен обвинител на тема избор на обвинители.
Јовески не одговараше на мобилниот телефон, а пред новинарите рече дека не стигнале на седницата да разговараат за конкретни имиња. Штерјев, пак, побрза на новинарите да им соопшти дека причина за одлагањето е прибирање дополнителни податоци. Неофицијално, на средбата во Обвинителството станало збор за одредени предлози за обвинители, кои Штерјев сакал да ги протурка, на што се спротиставил Јовески.
Меѓу „проблематичните“ имиња со желба да стане виш јавен обвинител во Скопје е обвинителката Лејла Кадриу, која Катица Јанева, поради неразјаснети околности, ја избрка од тимот. Кадриу во политичките кругови важи за блиска до ексвицепремиерот Муса Џафери.
Советот на јавните обвинители попладнево ја одложи денешната седница на која требаше да бидат избрани 17 шефови на обвинителства во државата, меѓу кои и на скопското и на Обвинителството за гонење организиран криминал и корупција.
„Треба да се подготват уште некои податоци што се значајни за донесување на одлуката“, рече Штерјев, но не прецизираше за што конкретно станува збор, односно кои се документите што дополнително треба да се обезбедат, особено ако се има предвид фактот дека огласот за избор на обвинители е објавен во февруари.
На новинарско прашање колку кандидати се пријавиле за Обвинителството за организиран криминал и корупција, рече дека од 5 до 7, но не е сигурен, како што истакна, зашто не сака да пипа во темно. Советот на јавните обвинители заседава во полн состав откако празните места беа надополнети со имињата на Ангел Солев, Ангеле Илиевски и Ацо Колевски.
Ова тело го тресеа скандали поради спорниот избор на обвинители во јануари кога Штерјев гласаше за внуката да стане обвинител во Обвинителството за гонење организиран криминал и корупција, а од гласање не се иззема ниту Фиданка Рајевска, која гласаше да не биде избрана обвинителката што го гони нејзиниот сопруг за перење пари.
Седницата е закажана за следната среда во 11 часот со истиот дневен ред.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Ахмети прави спектакл во сала, улиците претворени во паркинг

Засилено полициско присуство на дел од улиците во Чаир, а колони од автомобили се паркирани на улицата Христијан Тодоровски Карпош во оваа општина. Очевидци коментираат дека ДУИ запоседна дел од улиците за свои паркинзи.
Причината е најавуваниот митинг од страна на ДУИ.
Во Чаир пристигна лидерот на ДУИ Али Ахмети придружуван од неговите партиски колеги, Талат Џафери и владините министри.
„Синиот океан Чаир му припаѓа само на Али Ахмети! Те сакам многу“, напиша на социјалните мрежи Артан Груби пред почетокот на настанот.
Македонија
Македонците се најнесреќни на Балканот, според светскиот извештај за среќа

Граѓаните на Северна Македонија се најнесреќни во регионот, покажува најновиот Светски извештај за среќа за 2023 година.
Спoред медиумите во регионот, Северна Македонија е на 87 место меѓу 137 земји, на последно место на Балканот и меѓу најнесреќните земји во Европа.
Во регионот Словенија е најсреќна и се наоѓа на 22 место, Косово е на 34 место, Србија на 45, Хрватска на 48, Грција на 58 место, Црна Гора на 67, Босна и Херцеговина на 71, Бугарија на 77 и Албанија на 83 место на светскиот извештај за среќа.
Само Грузија (90 место), Украина (92) и Турција (106) се рангирани пониско од Северна Македонија, е наведено во извештајот.
Авганистан и Либан се најнесреќните земји во светот, Финците се најсреќни, а во првите пет се и Данска, Исланд, Израел и Холандија.
Ова е 11-та година од објавувањето на извештајот за 20 март – Меѓународниот ден на среќата, кој беше прогласен од Генералното собрание на Обединетите нации во 2012 година.
Извештајот секоја година го составуваат научници од Соединетите Американски Држави врз основа на анкети на Институтот Галуп, кој опфаќа 137 земји.
Македонија
Поради градежни активности времен прекин на сообраќајот на регионалниот пат Велес – Градско

Поради вградување на асфалтен слој (асфалтирање), од 20.03.2023 до 25.03.2023, регионалниот пат Велес – Градско односно делот од с. Ногаевци до с. Виничани ќе биде затворен за сообраќај од 08:00 до 16:00 часот, информираат од АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.