Македонија
(Видео) Мицкоски: Нови 15 милијарди денари капитални инвестиции за општините, историски најголема инвестиција

Денеска, на редовна седница на Владата практично почнавме со постапката за објавување на вториот повик преку Министерството за локална самоуправа, со кој ќе се изрази интерес на единиците на локална самоуправа за финансирање капитални проекти од интерес на граѓаните, истакна премиерот Христијан Мицкоски.
Станува збор, како што појасни, за втор јавен повик за искористување средства од оние 15 милијарди денари што Владата, како што дополни, ги стави на располагање на општините.
„До 15 милијарди денари ќе биде вредноста на овој втор повик. Но, тоа не подразбира дека сите овие средства ќе бидат потрошени во тековната фискална година. Ќе повторам, за да нема забуни во јавноста, можно е некои проекти да влезат и во тригодишни буџети, и во 2025, и во 2026, и во 2027. Некои проекти да бидат само во 2025, некои да бидат и во 2025 и во 2026. Но, вкупниот волумен на средства со кои ќе се финансираат проектите од овој втор повик за кој денеска почнавме процедура на редовна владина седница е до 15 милијарди денари“, нагласи Мицкоски.
За таа цел, како што информира, се задолжуваат Министерството за транспорт, Министерството за животна средина и просторно планирање, Министерството за образование и наука, Министерството за социјална политика, демографија и млади, Министерството за спорт и Министерството за култура и туризам да ги утврдат критериумите со кои ќе се финансираат овие проекти преку капитални дотации.
Владата, според премиерот, го задолжи или ќе го задолжи Министерството за локална самоуправа откако целиот процес ќе биде дефиниран, да го објави јавниот повик за изразување интерес од страна на единиците на локална самоуправа за финансирање на проектите што се дел од овој втор повик.
Ова, според него, се значајни средства, кои се ставаат на располагање на општините за изградба на капитални проекти, како што се училишта, градинки, паркови, водоводи и канализации, со кои се решаваат децениски проблеми на граѓаните.
„Се работи за историски најголема инвестиција на централната власт во единиците на локалната самоуправа, општините, преку кои директно се влијае на подобар живот и повисок стандард.
Ова е втор јавен повик, на минатиот повик 78 општини добија 288 проекти, со вкупна вредност од 4,5 милијарди денари или повеќе од 73 милиони евра. И, дополнително, преку Министерството за транспорт приближно 800 милиони денари, тоа се средства кои со посебна програма беа доделени за финансирање проекти во општините“, потсети Мицкоски.
Како што оцени, вака директно им се помага и на граѓаните и на општините.
„И ова се мерки што се однесуваат само за граѓаните. Само вака, со работа и посветеност, го исполнуваме ветеното и Македонија станува повторно на народот“, додаде Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Наместо европеизација на Балканот се случи балканизација на Европа

Премиерот Христијан Мицкоски се обрати на панел дискусијата Геостратегија и енергетска сигурност во рамки на Минхенската безбедносна конференција .
Премиерот Мицкоски говореше за новите предизвици кои се исправаат пред НАТО, за плановите на Македонија во областа на енергетиката, како и за идните односи во Европа.
Тој посочи дека воопшто не е изненаден од говорите на Минхенската безбедносна конференција и одредени промени на „ветриштата кои дуваат”.
Кога зборуваме за НАТО не заборавајте дека мојата држава за да стане член на НАТО, го промени името. Кога се зборува за откажувања и за двојни стандарди не треба да заборавиме на ова.
Нашата посветеност за НАТО не може да се доведе во прашање, со многу страдање и понижувања станавме членка на НАТО- рече премиерот Мицкоски и дополни дека не е изненаден од последните случувања и најави на американската администрација.
Премиерот Мицкоски посочи дека кога се говори за двојни стандарди во политкиката треба да се има предвид македонското прашање, затоа што две декади кандидатскиот статус не може да се претвори во членство заради вештачките прашања кои се отвораат.
Ги слушнав гласините во Минхен, за мешање во внатрешните прашања, но кога го менувавме нашето знаме, кога ја менувавме валутата или кога го менувавме нашето уставно име, што беше тоа? Не ли беше тоа мешање во внатрешните работи и зошто тогаш никој гласно не говореше. Дури и сега се соочуваме со барање за менување на уставот пак, доколку сакаме да почнеме преговори со ЕУ. Што е тоа? Зарем не е тоа мешање во внатрешните работи?- запраша Мицкоски.
Ние сме дел од Европа и сакаме да ги аплицираме европските вредности. Но она што се случува е нешто што е комплетно различно. Ние сме сведоци на тн “балканизација на Европа“, наместо “европеизација на Балканот“. Некои балкански земји членки ги донесоа балканските спорови и балканските вредности во Брисел, наместо да е обратно.
Вие рековте дека Русија го негира украинскиот идентитет, јазик, црква, ужасна инвазија која беше многу погрешна во 21 век, но во исто време парламентот на една од најмладите членки на ЕУ го негира македонскиот идентитет, македонскиот јазик кој е официјален јазик на ООН од 1945 и е меѓународно кодификуван од 1977, тогаш за што зборуваме? Зошто сите молчат тогаш- потенцираше Мицкоски и посочи дека Македонија мора да добие извесност на својот пат кон ЕУ.
Во врска пак со енергетските планови и Македонија како крстосница додаде:
„ Ова изгледа како визија за иднината на Северна Македонија која има огромен потенцијал. Да се биде копнена земја може да се смета за недостаток, но вашиот пристап- да ја искористите географската положба преку Коридорите 8 и 10 е многу стратешка.
Коридорот 8, кој ги поврзува Црното Море со Јадранското Море, е критичен не само за економијата туку и за НАТО, бидејќи создава силна транспортна оска од Исток кон Запад.
Истовремено, модернизацијата на Коридорот 10 може да го промени начинот на кој суровините и производите патуваат низ Европа, намалувајќи ја зависноста од далечни пристаништа како Ротердам и Хамбург. Ако пристаништето во Солун стане клучна точка за транспорт, Северна Македонија ќе добие значителна економска и геополитичка предност. “
Македонија
Вклучувањето на Бугарите во Уставот е само првиот чекор и ќе овозможи почеток на преговорите, му рекол бугарскиот министер на Муцунски

Не е можно повторно преговарање или заобиколување на постигнатите договори зад кои стои цела ЕУ. Ваква порака испратил бугарскиот министер за надворешни работи, Георг Георгиев, до неговиот колега Тимчо Муцунски, на состанокот на маргините на Минхенската безбедносна конференција.
Во дописот на бугарското МНР за средбата, се наведува дека се разговарало за билатералните односи помеѓу двете земји.
„Министерот Георгиев истакна дека добрососедските односи се критериум во процесот на евроинтеграциите. Тој нагласи дека за градење добрососедство потребна е доверба, отворен дијалог, предвидливост и исполнување на обврските“, соопшти бугарското МНР.
Георгиев, како што се додава во соопштението на бугарската институција, бил дециден дека ставот на Бугарија во однос на европската интеграција на Република Северна Македонија е јасен и конзистентен.
Тамошното МНР потсетува дека европскиот компромис од 2022 година вклучува комплекс на мерки и нивното целосно спроведување е единствениот пат напред. На средбата било истакнато дека вклучувањето на Бугарите, на рамноправна основа со другите народи, во Уставот на Република Северна Македонија е само првиот чекор, чиешто спроведување ќе му овозможи на Скопје да ги почне преговорите за членство.
Претходно за средбата со соопштение излезе и македонското МНР. Од тука информираа дека на состанокот меѓу двајцата министри станало збор за билатералните разлики, блокадата на европскиот пат на државата од страна на Бугарија, и правата на македонското малцинство во Бугарија.
Министерот Муцунски, како што велат од МНР, изразил жалење што, наместо развој на добрососедската политика, односите меѓу двете земји остануваат оптоварени со билатерални спорови, опишувајќи ги како непринципиелна пречка на македонскиот евроинтегративен процес.
Македонија
Семејството на Фросина Кулакова со порака до институциите, утре ќе се приклучи на протестот

Росица Кулакова, сестрата на трагично загинатата Фросина најави дека утрешниот протестен марш е со јасни барања до надлежните институции.
Семејството ја повикува Владата да продолжи со поддршката и да ги сослуша барањата што ќе произлезат на протестите, а пратениците активно да се вклучат во промената на законите. Ќе се протестира и пред Апелација со порака до чинителите на судската власт да престанат да ги бранат нечесните меѓу нив.
Во прилог повикот за протестот:
„16.30ч пред Универзална Сала.
Симболично тргнуваме од овде. Местото каде што заврши сонот на Фосина. Местото каде што се прели чашата со крв. Местото каде што оваа иницијатива започна. Да и оддадеме почит на Фросина но и на сите жртви на корумпираниот и трул систем.
17.00ч пред Влада ( извршна власт)
Ние како семејство јавно се заблагодаривме и сме благодарни на досегашната поддршка од Владата.
Не протестираме против Владата, напротив, бараме да продолжи да не поддржува и нас како семејство, но исто така бараме да ја поддржи и иницијативата “Кој е следен” и да ги сослуша барањата што ќе произлезат од протестите. Истото го бараме не само од власта туку и од опозицијата!
17.45ч пред Собрание (законодавна власт)
Бараме да се вклучат во промената на законите и Парламентот активно да контролира како тие закони се спроведуваат.
18.30ч пред Апелационен Суд (судска власт)
Бараме да се свестат дека гнојот во општеството доаѓа од овде! Бараме да сфатат дека и тие се дел од народот! Бараме чинителите на судската власт да престанат да ги бранат нечесните меѓу нив, а веруваме дека не сите судии и обвинители се исти!
Ве повикуваме сите да ни се приклучите во оваа борба за подобро утре! Сите сме Фросина!!! Секој еден може да е следен“.
Фросина Кулакова загина во сообраќајка на пешачки премин на „Партизанска“, кога во неа удри автомобил управуван од 20-годишниот Васил Јованов. Возилото го управувал пијан, без возачка дозвола и без да застане на црвено светло.